دخلت ملاك الصالة ومشت للدرج وهي مبتسمة بهدوء
وسرعان ما صرخت تناظر الدم اللي سايح من الدرج
رفعت راسها تناظر لاما اللي طايحه على الدرج الثاني وصرخت تركض لها وجلست عندها تنزع شالتها تشوف وين مكان الدم و جمدت ملامحها تناظر راسها وقفت وهي تهز راسها بالنفي و سرعان ما نزلت الدرج تركض متناسية حملها تركض للحديقة~
ناظروها من ركضت تعقد حجاجها نجلاء من دموعها
ونطقت ملاك تناظر فزاع:ل ل لاما لاما
توسعت عيونه وفز يركض للداخل يركض معه رائد وفهد،دخل فزاع و جمدت ملامحه من الدم اللي على الأرض ورفع راسه للدرج الثاني وبلع ريقه يرتجف بخوف عليها وطلع الدرج يركض يجلس عندها وجمدت ملامحه يناظر الدم اللي مغرق وجهها
صرخ برائد اللي كان بيطلع للدرج:راحت راحت راحت شغل السيارة شغلهاا
صرخ يحملها بين يدينه يناظر راسها يقطر دم تجمد ملامحه بخوف يتناسى شعرها اللي يتطاير خلفها،طلع من الفيلا يركب سيارة رائد اللي حرك مُسرع للمستشفى،
جمدت ملامحهم من ناظروا لاما بحضن فزاع بالمنظر ذا
وصرخت وريد توقف تناظر سعود اللي ركض للسياره:بروح معك بشوفها بشوفها ما بتركها
نطق غيث بصراخ يركض للسيارة:شفيها بنيتي شفيها
بكت غند تناظر شكلها تجلس على الأرض تهمس بشحوب ملامحها:يما بنتي راحت راحت بنتي راحت
صرخت هالة من أغمى على غند ترفعها بمساعدة نجود للكنبه تجيب موية ترش على وجهها لجل تصحصح و
ركبوا السيارة تغادر سيارات آل جراح القصر~
_سيارة رائد_
ناظر فزاع رائد اللي يسوق بسرعه عالية ينطق بغصة
:رائد اسرع اسرع يا رائد بخسرها بخسرها
عقد حجاجه رائد يدق قلبه يناظر اخته بالمنظر ذا يزيد من سرعته يسوق بسرعه عالية جداً تطلع كفرات السيارة دخان نتيجة احتكاك كفرات السيارة بالشارع من سرعته،
نزل نظره فزاع ل لاما بحضنه يبلع ريقه يدق قلبه بقوة مب شايف ملامحها زين من الدم اللي مغرق وجهها هز راسه بالنفي يرفض فكرة خسارتها و رفع طرف التيشيرت حقه يمسح وجهها وسرعان ما رفعها لحضنه يضمها بقوة يهمس عنك اذنها بنبرة تميل للبكي من خوفه:أسف أسف لاما لا تتركيني وانتي زعلانة أسف
جعلني بالموت لو زعلتك ثاني مرا انتي قومي بس واوريك معاملتي معك قومي لاما
دفن راسه بحضنها يحاول يمسك دموعه من منظرها و سرعان ما فتح باب السيارة ينزل و لاما بحضنه من غير شاله يرمي عليها رائد شماغه ودخل فزاع يركض للمستشفى تركض الممرضة لهم بالسرير تسحبها للغرفة الخالية~
نزل سعود يناظر وريد اللي تمشي مُسرعه وصد عنها يركض لداخل المستشفى يوقف يلتفت يدورهم بعيونه
وسرعان ما نطقت وريد وهي تأشر:هناك
ركضوا و دخل سعود للغرفة بعد ما ناظر فزاع و رائد وفهد اللي على الباب،ركضت وريد خلفه و وقفت تناظر فزاع اللي وقف قدامها ينطق برجا:طمنيني حَرم اخوي
هزت راسها و دخلت الغرفة يتسكر الباب خلفها،دخلت وريد تناظر سعود واقف ولابس القلفزات وماسك الملقط اللي فيه شاش يمسح الدم عن وجهه لاما
ناظرها سعود ونطق:يودّ
هزت راسها ومدته لها تناظر وجهه لاما و لفت للجهة الثانية تبعد الممرضة بيدها تتفقد جسد لاما بخوف وناظرتها الممرضة ما تعجبها حركتها لكنها سكتت تلاحظ خوفهم،رفع راسه سعود يناظر وريد ينطق ينزع القلفزات:جرح ب أسفل راسها و خدوش بوجهها
