အပိုင်း 31 (Final)
ဘုရားပန်းအိုးတွေထဲမှာရှိတဲ့ ဝေဆာနေသော အောင်သပြေငုတ်တွေက ကျက်သရေရှိစွာ လှပလို့နေလေသည်။
ဘုရားရှေ့မှာ ပန်းကန်ပြားနဲ့လှူထားတဲ့ စံပယ်ပန်းတွေရဲ့ ရနံ့နဲ့ စိန်တလုံးသရက်သီးတွေရဲ့ ရနံ့ကလည်း သင်းပျံ့လို့နေသည်။
ဘုရားခန်းထဲက မေမေ့ရဲ့ ဘုရားရှိခိုးသံ။
မေမေ့ဘုရားရှိခိုးသံကို ဧည့်ခန်းထဲကနေ မင်းငယ်တို့ကြားနေရသည်။
မေမေ့ရဲ့ဘုရားရှိခိုးသံက ကြည်လင်အေးမြနေသည်။
"၃၁ဘုံကျင်လည်ကြကုန်သော လူ၊နတ်၊ဗြဟ္မာ သတ္တဝါအားလုံး ကျန်းမာကြပါစေ ၊
ချမ်းသာကြပါစေ၊ဘေးရန်ခပ်သိမ်းငြိမ်းကြပါစေ၊
ဆင်းရဲခပ်သိမ်းငြိမ်းကြပါစေ၊
ဒေါသခပ်သိမ်း ငြိမ်းကြပါစေ၊
နှလုံးစိတ်ဝမ်း အေးချမ်းကြပါစေ"
"တပည့်တော်မရဲ့သမီးလေးတွေ ...သုံးပါးသောကပ်၊ လေးရပ်သော အပါယ်၊ ရှစ်သွယ်သော ရပ်ငှာန၊ ငါးပါးသောရန်သူ၊ မကြည်ဖြူသော သူယုတ်မာတို့နဲ့ တစ်ရံတစ်ခါမျှ မတွေ့ကြုံပါရစေနဲ့ အရှင်ဘုရား"
မေမေ့ရဲ့ဆုတောင်းသံ။
ထိုဆုတောင်းသံမှာ မင်းငယ်တို့အပေါ်ထားတဲ့ မေတ္တာတွေပါနေသည်။
မေမေရဲ့မေတ္တာဟာ မင်းငယ်တို့အား ရေလိုအေးမြစေသည်။ပန်းလိုမွှေးစေသည်။
မေမေနဲ့ဖေဖေဆုတောင်းတိုင်း ထိုကဲ့သို့သာ ဆုတောင်းလေ့ရှိသည်။
ဖေဖေ...ဖေဖေ့ကို မင်းငယ်သတိရမိသည်။
မင်းငယ် အခုလို မမနွေနဲ့ လက်ထပ်ပြီးတာကအစ မင်းငယ်ရဲ့ အရာရာကို ဖေဖေ့ကိုသိစေချင်သည်။
ဖေဖေသာသိရင် ဘယ်လောက်တောင်ပျော်နေလိမ့်မလဲ။
"ရှာလည်းမတွေ့၊ကြာလည်းမမေ့၊ငါလည်းတစ်နေ့"ဆိုသည့်အတိုင်း ဖေဖေဟာ မင်းငယ်အတွက် ဘယ်တော့မှ မေ့လို့မရမယ့်ချစ်ရသူပင်။
မင်းငယ်နှလုံးသားထဲမှာ ဖေဖေ့ကိုချစ်တဲ့စိတ်တွေထာဝရရှင်သန်လို့နေသည်။
မေမေက ဘုရားရှိခိုးပြီးနောက် မင်းငယ်နဲ့မမနွေအနားကို ရောက်လို့လာသည်။
ပခုံးပေါ်တင်ထားတဲ့ ချည်တဘက်လေးကို မေမေက ထိုင်ခုံပေါ်ကိုတင်လိုက်သည်။
"သမီးတို့ ခရီးသွားမှာကို မအိပ်ကြသေးဘူးလား"
"သမီးတို့မအိပ်ချင်သေးလို့ပါမေကြိုင်...စောနာကမှ သပြေခင်းထဲ လမ်းလျှောက်ပြီး လေညှင်းခံလာကြတာ"
YOU ARE READING
နွေလမင်းရဲ့ ချစ်ခြင်းပင်လယ်(Completed)
Romanceမမအနားမှာ ရှိနေရတာ သိပ်အေးချမ်းတာပဲ။မမဆူတာလေးကလည်းချစ်စရာလေး။
