قدر مراهقة 2

الجزء 45

#قدر_مراهقة2
#ميرال_مجد
#بقلم_فريال
الجزء 45
كي سمعت كلام رنيم يدي بدات ترجف من صدمة ماقدرتش نستوعب كأنو راني في فراغ كبير مانسمع مانشوف ماوالو يدي شادة تليفون تقول راح يهرب مزيرة عليه وعينيا مركزين على نقطة وحدة في الحيط فمي بقا محلول كنت حاننطق نقولها من نيتك راكي تحكي صح؟ ماما راحت صح؟ ماتت صاي مابقيتش نشوفها؟ مابقيتش نسمع صوتها؟ نحكي معاها نتمسخر نضحك نرقد في حضنها تسبني وتعاتبني زي قبل تسقسي عليا تسهر معايا كي نمرض صاي مبقاتش فهاذ العالم راحت نهائيا؟ ياك كانت لباس وهي قالتلنا روحو تروحو راني بخير كيفاه حتى راحت بلا ماتشوفنا؟، كي نقول كلمة ماما يعني الحياة السعادة الفرح الاهتمام يغيبو صحاباتي خاوتي  ناس كامل ومتغيبش ماما بالنسبة ليا العالم كامل تعوضني على كلش على صحابات الخاوة الاب كلش كلش، نهار تضيق بيا دنيا نروح ليها ندخل في حضنها ننسى كلش ونرتاح نهار نمرض هي تسهر معايا نهار نبكي هي تمسحلي دموعي نهار نتقلق هي تسقسي على حوالي تحوس تحلي مشاكلي تفرحني تنحي عليا لغمة، شكون بيا ذوك شكون راح يحضني شكون. هذو كامل كنت حابة نقولهم بصح لساني تربط مابقيتش قادرة نحكي تقول تعڨنت اصلا كلام رنيم جا على غفلة زي الصاعقة هدم كلش وحطمني وخلاني نلوم روحي علاه روحت لداري علاه مابقيتش معاها علاه سمعت كلامها علاه علاه علاه علاه علاه علاه علاه، بقيت نعاتب روحي وهذا كامل بلا مانحكي ولا يخرج صوتي كنت في صراع بين نفسي ناضت حرب داخل مخي نلوم في روحي وحابة ننطق ونقول لمجد اديني لماما راهي راحت اديني نشوفها بلاك راهم يكذبو وتكون كاميرا كاشي اديني لدارنا ذوك منيش قادرة نحمل قلبي راح يطرطق. مجد كي شافني واقفة في بلاصتي بلا حتى حركة تخلع عليا وكي شغل فهم ومفهمش جا نحالي تليفون من يدي وحكا مع رنيم مسمعتش وش قالتلو بصح نظرتو كانت كفيلة انو تفهمني كلش تبدلو ملامحو للحزن وديراكت حضني قالي ان لله وانا اليه راجعون هم السابقون ونحن اللاحقون ربي يرحمها ويغفرلها ويجعل مثواها الجنة ويصبركم على فراقها، انا ماحكيت مابكيت والو بقيت جامدة بين يديه مفقتش كيفاه لبسني ولا كيفاه هبطني للتحت ولا كيفاه لحقنا طريق كامل وانا مش واعية شبه دايخة كنت في عالمي وحدي عالم خاص بيا انا ومخي نعاتب ونحلل ونفسر ونطلع ونهبط التخمام قتلني قاعدة نتخيل في كلش بلاك ماما دخلت لسبيطار برك ورنيم مفهمتش ولا تكون مريضة ولا عبد خلاف مات ماشي هي طلعت وهبطت حتى لحقنا لدار.
#فريال