هزت راسها وريد تتفقد لون وجهه لاما وميلت راسها تناظر لون وجهها تنطق تأشر على مناطق معينه بوجهها
:خلينا نسوي لها صورة للاحتياط
عقد حجاجه سعود ونطق يناظر وجه لاما:ليه ودك تعملي صورة؟
نطقت تفحص عيونها:وجهها اصفر،الحركة خفيفة والتنفس عليك عليه
ابتسم يناظرها ينطق بهدوء:وجهها أصفر من قلة التعذية لاحظي رجفة يدينها و الحركة ممتازة مافيها شي والتنفس بطيء بسبب الخوف
ناظرته وهز راسه ينطق يطمنها:مافيها شي صدقيني
هزت راسها تناظره وناظرت لاما اللي وجهها عليه لصقات جروح وراسها ملفوف بشاش تميل شفايفها بحزن
نطق سعود يناظرها:تفقدي جسدها بطلع اطمن فزاع وانادي دكتورة النساء
هزت راسها وطلع سعود لفزاع اللي كان واقف وماسك شعره بيده
نطق فهد بحدة يناظر فزاع:لو صار لها شي ما برحمك
ناظره فزاع وكمل فهد بحدة صوته:ما صنت الأمانة لها اسبوعين لوحدها ما تطلع لها ما برحمك فزاع
ناظره فزاع وتقدم له بغضب ورفع يده لكنه التفت من مسك يده سعود ينطق بحدة يناظرهم:بس انت وياه
نطق رائد اللي هادىء بشكل يخوف:طمنّا يعمي؟
ابتسم يناظره:مافيها الا العافية خدوش بسيطه بوجهها و جرح كبير أسفل راسها
تنهد فزاع براحه وكمل سعود يناظره:الطفل ما نعرف عن وضعه دكتورة النساء الحين بتجي لكن التغذية عندها سيئة يا فزاع
عض شفته بندم يشتم نفسه و ناظره رائد يمد يده لكتفه يربت عليه بهدوء
التفتت فزاع يناظر الدكتورة اللي دخلت مع وريد اللي كانت طالعه لكنها رجعت معها يدعي ما يصير لهم شي،
نطقت الدكتور تحرك السونار على بطن لاما:الحمدالله الجنين بخير لكن وزنه ابداً مب كويس يحتاج لها تتغذى كويس
هزت راسها وريد بتفهم تبلع ريقها بخوف تناظر لاما اللي رمشت بانزعاج و سرعان ما فتحت عيونها تمد يدها لراسها تنطق:وين انا؟
ناظرتها وريد تنطق تمسك يدها اللي تتحسس الشاش
:اهدي لاما اهدي
ناظرتها لاما برؤية ضبابيه و التفتت تناظر الدكتورة وعقدت حجاجها تنزل نظرها للسونار على بطنها تجمد ملامحها تنطق بخوف تحاوط بطنها تتذكر طيحتها:ولدي صار له شي؟
ابتسمت الدكتورة تطمنها تشيل يدها عن الجل اللي على بطنها:الحمدالله بخير لكن لازم تتغذين يا لاما
تنهدت لاما ترجع راسها للخلف تتذكر كل شي تبلع ريقها تدور بنظرها على فزاع لكنها ما شافته وغمضت عيونها تحبس دموعها تحس راسها بينفجر،ناظرتها وريد وتنهدت تخرج من الغرفة تناظر فزاع اللي تقدم لها ينطق بخوف:شلونها؟
ابتسمت تطمنه:ادخل وشوف
ناظرها يستصعب فكرة الدخول ونطق رائد من شاف تردده:بندخل اول
هزت راسها و دخل فهد و رائد للغرفة
ناظرتهم لاما تبلع ريقها لانه مب معهم وناظرت ابتسامة رائد من نطق:شلونك يعيوني؟
نطقت بتعب تغمض عيونها من وجع راسها:بخير الحمدالله
تنهد فهد يناظرها ومشى لها يجلس على طرف السرير
:تحسين بشي يوجعك؟انادي عمي سعود او حَرم عساف؟
ناظرتهم ونطقت تبكي تتاوه بألم من وجعها:راسي يوجعني فهد راسي
عقد حجاجه فهد وناظر سعود اللي دخل ونطق يوقف عندها يمسح على راسها:طبيعي يا عمي الطيحة قوية
بكت تغطي وجهها وناظرهم رائد يتنهد وزفر فهد بحدة وكان بيطلع لفزاع لكن مسك يده سعود ينطق بحدة يناظر عيونه:ماله دخل كان جالس معنا شفيك
