قدر مراهقة 2

الجزء 46

#قدر_مراهقة2
#ميرال_مجد
#بقلم_فريال
الجزء 46
كان لغاشي عرام قدام دارنا بزاف طوموبيلات عرفتهم اكييد هذو تاع خوالي وخالاتي خاوتي عماماتي عمومي كامل جاو بالزربة مام اهل مجد وجاو انا ماهمني حتى واحد كلي الي كنت حاباتو هو اني نشوف ماما نبوسها نعنقها فتحت لباب وهبطت نجري دخلت لدارنا نحوس على ماما نستناها وكتاه تجي تسلم عليا وتستقبلني كيما موالفة بصح مصراش وش كنت حابة مالقيتش ماما لقيت ناس بزاف غاشي كبير كامل جاو بصح ماما مكانتش في اللحظة هذيك تسرح لساني ونضت نعيط على ماما بأعلى صوتي ماما ويييينك راني جيت وييييييييينك توحشتك هاني زدت جيت نطل عليك مقدرتش نبعد عليك، نعيط وندور في الديار نفتح في البيبان الشومبرة الي ندخلها مانلقاش فيها ماما درت درت ونعيط نعيط مكانش صاي ماما راحت مالقيتهاش جاو عندي خالاتي نسا عمومي سلافاتي نسا سلافي عجوزتي بنات خالاتي بغاو يحكو معايا انا نبعد وندور مابغيتش نسمعلهم ندور وندور حتى شفت رنيم روحت نجري ليها قولتلها وينهي ماما ياك خليتها هنا في دار وين خبيتوها وريهالي ياك كانت لباس مافاتوش سوايع بزاف مليح خليتها وينهي انطقييييي ماتسكتيش انطقييييي _ ميرال ماماك ربي يرحمها _ ماتقوليش ربي يرحمها ماتقوليش هكا ماما لباس عليها راهي بخير متكذبيش عليا بلعي وينهي وين خبيتوها علبالي راكم تخلعو فيا برك _ راهي لفوق في شومبرتها روحي ليها شوفيها قبل مايدوها يغسلوها. مخليتهاش تكمل كلامها وطلعت نجري فالدروج هذوك نمشي ونطيح وهي مورايا تعيط عليا انا مبغيتش نسمعلها كل الي في بالي هو ماما لازم نشوفها ونحضنها علبالي راهم يكذبو عليا هي بخير. لحقت لشومبرتها لقيتها محلولة دخلت لقيت اسيل وريتال محضنينها وقدامهم خليل وائل يبكيو وبابا كان في كوانة واقف وعينيه مدمعين مام هاجر كانت قاعدة تبكي وتحضن في ريتال الي قتلت روحها بلبكا. انا كي شفتها راقدة فوق سرير ومغطينها يبان غير راسها فرحت قولت باين راهي راقدة وهذو لمهابل حاطينها ميتة ميعرفو والو من ديما اغبياء ميفهموش، وائل كي شافني هو وخليل وقفو جاو يحضنوني دزيتهم وفت لماما طلعت فوق سريرها وحطيت يدي على وجها نقيس فيها لقيتها باردة بستها على خدها وبقيت نعيط نقولها نوضي يا ماما هاني جيت نشوفك نوضي توحشتك صح صباح كنت معاك بصح تحوشتك نوضي راني جيت مترقديش بزاف ياك كنتي تقوليلنا رقاد في نهار مش مليح هيا نوضي ياحبيبتي توحشتك حابة نحكي معاك ياك كنتي توصيني نتسڨم ونشد داري هاني بديت نتسڨم نوضي يا حبوبتي نوضي ماتخلعينيش عليك .
#فريال