🌺عبق ياسمين 🌺 (طور التنزيل )

part93

عبق الياسمين 🥀
🖋️ نور آية 🖋️
بارت...93🍂
حنان: واش ليا انا (حرك ليها راسو بايجاب و فالبلاصة رجعاتو ليه تتحرك راسها يمين و شمال) لا لا اويليي سمح ليا منقدرش ناخدو تيليفون دقة وحدة
يوسف:(عطاه ليها و حمر فيها) شنو دابا تردي عليا الهدية و الرسول صلى الله عليه وسلم مكانش كيردها
حنان: عليه الصلاة والسلام ولكن منقدرش ناخدو بزاااف هكاااا
يوسف: غتاخديه و يدك فوق راسك اري نركب لك الكارط و دخلي الالة غا نمرتي صافي (غمزها تاحشمات)
حنان: واللهتا معرفتش شنو نقولك(مدت يدها للساك جبدات شي فلوس مداتهم ليه) هاك خود هادو تال الدار و نكمل لك عفاك راه منقدش
يوسف:(هرب يدو منها) استغفر الله العظيم واش بغيتيني نكعا عليك شدي دوك الفلوس و هذا كادو سالينا...
مخلاهاش مازال تهضر و هي حشمات تا ماقدات حرجها بزاف لكن كبر فعينها..... جبد التيلي شعلو و قاد فيه الكارط..... دخل نمرتو و صونا على راسو حتى طلعات ليه النمرة هاد مدو ليها....
يوسف: هاكي الالة بالصحة و الراحة تتوصلي للدار و عطي لشي وحدة فالبنات دخل لك الكود و ديري واتساب ولا اللي بغيتي
حنان: الصراحة معرفتش شنو غنقولك شكراااا بزااااف والله خيرك منساهش..
يوسف: هاد الحمقة هادي زيدي دابا تجري علينا سميرة بثلاثة..
مشاو للرياض و كانت نفسية كل واحد فيهم مبدلة..... المورال طالع و واحد الراحة نفسية و فرحة غامرة كل واحد.... هو ارتاح ليها و هي كثر..... زاد تعرف عليها و عرف بيلا حنينة و بصح بنت الناس و بنفسها واخا قلة الشي لكن كرامتهاااا و كبريائها حاضرين و بقوة..... حيت وحدة اخرى غتستغل اي فرصة فين تجبد من عندو.....
وهي عرفت بيلا ولد الناس و محتارم اهم حاجة انه ما مسها ما قرب ليها بسوء حتى الهضرة مفاتش معاها حدود الاحترام.... و سخي بزاااف واخا حشمها بكرمووو....
وصلو و تفارقو فالباب شكراتو على اللي دار معاها وهو مكرهش مازال تبقى معاه لكن الحق حق..... دخلات نيشان للبيت بدلت و خرجت للكوزينة فرحانة تلاقات مع سميرة كطيب فالحريرة سلمات عليها و لوخرى ملاحظة ضحكها و نشاطها جلساتها فالصال أمونجي و جلسات حداها و قالت...
سميرة: كيدازت خرجتكم ابنتي فوجتي شوية
حنان: مزيانة اخالتي الحمدلله الله يخلف على السي يوسف
سميرة: ايوا مزيان اللي نبغيك تعرفي ابنتي انو من نهار جابتك ياسمين اللي ولات وحدة من بنتي وليتي حتى نتي وحدة منهم و معزتك كبيرة فقلبي والله شاهد خصوصا انك درويشة و بنت باب الله و ماشي شي وحدة اللي باغا طير عزيتي عليا و ماشي غي انا حتا عمك حسن و مي كلثوم و كولشي درتي بلاصتك عندهم و نبغيك اي حاجة كانت عندك يا مقلقة يا مخنوقة و باغا لمن تعاودي يا فرحانة يا محتاجة اللي بغيتيها تجي عندي راني ميمتك دابا..
