قدر مراهقة 2

الجزء 31

قدر_مراهقة2
#ميرال_مجد
#بقلم_فريال
الجزء 31
علبالي بيه هو الي حاوز لغاشي تالي راهم يبقاو لنص ليل. درت البرنوس برك كعاد ليل وواحد ماكان مالبستش حجابي خرجت انا ومجد وديراكت لدار كان حاب يديني للاوتال مقبلتش قولتلو مكلاه نحب داري احسن تكون بداية جديدة وهي شاهدة على لحظاتنا السعيدة الي راح نخلدوها انا وانت من ليوم، هو قبل ومعارضنيش اصلا من ديما يديرلي وش نحب انا برك نحب نعاكسو ونعاندو. وصلنا لدار دخل لوطو للڨاراج وفات للكوزينة حط لعشا كان جايبو معاه في حالة ما جعت ناكل فليل يعرفني مكراشة مانفرطش في كرشي خلاص ولوكان نلقى ناكل 5مرات فليل. انا سبقتو لشومبرة نحيت لبرنوس ولقيت ديجا الفاليزات تاوعي محطوطين لتم اكييد بعثوهم بكري لوكان غير دارو فيا مزية وستفوهم يهنوني من التعب ونوفر جهدي للاستجواب. ربعت رجليا فوق سرير وعيطت بأعلى صوتي مججججججد جا يجري مسكين في بالو طحت ولا كشما صرالي وانا زي لحلوفة لباس عليا غير نحب نخلعو برك (مستحيل تتبدل يصرا وش يصرا تبقى هي هي بنفس طبايع ومتتهناش حتى تجلطو مسكين). خير وش خصك _اقعد تشو قدامي واحكيلي كلش _عيطتيلي باش نحكيلك؟_هيه _وش حابة نحكيلك متقوليش برك قصة قبل النوم ولتم تتعدل عليا باش نبات عريس نرجع اب يرقد بنتو _ تخمامك غير في نصك تحتاني _ انت قدامي وفواش حابتني نخمم منقدرش_ حكمتك هاهو دليل بلي انت خاين واكيييد طول الة الي انا كنت غايبة فيها تكون خلطتها من ورايا لانو مستحيل راجل يصبر 6شهر بلا مايدير شي هذاك _ يقدر يصبر نهار يكون مشغول ومعندوش لوقت حتى باش يخمم في الصوالح هذو _ وش من شغل عندك انت _ الخدمة تاعي انت تخدميها ودار ولجين وخدمة تاع بابا تاني كلش تلم عليا ماكانش عندي لوقت باش نخمم في حوايج خرين _ تسمى لخدمة الي شداتك تالي راك خممت ودرت _ لا اله الا الله وش طفلة هذي رايحة تنوضيها معايا من ليلة لولى _ مادرت والو انت الي معوج برك _ ايه انا معوج وانت عاقلة ظلموك كامل مسكينة القط ياكل عشاك بلعي فمك وارقدي علبالي ليلة تفوت زفت عليا من ديما هكا امالا نروح نرقد في شومبرة لخرا _ علاه كرهت مني مش حاب تقابلني وش درتلك _ انت الي مش حابتني نقعد معاك عليها راكي ديري في المشاكل _ مدرت والو غير سقسيتك _ ايه صاي ذوك عرفتي كلش برد قلبك _ مزال _ وش حابة تعرفي كلش كلش وش درت طول الفترة الماضية _ والو من غير الخدمة ونلهى بلجين مرات نروح لدارنا ونجي ليكم وصاي _ مخرجتش خلاص خارج لولاية حوست درت _ والو تخزنت مع شغالات ومقدرتش نبعد _ مليح هكا خير _ كمل التحقيق تاعك ولا مزال _ حاليا كمل اذا زدت تفكرت كاش عفسة اني نسقسيك _ ايه معليش المهم تركحي _ نخليم ندخل ندوش _ خلي ندوش انا لول انت طولي بزاف _ والو في احلامك السيدات اولا _ خلاص فوتي برك انا نهبط لتحت وندوش المهم تسكتي _ الغلطة مني انا قاعدة نحكي معاك ونضيع وقتي.
#فريال