قدر مراهقة 2

الجزء 49

#قدر_مراهقة2
#ميرال_مجد
#بقلم_فريال
الجزء 49
شفت ماما بستها وحضنتها لاخر مرة ماعيطت ماندبت ماقعطت شعري بكيت بكاء الرحمة عليها خاوتي حضنهم بابا كامل تلمو عليه وهو طايح فلرض روحت لعندو دخلت لحضنو انا تاني بقالي غير هو لازم نتمسك بيه علبالي مش راح يكون كيما ماما بصح المهم بابا يبقى واقف في ظهري وميبعدش عليا اصلا منخليهش يروح وللاسف انا الي رحت وبعدت عليه وفوقها كرهتو. هزو ماما يدفنوها وداو فرحتنا معاها هي خرجت من لباب وعمتي ام هند ناضت تزغرت كي سقساوها النسا علاه دارت هكاك قالتلهم تهنيت منها وجها وجه الشر ماربحش خويا عليها من غدوا نروح نخطبلو ونزوجو وهي تروح لقبرها تتحرق فيه ان شاء الله، مع كملت كلامها وتتلاح عليها خالتي فتتها هي تضرب وانا وخواتاتي نبكيو شي من الوجع وشي من كلامها الي يذبح ويجرح لدرجة هذي انعادمت الانسانية عندها ماتقظرش تحتارم الميت وفوقها تهدر فيه انا ماما ملي نشفى عليها جامي قاستها ولا قاست واحد غيرهم وناس كامل تشهد بهاذ الشي طول عمرها تقيمهم وتحتارمهم تتقاس ومتقيسش بصح هوما من ديما نكارين الخير يحبو الي يهينهم، كي شافو خالتي تضرب هكاك جاو عماماتي يفكو زعما ووحدة فيهم عطات لخالتي ضربة لرقبتها طيحتها فلرض انا شفتها بعيني كي ضربتها وناضت لوخرا جات تكمل عليها وقفتلهم جداتي ام بابا في نص قالتلهم عيب عليكم مرت خوكم جهدها تدفنت ونتوما تتعاركو احشمو شوي قالتلها جداني تاع ماما حنا خاطيين شوفي بنتك وش دارت نطقت ام هند قالتلها راني في دار خويا ندير وش نحب والي مش عاجبو الحال يقود برا قالتلها جداتي راني في دار بنتي _ بنتك ماتت ومن غدوا نجيب مرا جديدة لخويا وانتوما ماتزيدوش تجيو هنا ماعندكم ماديرو _ راكي تحاوزي فينا _ قودو برا راني نحاوز فيكم ماقولنا نتهناو من بنتكم _ ربي يهديك هذا مانقول وندمت على نهار الي نويت نديك لولدي لمزية تهنى منك ومداكش وحدة حقودية كيفك متليقش بيه _ ولدك اندبي بيه اصلا ميشرفنيش نديه وكي غير بطل عليا ولوكان غير رشيد دار عليا ومداش بنتك وخلاها كي لكلبة. هوما يتعاركو كلمة بكلمة وانا نخمم كيفاه نريب دار على ريوسهم ماما جهدها ماتت ولالة تسب وتعاير وتزغرت والله ماتروحلها راني نلملها فيهم نهار نعطيها ضربة ندمرها الشارفة الخانزة. كي كثرو لحس هكاك عمتي بدات دز في خالاتي وجداتي وتحاوز فيهم روحت ليها دزيتها قولتلها اذا كاين واحد راح يخرج من دار هذي فهو انت الي متحتارمي لاكبير لاصغير لاميت لاحي برا من دار بابا ميشرفنيش نشوفك ولا نقول عليك عمتي من ديما حاقدة على ماما وتغيري منها وكي غير مداكش خالي يارخيسة _ مهيش دارك حتى تحاوزيني منها راني في دار خويا _ دار بابا وذوك تقودي منا ولا نبهدلك هيا قودي حلوفة وصلت بيك الوقاحة تزغرتي وتفرحي كي ماما ماتت بصح متخافيش ان الله يمهل ولا يهمل جاي نهارك.
#فريال