ငါ့ကိုယ်ငါအဖြောင့်လို့ပဲ ထင်ခဲ့မိတာပါ (mm translation)

(1)မယ်ရီစူးဥက္ကဌဆီမှ ရူးသွပ်စွာပိုးပန်းခံရခြင်း

အခန်းထဲ၌အလင်းရောင်အနည်းငယ်သာရှိပြီး ထိုခပ်မှိန်မှိန်မီးရောင်အောက်တွင် ပရိတ်သတ်သန်းပေါင်းများစွာဆီမှကောင်းချီးပေးခံထားရသည့်ယန့်ကော၏မျက်နှာက အနည်းငယ်မှောင်မိုက်ကာအသက်မဲ့နေသည်။

အိပ်ယာပေါ်မှာထိုင်ကာ ဟန်ကျကျစီးကရက်သောက်နေသည့်ယန့်ကောတွင် အဝတ်ကင်းမဲ့နေပြီး သူ၏ခါးအနီးရှိစောင်က ခန္ဓာကိုယ်အောက်ပိုင်းအား ဖုံးအုပ်ထားသည်။ ရွှယ်မန်က အိပ်ယာပေါ်၌ လဲလျောင်းရင်း ဆေးလိပ်ငွေ့များကြားမှထင်ရှားနေသည့် ယန့်ကော၏မျက်နှာကိုကြည့်ကာ ထိုသူမည်မျှဆွဲဆောင်မှုရှိကြောင်း မတွေးမိပဲမနေနိုင်တော့ပေ။

စီးကရက်တစ်လိပ်က လျင်မြန်စွာကုန်သွားပြီး ယန့်ကော၏ဆေးလိပ်ပြာခွက်ထဲတွင် အဆုံးသတ်သွားသည်။နောက်ဆုံးမှာတော့ သူကသက်ပြင်းချလိုက်ပြီး သူ၏ဦးခေါင်းကို ကုတင်နှင့်ဆန့်ကျင်ဘက်သို့လှည့်လိုက်သည်။

ထို့နောက်တွင်‌တော့ သဘာဝကျကျပင် အမှိုက်ဆန်သည့်စကားလုံးများစွာက သူ၏နှုတ်ဖျားမှထွက်ကျလာတော့သည်။

"ငါမနေ့ညက အရမ်းမူးသွားခဲ့တာ...ပြီးတော့ငါတို့...အခုလိုအခြေအနေတွေဖြစ်သွားလိမ့်မယ်လို့ လုံးဝမထင်ခဲ့မိဘူး......အဲဒီတော့...ဘာမှမဖြစ်ခဲ့သလိုပဲသဘောထားလိုက်ကြတာ မကောင်းဘူးလား"

ရွှယ်မန်က ယန့်ကော၏ပြီးပြည့်စုံသည့်မျက်နှာကိုသာ သတိလက်လွတ်ငေးကြည့်နေခဲ့ပြီး ပြန်လည်အသိဝင်လာချိန်တွင်တော့ ‌သူ၏အမူအရာကအေးစက်တောင့်တင်းသွားတော့သည်။
"မင်း...မင်းဘာပြောလိုက်တာလဲ"

ယန့်ကောက ရွှယ်မန်၏အမူအရာကိုသတိမထားမိပဲ ရှင်းလင်းစွာမကြားရခြင်းဟုအထင်လွဲသွားကာ ထိုစကားလုံးများကိုစိတ်ရှည်လက်ရှည်ဖြင့်‌ နောက်တစ်ကြိမ်ပြန်လည်ပြောကြားပေးလာသည်။

နောက်စက္ကန့်အနည်းငယ်ကြာပြီးနောက်မှာတော့ ယန့်ကော၏ခန္ဓာကိုယ်က နှင်းဆီရနံ့များမွှေးပျံ့နေသည့်ကုတင်ပေါ်မှတစ်ဆင့် အေးတိအေးစက်ကြမ်းပြင်ပေါ်သို့အရှိန်ဖြင့်ကျဆင်းသွားကာ သူ၏ခန္ဓာကိုယ်အောက်ပိုင်းနှင့် ကျောရိုးတစ်လျှောက်တွင် ပြင်းထန်သည့်နာကျင်ကိုက်ခဲမှုများ ဖြစ်ပေါ်လာတော့သည်။