قدر مراهقة 2

الجزء 27

قدر_مراهقة2
#ميرال_مجد
#بقلم_فريال
الجزء 27
كيما كان لحال تفاهم مجد مع بابا على كلش وقالو بلي حاب يعاود يفتح عليا ويعطيني شرط جديد ويدير عشا كي سقساه بابا علاه تعاودو ياك متزوجين قالو عندنا شهور بعاد على بعض وباش نحي كل الشكوك خلي نعاود نفتح عليها ماخسرت والو وحتى هي حابة دير لعشا قالو بابا قابل وكتاه تجيو تفاهمو بالجمعة بحكم خدمة ماما وبابا وتانيك انا موجدت والو كان باقي 4ايام على الفاتحة تاعي رقم 2(لوكان نلقى كل عام نعاود زواج ولعرس). فاتتو ليام يجريو عاونوني نسا خاوتي وختي شريت حوايج جدد بيجامات ودوبياس نويزات فوند غوب قنادر لدار ولخيوط هذوك (حوايج هذوك الي مايغطو والو بصح غالين ويحبوهم رجال نفضل نبقى عريانة على انو نلبسهم فضيحة وصاي) راح تسقسوني وين راح قشك وحوايجك ياك نصهم جدد بصح الله غالب متأكدة مايجونيش لمرا بعد ماتولد تتبدل وتعراض شوي وهذاك الي صرالي ومع السبور تانيك تعمرت من بعض المناطق ورجعت انثى كاملة مكملة. لحق اليوم الموعود نكذب عليكم لوكان نقولكم خايفة ولا متوترة والله عادي خلاص تلمو لافامي واولهم عماماتي وبناتهم وجداتي وعمومي نساهم جاو كيف عوايدهم مايديرو والو لمزية وجدنا كلش تالي هوما يعاونوش. جاو اهل لعريس (مجد طبعا لعريس تخيلو لوكان طلقتو وديت واحد خلاف اخلايا بعيد الشر بصح علبالكم تصرا مجزرة ويقتلني في ليلتي هذا اذا ماقتلنيش مجودي وعندو الحق انا لوكان جيت في بلاصتو وهو عاود زواج نقتلو ولا نقضي على مستقبلو ومنخليش غيري تقيسو ولا تحط يدها عليه صوالحي ليا وحدي)، مع جاو حطينالهم لغدا (انا درت غدا كنت معولة على لعشا مقبلش مجد قالي انا نديرو ومنزيدش نصبر ليوم تكوني في دار عندي مافيا الي يصبر)، فتحو كيما كان لحال جات عجوزتي نسا خاوتو ولافامي تاعو نصهم جاو جابولي كل خير تقول اول عرس ليا جازت شابة لوكان ما نطقت عمتي هذيك وبنتها كلاو رواحهم وعلاه وترجعي ولوكان انا منو والله مانرجعك وطيحتي بقيمتو ومكيش تاع دار وهذا كامل قالوه قدامهم عجوزتي بردتلي قلبي فيها المرة هذي قالتلها كي مترجعش هي لدارها ولولدي شكون حاتجي في بلاصتها بنتك؟ كي قالتلها بنتك لمعو عينيها بالفرحة قالتلها علاش لا بنتي الف واحد يتمناها قالتلها عجوزتي روحي عند الالف هذوك يدوها انا وليدي مانقبلش تدخل دارو من غير ميرال (بووووم تستاهل الكلبة صحيتي عجوزتي الزينة بردتيلي قلبي فيها تستاهلي كادو شباب) كي قالتلها هكاك بلعت لسانها كلمة مازادتها انا رجعت نشطح مع بنوتي ودبة تاع رنيم الي بالسيف تتحرك (لبست غوب فالفاغ وبنتي تاني كيفي عدلت وتحفت روحي زي لعروس اصلا انا عروس وهذا عرسي تاني والعاقبة لثالث ورابع).
#فريال