အိုမီဂါအဖြစ် မွေးဖွားလာပြီးနောက် အားလုံးက ငါ့ကိုလိုချင်နေကြတယ်

Chapter 1

Chapter 1

ရေချိုးခန်းမှန်အရှေ့တွင် မတ်တပ်ရပ်ကာ သူ၏ပုံရိပ်ကို မိနစ်အနည်းငယ်ကြာအထိမှင်သေသေဖြင့်ကြည့်နေပြီးမှ ဖုယွမ်ကျိုးတစ်ယောက် သူအသက်ဆယ့်ခုနစ်နှစ်အရွယ်သို့ပြန်ရောက်နေသည်မှာ အမှန်ပင်ဖြစ်ကြောင်း အတည်ပြုလိုက်၏။

မှန်ထဲမှကောင်လေးသည်ကား ငယ်ရွယ်ပျိုမျစ် ကြည့်ကောင်းနေဆဲပင်။ မျက်နှာအသွင်အပြင်မှာ သူနှင့်တထေရာတည်းဖြစ်နေသည့်တိုင် လက်ရှိကောင်လေးကမူ ငယ်ရွယ်ကာ တက်ကြွမှုတို့ဖြင့် ပြည့်နေပါ၏။ သူ၏ လက်ရှိစိတ်အခြေအနေကြောင့် ဝမ်းနည်းနေပုံရသော်ငြား လှပသည့်မျက်လုံးများက အသက်ဝင်၍နေသည်။

ဖုယွမ်ကျိုး မှန်ထဲမှ သူ့ကိုယ်သူပြန်ကြည့်ရင်း အနည်းငယ် ချဥ်တူးသည့် ခံစားချက်ကို ရလိုက်ကာ မထိန်းနိုင်ပဲ ငိုကြွေးမိလေတော့သည်။

ယခုအချိန်များအတွင်း သူမှန်ကြည့်ဖို့ရာ မုန်းတီလာခဲ့သည်။ မှန်ထဲမှ သူ့မျက်နှာကိုကြည့်လိုက်သည့်အခါတိုင်း လူသားမဆန်သော တစ္ဆေတစ်ကောင်ကို မြင်လိုက်ရသည့်အတိုင်းပင်။ မျက်တွင်းဟောက်ပက်ဖြင့် အသက်မဲ့နေသည့်လူတစ်ဦးကိုသာ အမြဲမြင်တွေ့ခဲ့ရ၏။

သို့သော်လည်း ယခုအခြေအနေအားလုံးက သူကိုယ်တိုင်ဖန်တီးထားခဲ့သည့်အရာများပင်။ သူသည်ကား ထိုလူကို တမ်းတမ်းစွဲဖြစ်ခဲ့မိသည်။ သူ့ကိုယ်သူဖျက်ဆီးခဲ့မိရုံမက သူ့အမေကိုပါနှလုံးရောဂါရစေခဲ့သည်။ အဖေဖြစ်သူကမူ သတိလွတ်သွား၍ ကားမောင်းနေရင်း မတော်တဆမှုဖြစ်ခဲ့ရသည်။ သူ့ သူငယ်ချင်းများကလည်း သူနှင့်အဆက်အသွယ်ဖြတ်သွားခဲ့သည်။

သူ့ကိုယ်သူပင် သတိမထားမိလိုက်ပဲ ဖုယွမ်ကျိုးမှာ သတိရချင်စရာမကောင်းသောအတိတ်များကြားတွင် ပျောက်ဆုံးသွားရပြန်သည်။ သူ၏စိတ်ထဲတွင်ထင်ဟပ်လာခဲ့သည်က အမေဖြစ်သူလဲကျသွားသောပုံရိပ်ဖြစ်၏။ အဖေဖြစ်သူက အရေးပေါ်ခန်းထဲတွင်လဲနေပြီး ထိုသူ၏မျက်လုံးများက အေးစက်ကာစိတ်ပျက်မှုများအပြည့်။

ဖုယွမ်ကျိုး၏နှလုံးက ပေါက်ထွက်လုနီးနီးခုန်လှုပ်လာပြီး ရုတ်တရက် အသိပြန်ဝင်လာခဲ့သည်။ ထို့နောက် ဖြူဖတ်ဖြူလျော်ဖြစ်နေပြီး နောင်တနှင့်အကြောက်တရားများအား လှစ်ဟပြထားသည့် မှန်ထဲမှသူကိုယ်တိုင်ဖြင့် ဆုံလိုက်ရသည်။