قدر مراهقة 2

الجزء 50

#قدر_مراهقة2
#ميرال_مجد
#بقلم_فريال
الجزء 50
بقيت انا وياها كلمة بكلمة مكنتش بخير بصح عيت نسكت على وش دارت اهانت ماما بزاف وفوقها حاوزت عايلتها من ضغط بزاف وليت نفيبري وحدي ولوكان مش عيب راني ضربتها قتلتها. نطقت اسيل وقالتلي ميرال خلاص خليها تروح تقود ماتكسريش راسك بيها خليها هنا في دار ماما من ديما تقولنا عاملو ناس كامل بطيبة وحتى وغلطو معاكم عمركم تقيسوهم ولا تحاوزوهم خليها برك _ ايه راني قاعدة في دار خويا وكي يجي نوريلكم لعب كيفاه لوكان مانخليش دار هذي تحرم عليكم منيش مرا، وصح صرا وش كانت تقول ودار بابانا حرمت علينا وكرهناها في جرتهم. لغاشي بزاف داخل كثر من الخارج ديار تعباو ناس كامل جاو يغزيو فينا انا وخواتاتي شدينا كوانة وقعدنا نبكيو ريتال مسكينة من لبكا بزاف رقدت في حجر اسيل ولادنا سمحنا فيهم لوكان مش اسراء ورنيم عسوهم راهم ضاعو مساكن يوم كامل مرمدين. فليل كي او يعشيو في الغاشي كثر خير نسا عمومي وخوالي هوما قامو بكلش اما عماماتي محركوش كاس غير قاعدين مع لول ساكتين من بعد كي تدفنت ماما وقابلتهم ام هند صاي تحلو فلعريض وبداو يشايخو ويضحكو تقول ماخرج من عندهم ميت قلوبهم باردة لدرجة كبيرة. كي تفرق شوي الغاشي دخل بابا لقاهم يتضاحكو عيط عليهم قالهم الي عينو في ضحك يروح لدارو مايجيش يديرلي السرك هنا فداري وولادي حزنانين على يماهم الي غير ليوم وين تدفنت تحت تراب الي فيهم يكفيهم متزيدوش عليهم، هنا عمتي ام هند ناضت دمع وتتسيتت قالتلو قبيل حاوزونا نسابك وبنتك وذوك انت والي قال الراجل يتبع نسابو ومرتو وينسى خواتاتو مغلطش ايييه ياولد يما كبرت ورجعت تحاوز فينا من دارك على جال البرانية _ محاوزتك على حال حتى واحد انت الي راكي تخلطي وتضحكي تقول راكي في عرس مش وفاة _ واذا وفاة ياك دفنتوها صاي تهنيتو منها وانت تبقى يوم يومين وتنساها وتجيب غيرها مراحش توقف دنيا عندها _ بلعي فمك راكي بديتي تخلطي انا سلمى مننساهاش يالوكان يفوتو سنين لانو كانت سندي ونصفي الثاني وقفت معايا في كل محايني لقيتها هي خير منكم _ ايه زيد زيد من ديما تحبها كثر منا ومقيمها حتى طلعت فوق راسك هي وماليها ورجعو يحاوزو فينا من دارك شتي ايما ولدك العزيز الغالي كيفاه راهو يحاوز فينا على جال الكلبة تاع مرتو، ماجات تكملها ويتخبط فيها كف من عند بابا قالها برا عليا الدار دار سلمى وانا نقرر شكون يقعد وشكون يروح والي ميحبهاش ميدخلش دارها هيا قودي عليا من ديما حاقدة وقلبك كحل ماتت لمرا ومزالك عڨابها كلبة. اشفى عليها مليح مليح ياوليد يما يجي نهار ماتلقاني غير انا ومرتك الي راك دافع عليها ماتت ومن غدوا تتزوج وتنساها ولوخرا تولي في خبر كان ومنقعدلك غير انا ختك من لحمك ودمك _ اخرجي برك عليا وين ماتروحي ديري المشاكل.
#فريال