حنان:(نزلو دموعها مع حناكهاااا كيجريو من الهضرة اللي سمعت هادشي اللي عمرها فحياتها قالو ليها شي واحد عمر شي واحد حن فيها ولا قال محتاجة ولا مقلقة ولا فرحانة ماحسات تا تلاحت عنقاتها تتبكي) شكراااا شكرااتتت بزااااف اخالتي حتى نتي دابا فمقام مي اللي معنديش انا.... عمر شي واحد قالي هاد الهضرة (تحبسات ليها الهضرة بالبكا)
سميرة: سكتي سكتي ابنتي (كتمسح دموعها اللي حتى هي نزلو ليها) مقلتش لك هاد الهضرة باش نبكيك غي بغيتك تعرفي بيلا ماشي بوحدك و حتى يوسف راه ولد الناس و راجل و انا مكرهتش يكمل عليكم الله و تزوجو (حشمات حنان و هبطات راسها) الله يرضي عليك ابنتي و يكملك بعقلك.....
بقات معاها تا سكتات عاد ناضو كيوجدو فالعشا بالضحك....
نرجعو لعند الكوبل ديالنا اللي مشاو تقداو مستلزمات الدار و دازو يتغداو برااا عند واحد من المطاعم ديال الحوت خدا كل واحد بلا ميكست و جلسو كيدردشو....
محمد: اش بان ليك فشي تسافيرة امدام طلعت ليا هاد الرباط فراسي
ياسمين: اللي بغيتي غير هو فين دابا بارد الحال
محمد: وانااااا مكرهتوش يبرد كثر من هكاااا باش نسخنو نيييت هههههه نمشيو لاگادير تتكون زوينة هاد الوقت
ياسمين: هههههه عقلك موسخ واخا نمشيو ايمتاااا بعدا
محمد: نمشي غدا للمحل نشوف الخدمة فين واصلة واللي حاصلة نحولها للمحل ديال اگادير و نمشيو غالبا بعد غدا نقلعو غا عولي تسوقي احبيبة..
ياسمين: ههههههه ولكن بشرط
محمد: تشرطي يا العمر نتاااا تآمري
ياسمين: ههههه نمشيو فطوموبيلتييي
محمد: ايهاي على طوموبيلتي واخا الالة غدا نخرجوهاااا و نمشيو يله دابا نتحركوووو...
خلص محمد و مشاو للدار طلعو كولشي فالسانسور و دخلو اول حاجة دارت ياسمين بدلت بكسيوة خفيفة ديال الدار و جمعات شعرها.... مشات ستفات كولشي فالكوزينة..... طلات على محمد لقاتو متكي خرجات باشما تصدعوش......
صونات على دعاء بقاو داويين و جاتها گانتها دير شي گوطي متكتك فعلا جبدات الدقيق و دارت عجنة قداش ديال المسمن.... خلاتها ترتاح و دازت خلطات كيكة دارتها طيب عاد بدات كطيب فالمسمن..... دوزات ديك العشية فالتوجاد زادت حريشات صغاااار.....
كطيب فيهم تا حسات بيد محمد كدور على خصرها و وجهو مخشي فعنقها سخون حتى بورشها.....
محمد:(بصوت مبحوح بالنعاس) اش كدير الحبيبة ديالي
ياسمين:(حيدات الحريشة اللي كانت كطيب طفات البوطة و دارت عندو معنقاه من خصرو و مكاليها البوطاجي من اللول كتشوف فحنيكاتو حمرين و شعرو مشعكك كيبان بحال شي بيبي) وييينو عاد فقتي كنصاوب الگوتي قلت ندير شي مسيمنات و هكاااا
محمد: احححح على الحداكة انااا اللي تزوجت و صافي باراكا عليك احبيبة اجي تجلسي
ياسمين:ننصب العشا بينما برد هادشي و نجي جلس معايا ونسني
محمد:(خطف بوسة من فمها) نجلس مع الوريدة ديالي...
بقاو داويين وهي كتنصب فاللحم فطاجين ملي عرفات محمد عزيز عليه الماكلة البلدية قررات دير ليه طاجين ديال اللحم بالبرقوق..... سكتو للحظة حتى قال محمد بدون سابق انذار...
