قدر مراهقة 2

الجزء 34

قدر_مراهقة2
#ميرال_مجد
#بقلم_فريال
الجزء 34
حكينا شوي وقصرنا وعاودنا جبدنا موضوع الراجل وكيفاه يخون نطقت هي قالتلنا ديرو وش ديرو راجل كي يبغي يخونك يخونك يالوكان تكوني ملكة جمال العالم وطباخة زي ام وليد وكلش تاع مليح هكاك ويخونك مع وحدة ماتسواش وخامجة تاع رجال كامل وتلبس جلابة مزيرة وقصيرة وفيزو تاع نمر ترسم حواجبها ويجو خشان ودير نص خيمار وترسم الخانة ونص سنيها طايحين والشوينغوم مايتنحاش من فمها خلاص وتلقايها مخالطة وتعرف ناس كامل وعندها معارف وسمعتها مش مليحة كامل يحكو عليها بالخايب وكبيرة عليه شارفة هارفة وهكاك ويخونك معاها واذا ماقفزتيش على روحك يتزوجها ويزيدها ضرة عليك ويمرمدك فوقها، كلامها كأنو كف وفيقني من سذاجتي وقلة فهامتي الراجل يبقى راجل وتاع صوالحو قد مايقدر راح يحاول يسيطر على رغباتو بصح لوينتى وبنات لحرام بزاف ويتلاحو على رجال المهم يلصقو فيهم مايهمهم لامتزوج لامطلق لاارمل ولا عازب عندو ولاد معندوش حتى ويكون فقير ويتزوجوه المهم يستغلوه يجيبو لولاد ويعطوهم اسم ولقب باش ميبقاوش ولاد حرام ويكملو في فعايلهم الشينة الفايحين (الله يعطيهم ضربة الي تريب ساسهم كلبات خامجات لاكرامة لا والو مذلولات مع لول يتمسكنو حتى يتمكنو ويتحولو) ديما راجل كي يتزوج على مرتو ويجيب ثانية ينسى لولى يضرب معاها عوام حتى يفيق ويكره منها ويرجع يحلل فلولى باش تسمحلو وكاين الي يقبلو ويسامحوهم وكاين الي يعفسو عليهم ويفوتو (الي بدلك بالخامجة انسايه وكملي حياتك دنيا ماتوقفش عند راجل كملي حياتك وعيشيها بالطول والعرض وهو يجي نهار وين يندم ويرجع يحلل ولتم خليه زي لكلب). كانت تحكي وباين عليها موجوعة ومقيوسة يمكن تفكرت راجلها لول منعرف عليها كي نقعد مع رنيم وتعمرلي لقرع كامل (هي مش كبيرة بزاف قل من ماما مزال مادخلت لربعينات وشابة مسرارة تزوجت من قبل وطلقت عايشة وحدها عندها دار ولوطو وتخدم مع ماما ماخصها والو ديما نلقاها تضحك وتقصر بصح لمرة هذي باين عليها حزينة وتعبانة ولهم راكبها من ساسها لراسها تالي متجيش لعند ماما وتقعد هنا). جا وائل وخليل باش يتغداو هي كي شافتهم خرجت راحت لشومبرتي هوما قعدو معايا شوي وراحو لصالو مع مجد وبابا كي بقينا وحدنا قولت لرنيم هذي وش داها لشومبرتي قالتلي بلي عندها يومين وهي تبات لتم جات لعند ماما وكانت تعبانة خلاص هزوها لسبيطار ورجعوها وذوك بدات تتحسن، انا مادخلتش لراسي تاع مريضة وجات هنا لانو عندها يماها وخواتاتها مهمش بعاد بزاف منا لوكان بغات اي عيطتلهم جاو داوها ولا قعظو معاها الموضوع اكبر من هك باينة وراهم مصيبة حتى من ماما مهيش مليحة تبان مهمومة ومش مرتاحة كاينة حاجة راهي تتطبخ من ورانا بصح تعيا وتبان ونشمو ريحتها وياريت ماعرفنا ولا سمعنا ولا فهمنا لحكاية.
#فريال