قدر مراهقة 2

الجزء 42

#قدر_مراهقة2
#ميرال_مجد
#بقلم_فريال
الجزء 42
مرات يصراو للانسان حوايج ميتوقعهمش او بالاحرى مكانش حاطط بلي ممكن يصراولو وهذا خطأ اتعلمو تتوقعو كلش في دنيا هذي الموت المرض الابتلاءات كلش كلش اتوقعو يصيبوكم متقولوش لا مستحيل تصرالي هكا وهكا وانا صغير مزال جاي لدنيتي وعمري طويل وهذيك متصراليش وهذيك وهذيك وووو، اتوقعو الاسوء تعرفو وش هو الاسوء اتوقعوه الموت حق وكلنا رايحين نموت عاجلا ام آجلا المرض تاني يصيبك ليوم ولا غدوا فقدان الاقارب والاحباب المصايب كامل يصيبوك كون جاهز لاي حاجة باش متدمرش واهم شي خلي ايمانك بربي كبير. كنت في الكوزينة نطيب ونغني الطبيعة هذي مبغاتش تتنحى مني لجين حاطتها قدامي في الكرسي تاعها وانا نطيب ونشطح وهي تاني تحرك في يديها مدايرين جو وحدنا غافلين على وش راح يصير. جا مجد بكري ليوم من الخدمة ومش من عوايدي الشي هذا لانو عندو ضغط كبير، دخل باس لجين وفات ليا حضني انا تاني حضنتو وكنت حاسة بلي حاب يحكيلي حاجة ومتردد نطقت انا لانو بثلتي محروقة منصبرش قولتلو ديراكت وش كان احكيلي _ البسي قشك نخرجو ليوم شوي _ وين نروحو منيش قاعدة نكمل لغدا وانت ياك ليوم مشغول بزاف وقولتلي بلي مطول كيفاه حتى روحت بكري _ كملت الخدمة وجيتك توحشت مرتي وبنتي عندك مشكل _ لامعنديش مشكل بصح فاجأتني ماشي من عوايدك ومتأكدة بلي صايرة حاجة احكيلي ذوك خير مانبدا نتقلق، فات طفى على لغدا وقفل لغاز ودار ليا قالي البسي حجابك في طريق نحكيلك _ منتحركش منا حتى تحكيلي كلش _ يماك _ شبيييها انطق _ تعبت شوي وداوها لسبيطار _ وشنووووو _ متتخلعيش مكان والو تعبت شوي برك _ وكتاه داوها ووعلاش معيطوليش _ مبغاوش يخلعوك ومكان والو هيا ذوك نروحو _ ايه ايه هيا ازرب _ البسي حجابك اسع _ خلاص فهمت. طلعت نجري فالدروج طيارة لبست حجابي ولحت لخيمار هكاك وهبطت لقيتو ركب في اللوطو وحاط لجين من لور لمزية جابها انا نسيتها خلاص من لخلعة هذيك نسيت كلش كل الي هامني هو انو نلحق لعند ماما ونشوفها ونطمن عليها مع انو قلبي حاسسني بلي مهيش بخير وديما تحاول تخبي علينا باش منفيقوش بيها بصح من وجها باين بلي مهمومة وتعبانة وديما تخمم وحتى من خرجاتها قلو بزاف رجعت تتعب بالخف ورنيم قالتلي بلي تظل تتعارك مع بابا وبلي صاحبتها مزالها عندنا في دار وكي سقسيت ماما وش راهي دير هاجر عندنا (صاحبة ماما) عيطت عليا ومخلات ماقالتلي وش دخلك وتقعد وتجي وقت ماحبت وواحد مايدخل كيفكم كيف باباكم تعسو فيها وش دارتلكم المخلوقة عاقلة وشادة سابعها وهي صح صاحبتها عاقلة ومام عقليتها تهبل بصح قعدتها عندنا مهيش مريحتني وعلبالي من وراها مشاكل.
#فريال