အခန်း ၄၂၄ ။ ကန့်လန့်ကာနောက်ကွယ်မှလူ
လူပုံသဏ္ဌာန်ရာချီက သူတို့နားစုဝေးလာပြီး တစ်ယောက်ချင်းစီက တူညီတဲ့မျက်နှာနဲ့ - ကူယွဲ့နဲ့ တစ်ပုံစံတည်းတူတဲ့ မျက်နှာတစ်ခု။
"ဘာလို့အကြီးအကဲကူယွဲ့လဲ..." ယွီဟုန်လည်း ဇဝေဇဝါဖြစ်သွားတယ်။ အဲပုံသဏ္ဌာန်တွေအားလုံးက ကြည့်ရတာ အတူတူဖြစ်ပုံပဲ။ သူတို့အားလုံးကတော့ ကူယွဲ့ရဲ့ မွေးချင်းတွေ မဖြစ်နိုင်ဘူးမလား။
"သူတို့က ဖေဖေနျို့အချက်အလက်ကို ပုံတူပွားထားတာ" ရှန်းရင်အမူအရာက မှောင်မည်းနေကာ သူမပတ်လည်က ပုံသဏ္ဌာန်တွေကို တစ်ယောက်ချင်း လေ့လာပြီး ခပ်တိုးတိုးပြောလိုက်တယ်။
"ဒီလူတွေ တစ်ယောက်မှ အစစ်မဟုတ်ဘူး"
အုပ်စုက ထိတ်လန့်မှုကိုကျော်လွှားနိုင်သွားတာနဲ့ သူတို့ တုံ့ပြန်နိုင်လာတယ်။ နောက်တစ်ကြိမ်မှာတော့ သူတို့ပတ်လည်က ပုံပန်းသဏ္ဌာန်တွေကို တိုက်ခိုက်ကြတော့တယ်။ အခု သူတို့ ဒီသဏ္ဌာန်တွေကို သေချာမြင်ရပြီဆိုတော့ သေချာပြန်တွန်းလှန်နိုင်ပြီ။ သူတို့ရဲ့ မတူညီတဲ့သိုင်းတွေကနေ ကွဲပြားတဲ့ အလင်းရောင်တွေက နောက်တစ်ကြိမ် ကောင်းကင်မှာပြည့်သွားပြန်တယ်။
ဖေဖေနျို ရာချီက သူတို့ဆီ တစ်ရှိန်ထိုးပြေးဝင်လာပြီး အုပ်စုနဲ့အပြင်းအထန် တိုက်ခိုက်ကြတော့တယ်။ အင်မတန် မြန်ဆန်စွယပဲ အုပ်စုသိလိုက်ရတာက ပုံသဏ္ဌာန်တွေက အပြင်ပိုင်းတင် ကူယွဲ့နဲ့ တူတာမဟုတ် - သူတို့ကျင့်ကြံဆင့်နဲ့ စွမ်းရည်တွေကပါ ကူယွဲ့နဲ့တစ်ထပ်တည်း ဆိုတာကိုပဲ။
တခြားနည်းနဲ့ပြောရရင် သူတို့ရင်ဆိုင်နေရတဲ့ ပုံသဏ္ဌာန်ရာချီက ဧကရာဇ်ငယ်ကျင့်ကြံဆင့်ရှိတဲ့ ဓားကျင့်ကြံသူတွေ။ သူတို့ ဒါကိုနားလည်သွားတာနဲ့ ချွေးစေးပြန်သွားတယ်။ တစ်ယောက်ချင်းစီက အဇဋာဧကရာဇ်ဆိုပေမဲ့ ဒီလောက်များတဲ့ ဧကရာဇ်ငယ်တွေကို တိုက်ခိုက်ရတာက အဇဋာဧကရာဇ်တစ်ယောက်ချင်းစီက ဧကရာဇ်ငယ်ဆယ်ယောက်နဲ့ ယှဉ်ပြိုင်ဖို့လိုတာပဲ။ သဘာဝအရ ဒါတွေက သူတို့ခွန်အားအပေါ် ထိခိုက်မှုဖြစ်စေတာပေါ့။ ပြီးတော့ ဧကရာဇ်ငယ်တွေက ဓားကျင့်ကြံသူတွေ။ အုပ်စုက အစပိုင်း အသာစီးရနေတယ်ခံစားရပေမဲ့ မြန်ဆန်စွာပဲ စတင်ရှုံးနိမ့်မှုကို ခံစားရလာတယ်။