محمد: شيماء غتزوج
ياسمين:(دارت عندو مصدومة) اويليييي غترجع لراجلها
محمد: لا غتزوج بواحد البرهوش حاملة منو
ياسمين: بلاتي اش كتقول اويلييي
محمد: داوي معاك راه روينة نايضة
ياسمين: هادشي فخبار خالتي حفيظة و الدار ولا لا
محمد: فخباري انا و يوسف ونتي صافي
ياسمين:صدمتيني والله
محمد: ماعندك لاش تصدمي انا حلفت مندور بساحتها يوسف تكلف انا ماسوقيش فيها من هناااا لقدام ضبر مخها
ياسمين: معرفت مانقولك نسا داباااا و سبقني للصالون ناكلو...
خداو الگوطي ديالهم و جمعات ياسمين الماعن عاد دازت لبيتها..... حيدات الكسوة اللي فيها ريحة ديال الطياب و جبدات كسيوة عمرها لبساتها و مكانتش زاعمة لكن ملقاتش شي فرصة حسن من هكا كانت كسيوة مخملية (موبرة رقيقة) سميطاتها رقاق و جاية تال الركبة لاصقة عليها فاللون الأسود....
قبلما تلبسها ذهنات لحمها بكريم بنكهة الشوكولا خلا لحمها كيبري..... لبساتها فوق دوبياس دونتيل كحلين..... طلقات شعرها اللي كيحمق محمد مع اظافرها ديال رجليها اللي مصبوغين بالاحمر قاتم دارت خلخال و سنيسلة فعنقها قصيرة...... ختمات لوكها بعكر احمر دم الغزال..... و عطر مثير...
خرجات مدازتش عندو مشات للكوزينة قادت طبسيل فيه الفواكه الجافة..... و طبيسيل فيه طريفات ديال الكيك اللي صاوبات بشوكولا.... مع عصير صاوباتو ديال الليمون و الفريز...... قادت داكشي فبلاطو و نقسات على الطاجين و مشات عندو.....
كان طافي الضو ديال البيت و مشعل غير زوج فييوزات عاطين ضو خفيف..... حطت داكشي فوق الطبلة و مشات شعلات الضو.... دار عندها محمد و تصدم..... عينيه تحلو و فها فيها.... عمرو شافهاااا بهاد الشكل...... فورمتها مرسومة كتبان فديك الكسيوة بحال شي حورية.....
ضحكات بحشمة و جرات الطبيلة حداه..... جلسات حداه و بدات كتكب فالعصير وهو عينيه غي على فمها و صدرها اللي كيطل...
ياسمين:(مدات ليه الكاس) هاك احبيبي شرب
محمد: ياكما غنموووت
ياسمين:برا الباس عليك احبيبي الله يحفظك ليا مالك على هاد الهضرة
محمد: واااا راه اختي عمرني شفتك هكا قلت الوداع هدا
ياسمين: بغيت ندلع راجلي شوية شنو فيهاا خود ليك كيكة
محمد: تگهمت اناا ولكن نتي ممزياناش بان لك الدلع غا ملي اناااا معطوب
ياسمين:(قربات لوذنو و قالت بصوت خافت) اللي بغاها حياتي نديرها ليه لهلا يحوجك
محمد:(تلاح اللور كينش على راسو بيدو) اححح اربي على العمر ديالي عندي طلب واحد (حركات ليه ياسمين راسها) متشربيش الكينة (تقاد فالجلسة و خدا يدها باسها و كمل) بغيتك تحبسيها احبيبة بغيت شي قطعة منك تعمر عليناااا..
ياسمين:(حطات يدها على حنكو) اللي بغيتيها هي اللي تكون وا خود كووول
محمد:(خطف بوسة من فمها) وكلينيييي ازاين هههههه
ضحكات و مدات يدها كتوكل فيه مع بوسات و لمسات وحتى هي ممنعاتش راسها منووو.... قررات انها لاول مرة فحياتها غدير داكشي اللي كيملي عليها قلبها و مغتقمعش شهوتها عليه...... كمل كاسو و ناضت دات داكشي كتعوج.....
