قدر مراهقة 2

الجزء 43

#قدر_مراهقة2
#ميرال_مجد
#بقلم_فريال
الجزء43
لحقنا لسبيطار لقيت وائل وخليل وبابا وهاجر اسيل واسراء كامل في شومبرة تاعها طليت عليها لقيتهم مركبينلها سيروم ومدايرينلها الاكسجين ليزاباري لاصقين جيهة قلبها وجها صفر في حالة قطرة دم متسعاهاش مسكينة كانت ساكتة غير تشوف فيهم قربت لعندها حضنتها مبغيتش نبكي باش منيزدش عليها اكتفيت بالحضن فرات خير مانقلقها وجوهم ميتفسروش وبالاخص بابا كحال وجهو وكل دقيقة يتخنزر في ماما ويعاود يقلب عينيه فهمتها بلي صرات حاجة عليها لحقت ماما هنا لانو هي صح مريضة بقلبها بصح كانت تتعالج وحالتها مستقرة طيح غير اذا قلقوها برك. قالنا طبيب بلي حالتها متعجبش ولازم تبقى في سبيطار حبيت نقعد معاها مخلاتنيش قالتلي اقعدي في دارك وقومي ببنتك وراجلك ونوصيك يابنتي شدي في راجلك راهو يحبك متفرطيش فيه وبنتك راهي صغيرة متضيعيهاش قومي بيها باش كي تكبر تردلك خيرك مهما يصرا معاك عمرك ترمي بنتك كبدتك _ مستحيل نزيد نبعد عليها متخافيش ياماما انت ارتاحي برك وكلش ساهل تخرجي منا وكلش يتسڨم _ ان شاء الله يارب. جبنا يامات نروحو ونجو لعندها وهي حالتها تمشي وتدهور مكان حتى نتيجة فات شهر بالضبط فهذاك شهر رنيم ولدت جابت طفل وماما خرجناها من سبيطار وبابا رجع يهتم بيها رجعلها الدار سبيطار درنا العقيقة لولد وائل وطهرلو تاني ماما كانت بزاف فرحانة بيه مجد كان واقف معايا تاع صح وقفة رجال يديني صباح لعند ماما وفليل يروحني ومرات نقعد نبات ماشكا ماحاسبني بالعكس ديما يسقسي على ماما ومتهم بيها، كنا في اواخر لعام ولتم بدات تنتاشر كورونا في العالم هي صح مدخلتش لبلادنا بصح لعالم نضر منها وكانو خايفين تلحقهم وتقضي عليهم. ليوم ماما عيطتلنا لمتنا كامل انا وخاوتي الكل وهاجر طول هذيك الفترة وهي في دارنا ماما جابتها تعيش معاهم والي فهمتو من توتويت تاعهم بلي هي راهي حاصلة في مشاكل كبار وخايفة ترجع لدارها ويقتلوها مفهمتش السبب ومحبيتش نفهم كل الي هامني ماما حبيبتي ترتاح برك وبعدها كلش ساهل. لمتنا كامل وبدات توصي فينا هي موالفة توصينا عليها مدرنا والو في بالنا قالتلنا مهما يصرا بيناتكم خليكم ديما واقفين مع بعض ومتتفارقوش وباباكم يبقى باباكم طول عمرو مهما يدير ولا يقرر راح يبقى باباكم وديما يحوس على مصلحتكم ونتوما تحتارموه بالسيف عليكم يدير وش يدير تحتارموه هو عمرو غلط ولا راح يغلط انا واثقة فيه وفي قراراتو خليكم مساندينو ومتخلو حتى حد يدخل بيناتكم وفرقكم نحبكم ديما متلايمين تسقسو على بعض ماشي غير في المناسبات كل سمانة تلمو اخرجو مع بعض ولادكم ربيوهم على اساس خاوة ومتفرقوش بيناتهم حافظو على دياركم ومدمروهمش.
#فريال