قدر مراهقة 2

الجزء 24

قدر_مراهقة2
#ميرال_مجد
#بقلم_فريال
الجزء 24
فاتت ساعة زوج 3 وهو مزال ماجا قعدت متكمشة في الفوتاي نستنى فيه يدخل ملي خرج مارجع خايفة عليه كشما يصرالو ليل ليل وهو هامل، نضت طلعت لفوق كي سمعت صوت لجين تبكي كانت 4تاع صباح وهو مزال مادخل ياربي احميه وان شاء الله مايكون غير الخير. هبطت لتحت درتلها لحليب شربت وعاودت رقدت طفلة خرجت عندي تحب رقاد بزاف انا لوكان نلقى نرقد مانوضش خلاص وهي خارجة ليا مزية دات شوي من طبايعي هكا باش نهبلو مجد. لحقت 7 باش دخل مجد حالتو حالة مدمر تاع صح لوكان يكون عدوك وراح يغيضك وجهو كحال وعينه حومر ومدبالين متأكدة بلي كان يبكي قسملي قلبي للحظة ندمت كي حكيلتو لوكان سكت خير وبعدت عليه احسن مانوصلو للحالة هذي. شافني ضحك قالي ربي جابلك حقك لحرام الي طول عمري مبعد عليه ونحاول منغلطش ونديرو بعد ماتزوجت بلي نبغيها درتو وظهر كلش حرام في حرام عشت معاك شهور قلت واخيرا تزوجت وراح نعيش مع مرتي واش كنت باغي بصح كلش ظهر باطل زواجنا من اساسو كان باطل ولوكان سقسيت وشاورت لكبار راني عرفت لحقيقة ومستحيل نغلط ونتوشيك بصح كلش بسبابي ربي عاقبني على غلطي وخلاني نغلط ونزيد كي فيقتيني شغل موس وذبحني ملي كنت انسان شامخ ومسترجل وخاطي طريق لعوجة ولفسق ونسا في ثانية تقلب كلشي وطاحت قيمتي ورجعت انسان ضعيف والغلط راكبو من ساسو لراسو رجعت انسان جاهل معنديش ادنى فكرة على أمور الدين تاعي سامحيني ميرال ماقدرتش نحمي روحي من لحرام وزدت غرقتك معايا بلا مانفيق ، كان يحكي ويبكي انعم هيه يبكي باين عليه موجوع وتعبان وندمان عندو الحق اي واحد في بلاصتو يدير هكا طول عمرو مبعد على لحرام وذوك بعد ماتزوج باش يدير الي كان في خاطرو طاح فيه انا ومكانتش ساهلة عليا كي عرفت وينك ياهو. قعد فلرض وحط راسو على ركايبو وساكت حالتو تشف ومدمر كليا مرة نقول نروح نعنقو ونواسيه ومن بعد نقول لا خليه يستاهل يتعاقب على وش دار فيا، بقيت بين خيارين واخترت الانسب والي راح ينهي كل هاذ الصراعات والبعد. قعدت قدامو على ركايبي وحضنتو بلا مانقول والو هو بقى جامد مادار حتى ردة فعل بقيت نمسح على راسو وخليتو هو ساكت وانا ساكتة ونخليه حتى ينطق وحدو ويحكيلي وش صرا . بقينا على لحالة هذيك وقت طويل حتى وجعوني رجليا وبديت نميل ونفشل هو حس بيا بعد عليا ووقف فات لصالو انا لحقتو لقيتو قاعد في الفوتاي قعدت قدامو شاف ليا وابتسم ابتاسمة ماقدرتش نفهمها وعلى وجهو كل تعابير الحزن والشفقة، نطق قالي تقبلي تتزوجي بيا _ وشنو؟_ زواجنا كان من الاول غالط وباطل تقبلي تعاودي تتزوجي بيا ولمرة هذي مكيش مجبورة على اي حاجة خيري الي يخرج عليك انا مانسيفش عليك _ قبل مانجاوبك قولي وين كنت لوقت هذا كامل وش كنت دير؟_ جاوبيني من بعد نحكيلك كلش متخافيش منيش هارب _ لوكان مابغيتكش ماني هنا قاعدة ليل كامل نستنى فيك كون راني في دارنا ومنحكيلك والو ونخلي كلش كيما راهو ومنحاولش نتبدل على جالك انت وبنتي.
#فريال