رجعات لقاتو تكا نص تكية..... برونشات التلفازة مع التيلي و خدمات اغنية شرقية...... خدات حزام ديال الموزون كانت واخداه مع اللبسة ديال الرقص..... تحزمات بيه مع شوفات ديال الاغراء..... بدات الاغنية و بدات تتحرك معاها باحترافية..... مع كل نغمة كتحرك خصرها و مؤخرتهااا......
محمد كيشوف مبهوض......عمرو تخيل انها غتوصل معاه لهاد الدرجة...... فرحاتو بزااااف و عجبو الحال..... وصلات ليه فكرة انه كيما داير مجهود باش يرضيها حتى هي غاديييير المستحيل باش ترضيه...... دارت و عطاتو بالظهر و بدات تتحرك فترمتها يمين و شمال حتى حوالو عينيه...... تمشات حتى وصلات لعندو و بدات كتطلع و تنزل وهو تابعها براسو.....
مع حدرات راسها عندو جرها من خصرها حتى طاحت عليه...... و تلاح على فمها بوابل من القبل و يدو تتلعب فصدرها اللي بارز بشكل خطيييير...... تكره و دعا فالنهار اللي تهرس فيه..... مكرهش يكون بيخير و يمارس عليييها طقوس حبو...... مد يدو حيد ليها الحزام و نوضها عليه شوية..... فمها مجلخ بالعكر و هو كثر منهااااا..... خشات وجهها فعنقو كتبوس محس بيها حتى جمعات ليه مصة و عضة..... حتى قفز خلاتها ليه كتوزوز.....
محمد: كتعضي القطييييطة
ياسمين: ههههههه....
تعشاو فالضحك و الرومانسية مرة يولكها مرة توكلو حتى كملو......مشا هو سبقها للدوش فحين هي بقات تا جمعات الماعن كاملين دارتهم فلافيسيل و مسحات الدنيا.... عاد تبعاتو لقاتو خرج بعدما دوش و توضا..... دخلات تاهيا دوشات و توضات.... تلوات فبينوارها على البرد.....
لقاتو متكي كيتسنا فيهااا... لبست بيجامة سخونة و جمعت شعرها باتشا فزيف حياتي..... مشات حداه و تخشات حتى عنقها عاد طفات الفيوز و تخشات ليه..... احسن نعسة نعسوها من نهار تزوجو..... بعد علاقة متكاملة بيناتهم كانت السيطرة من طرفهم بزوج..... و احسن نعسة كتكون عند اي كوبل هي النعسة اللولة مورا اي مخاصمة.....
كيكونو توحشو بعضهم و باغيين باي طريقة يوصلو حبهم لبعضهم.....
محمد فالغد ديال الليلة المنشودة فاق ناشط خرج جاب فطور اموبورطي قادو فبلاطو قبل ما تفيق ياسمين مع وريدة و داه ليها حتى الفراش..... فيقها بدلع و بشوية و حتى هي كانت مرتاحة و المورال طالع...... فطرو مع بوسات من هنا و كليمات من هنا...... مشا للمحل قدا شغلو و الخدمة اللي كانت غتبقا ليه كلف بيها علي باه نو يبقى مرتاح......
داز عند الطبيب ديالو اللي علمو بيلا مبقاش ليه بزاااف و يحيد الجبيرة دار معاه موعد باش غير يجي من اغادير يحيدها...... فحين ياسمين بقا فالدار جمعاتها كاملة و سيقات و دازت كتجمع فالحوايج..... ففاليز متوسطة اول حاجة دارت اختارت لبسات ديال الخروج مقادين دارتهم عاد دازت لحوايج الدار مكاين غي الله يعطيك صحيحتك فالعراااا..... ناوية تقتل محمد بالحلوة و تركب فيه السكر.....
دارت غدا خفيف و تسنات على محمد تيجي عاد جمعات ليه حوايجو..... داز نهارهم عادي فالعشية مشاو خرجو الطوموبيل من لاميزو فرحانة بيها و حتى محمد مقمعش ليها فرحتها.....غادة طالقة الشعر كيطيرو البرد من الزاج و الزدحة مطلوقة على جهدها..... و محمد حداها مكسل بديك الكسدة ديالو تيضحك و مرة مرة يصورها.....
