الخداع

الفــصــل 4

♧ الخِداع ♧

جلسات كتشوف فوجه جواد بشرود ..لي كيكلمها أزيد من خمس دقائق وهي ماكتقدرش تستوعب شنو كايقول .. غير كتصنع الإبتسامة بصعوبة .. وقلبها غايوقف ..
خمسة عشر يوم بأكمالها .. ماشافت صلاح ولا دار بجيهتها .. ماكانتش عارفة أنه بكلامها أخير مرة غاتقطع صلة الوصل بيناتهم بمرة .. وغاتقطع ذكرياتها حتى هما ..
عقلها وقف عند ذكرى وحدة .. فحال شي جماد ماقادارش يتحرك ..
كتمشي تشوف بنتها وترجع حتى لليل بلا ماتلقاه .. كترجع خالية الوفاض .. كتصارع وحدتها بين أربعة جدران .. حاملة قلب مكلوم وروح موجوعة ..

جواد:~ شنو بان ليك ؟
بلعات ريقها بإحراج .. ماكانتش منتابهة تماما شنو كيشرح لها ..
مينة:~ سمح ليا .. ماعرفتش شنو كتقول ..
حط كفه حاضن أصابعها بدفئ ..
جواد:~ مامشيتيش عند بنتك هاد النهار ؟
ابتسمات .. وهزات راسها بنفي ..
مينة:~ عرفت عمها غايكون كاين داكشي علاش مابغيتش نمشي ..
غمضات عينيها كتفكر تفاصيلها الصغيرة .. وفتحاتهم بلمعة اشتياق ..
مينة:~ بدات كتولف عليا .. وواخا كتشوف شي حد كتبغي تبقى معايا .. حتى المربية ديالها مابقاتش كتباي تمشي لعندها .. بغيت غير يجي غدا دغيا .. غاتكون حتى هي توحشاتني ..
ابتسم لسعادتها .. ونطق بصدق ..
جواد:~ خليني نتدخل .. ونشوفو المشكل مع هاد ولد عمك ..
خرجو الحروف من جوفها مغلفين بالرفض ..
مينة:~ لا لا .. انا مهنية دابا منه ماكاين لاش ..  ماكنظنش باقي غايزيد يمنعني عليها ..
حسات بجفاف ف حلقها ملي ذكر صلاح .. خلا الضبابة تدوز على عينيها .. والعاصفة القلبية المألوفة تزمجر داخل ذاتها ..
الكلمات تخنقو ف جوفها  .. والحرارة اجتاحت روحها بأكمالها ..
داك الشعور المرير .. بالضعف والوهن ..!
شردات بنظرها مجدداً .. حتى ردها جواد بكلامه ..
جواد:~ كتفكري فشي حاجة ؟
تنهدات بصوت مسموع وبلا ماتفكر زوج مرات ..
مينة:~ باقي باغي تتزوج بيا ؟
الإستغراب بان على وجه جواد .. قبل مايجاوبها كملات بقوة مزيفة كتطرد ترددها ..
مينة:~ تزوج بيا أ جواد اذا كنتي باقي باغي ..
تلعثم فكلامه .. هز راسه كيتأكد من كلامها ..
جواد:~ واش متأكدة ؟
هزات وجهها بإيجاب ..
مينة:~ نتا قلتي باغي فرصة وحدة .. وأنا باغيا نعطي لراسي فرصة معك .. ماغانلقاش شي حد أحسن منك يفهمني .. أنا محتاجاك كثر من أي وقت فات ...
محتاجاه بقوة ... محتاجاه يصارع وحش الوحدة لي كينهش فيها ..!
حتى سمية ماقدراتش تطمئنها كيف العادة .. كل مرة كتجي لعندها كتلقى راسها حايرة أكثر منها ..

تصرفه الموالي كان مفاجئ لها كيف كان عرضها الأول .. حتى شافت الناس لي فالريسطو كلهم كيصفقو بحرارة وكيصفرو باش توافق .. وجواد ماد لها يديه كيستناها ..
جواد:~ تقبلي تزوجي بيا ؟
كانت عارفاه رومانسي ولكن ماشي لهاد الدرجة ..
حركات راسها بلا ماتخلي ل قلبها القرار فين يختار ..
ناضت وقفات ملي وقف تا هو ...
مينة:~ موافقة ..

بعد ذلك الاحداث كانو كايدوزو متسارعين فعقلها .. كلام جواد .. وهو كيعبر لها شحال فرحان وأسعد واحد  .. حيت عطات لراسهم هاد الفرصة  .. واعدها .. تغزل بها .. اعترف بحبه .. ولكن هي كلشي وصل لعقلها متأخر .. بلا حتى إحساس .. فحال شي وجبة باردة كتاكلها بلا شهية ..
نزلات راسها على الوسادة .. كتحدق فالسقف بشرود .. والدمعة عالقة تحت رموشها ..