رهينة الماضي

مشهد ..

كاعدة بين الگزاز المكسر وهوسة الاغراض المطشرة ..عيوني مغوشه من الدموع وماحسيت برجلي تنزف لحد مالمحت الدم يسيل بالكاع ..

تقدم بكل هدوء شالني اخذني للحمام وفتح المي على رجلي .. كعد يطلع بالگزاز على كيفه وضمدها ولفها بشاش ورجعني للصالة

- عوفني عاد تعبتني والله .. ليش تصير انت والدنيا علية
تجاهلني ولا عبالك احجي .. رفع رجلية على التخم وراح للمطبخ ورا شوية رجع وبايده كوب مي وحباية معرفتها شنو  ..

طلع الحباية ومد ايده الي
- اخذي شربيها ..
- هاي شنو .. ماريد مااشرب شي
نزل لمستوى وجهي وباوعلي بنظرة حيرتني .. خفت من الحباية لان مجانت بشريطها وبعد الي صار كمت كلشي اتوقع منه ..

- من كل عقلج تعتقدين اني اسوي هيج؟
- لعد هاي شنو ؟

طلع الشريط من جيبه وشمره بحضني وحط الكوب على الطاولة وكام ..
- منا ماكو طلعة لو تفلشين البيت كله ميهمني .. بعد هذا التعب كله لكيتج عبالج اعوفج بهالسهولة ؟ تحلمين

ردت احجي بس سكتني
- اشش ولا حرف .. يومين وارجع وكتها يكون عقلج رجعلج ونتفاهم ..

اخذ جنطته وطلع ..
بقيت اني بسجني لا اكدر ابجي ولا اكدر اصرخ اطلع الوجع البداخلي..

                                  ................

مرحباً يا حلوين 🙈
ادري غايبة صار هواية بس حياتي جانت مخربطة اخر فترة وبالي ابد مو صافي .. ان شاءالله راجعة وانتظر دعمكم وحبكم 🫶🏻💋