وقفو فواحد السطوب وهي تبدا تحرك مع الموسيقى غافلة على العينين اللي معلقين عليها من طوموبيل اخرى.....
حتى تهز محمد و بان ليه ولد تكون عندو ديك 22 عام باينا فيه زويزو ولد بابا و ماما حاضيها غير بان ليه محمد مخنزر فيه و داير فيه ديك الشوفة ديال يا تحدرهم يا نعميهم لجدك..... حدر راسو و معاودش هزو حتى شعل ضو و داز منير......
كملو عشيتهم فالدار مخشيين فبعضاتهم ففوطوي واحد مغطين بكويطا خفيفة مرة يتفرجو مرة يهضرو مرة يقلبوها بوسان.......
و حتى فالرياض داز نهارهم عادي حنان فخدمتها النهار كامل..... دارت الواتساب فتيليفونها و اول واحد طلع ليها هو يوسف اللي واخا بغات تصيفط ليه مسج لكن مزعمتش..... يوسف اللي النهار كامل مشافتوش و مشافهاش.....
بعدما تفارقو البارح طلع لبيتو معاودش نزل و الصباح خرج بكري قبل ماتفيق...... معرفش علاش لكن للحظة حس براسو زرب على راسو و على حنان..... تفكر هضرتها ديال انها كيبانو ليها الرجال فحال فحال و خاف انه تكون حاسباه منهم..... قرر انه يعطيها مساحة و ميأثرش عليها بأي شكل حتى تبدل رأيها..... قرر من دايتو لراسو معارفش انه عارفاه ماشي بحالهم و تايقة انه عمرو يكون بحال داك الشماتة..... لكن صافي قرر انه يبعد عليها.....
هكا داز النهار حتى فالرياض شيماء ضالا فبيتها النهار كامل بما ان الوحم بدا كينقص عليها مخرجاتش حيت عارفا راسها ايلا خرجت غتنوضها مع شي واحد فضلت تبقى فبيتها......
الغد ليه فاقو محمد و ياسمين بكري مع جوايه الثمنية و بما ان الحال برد مبقاش عندهم مشكل البرد.... فطرو و بدلو حوايجهم بملابس مريحة للسفر..... تأكدو من البوطة و الضواو و كولشي عاد خرجو فاتجاه عاصمة سوس.....
فالرياض كان اليوم الموعود..... اليوم اللي غيجي فيه ايوب و عائلتو..... و كأي ام مغربية غتزوج بنتها سواء كانت مزيانة ولا خايبة و بغض النظر على عدد التزويجات..... كيخصها ضروري دير اللي فجهدها و كثر باش تحمر وجهها ووجه بنتها قدام نسابها..... هكاك حفيظة اللي واخا مريضة لكن صبحات فالكوزينة هي و حنان و تيسير تيوجدو و يطيبو....
ماخلاو مادارو ها المسمن ها الغرير ها الشيار ها الحريشات و عاد العشا اللي كان عبارة على كوكلي محمر بالدغميرة و نص حولي فالفران..... خرجات حفيظة من الكوزينة مخلية حنان اللي مسيكينة الوجع من جيهة و الوقفة من جيهة..... وجهها صفر مسقوط من الدم بسبب وجع الدورة اللي شادها و اللي كيمحنها لكن متقدر تقول والو......
شعرها لصق عليها و كولها رجعات تتبري بالعرق...... الجهد مبقاش عندها و مكابرة و واقفة غا بزز..... للحظة حسات لركابيها خواو و غتغيب فاي لقطة..... داخل يوسف كيقلب على مو تكتبان ليه متكية على البوطاجي..... رجليها كيرجفو و خارجة ليها فالبيجامة البيضا بقعة كبيرة ديال الدم..... حدر راسو بالزربة و مشا تال عندها..... طل لقاها عرقانة بحالا كبيتي عليها سطل ديال الما و عينيها كيتلصقو....