تنهد فهد يمسح على وجهه ينطق بغضب مكبوت:لو ما اهملها ما صار ذا الشي من الأساس
شد على يده سعود: نصيبها،مردهم يرضون مالك شغل فيهم
تنهد فهد وناظرتهم لاما تنطق ببكا:خلاص خلاص وربي راسي بينفجر
تنهد رائد يطلع من الغرفة ما يتحمل يشوفها بذا المنظر و وقف يناظر حال فزاع اللي جالس ومنحني بظهره وماسك راسه بيدينه وتنهد يشعر بخوفه يمشي يجلس بجانبه يربت على كتفه:مافيها الا العافية لا تخاف
تنهد يمسح على وجهه وناظر رائد وجهه وعيونه باللون الاحمر دليل غضبه المكبوت وتنهد يوقف ينطق:اتركك معها وتفاهم معها فزاع لا ترجعون وانتم مب متراضيين
ما رد فزاع يناظر الفراغ قدامه بسرّحان كان بيخسر حبيبة فؤاده و طفله بسببه،ما بيسامح نفسه لو صار لهم شي ابداً
طلع فهد وسعود تبقى لاما لوحدها،ناظر فهد حال فزاع وتنهد يمشي يجلس على ركبه قدامه ينطق يثبت يدينه على ركبه:حقك علي،قوم الحين تطمن عليها و راضيها لا ترجع و لاما خاطرها متكدر لان نفسيتها بالحضيض تركناها داخل وهي تبكي
ناظره من نطق"تبكي" يبلع ريقه بهدوء و وقف يتجاهل الجميع يدخل للغرفة وهو يمسح على وجهه،
نطق سعود يدخل وريد اللي تو وقفت لأنها صرفت ل لاما الادوية تحت ذراعه:يلا كل واحد يرجع زوجها عندها
تنهد رائد وكان بينطق لكن نطق سعود يدفهم قدامه بمزح:قدامي اشوف يلا
ضحك فهد بعز عصبيته من حركته وابتسمت وريد بهدوء تحب علاقة سعود معهم،ركب كل منهم سيارته راجع بطريقه للقصر~
دخل فزاع الغرفة يبلع ريقه يناظرها مغطيه وجهها وتبكي تهتز كتوفها من بكاها وناظر الشاش اللي على راسها يبلع ريقه ومشى لها يجلس على طرف السرير قدامها يناظرها من بعدت يدها عن وجهها لجل تشوف من اللي جلس و سرعان ما نطقت بانفعال من شافته تتذكر كل شي:اطلع برا
ناظرها بصمت ما يرد وشتت نظره للمغذي اللي بيدها ورجع يناظر عيونها و محاجرها باللون الاحمر ونطق بهدوء ظاهري عكس داخله:الحمدلله على سلامتك
ناظرته تنذهل تحبس دموعها من كلامه بالاخير ذا اللي طلع منه"الحمدلله على السلامة" احتدت ملامحها بقهر تنطق بصوت خافت من تعبها:اطلع برا مابي اشوفك اطلع
ناظرها ونطق بهدوء ظاهري فقط:ما بطلع لاما بتسمعيني
انفعلت وكانت بتنطق لكنها رفعت يدها لراسها من آلمها
وناظرها فزاع يفز يقرب منها ينطق بخوف:وش يوجعك؟انادي الدكتورة؟
نطقت ببكا وهي للحين محاوطة راسها:اطلع اطلع مابي اشوفك اطلع
لانت ملامحه من كلامها يناظرها ونطق بكسرة قلب ما يوضحها:ما تبين تشوفيني؟
رفعت راسها تناظره بعيون دامعه ونطقت بنبرة باكية
:اكرهك اكرهك،اطلع برا
بلع ريقه يسمع كلامها و الواضح انه طالع من قلبها لكنه نطق بجمود يناظر عيونها:وانا عكسك احبك،اسمعيني وبتفهميني
هزت راسها تبكي ومسكت راسها بقوة تون بخفة من وجعها وتنهد فزاع يقرب منها ورفع يده كان بيضمها لكن رفعت راسها لاما باستعجال من حست بحركته و سرعان ما رفعت يدها قدام وجهه:لا تقرب مني لا تلمسني مابيك،اطلع وناد لي رائد اطلع
ناظرها ينصعق من حركتها و كلامها ونطق بانفعال خفيف لجل ما يعصب عليها بهالحظة و بهالمكان:شفيك لاما شفيك؟ ما كفاك البعد؟ تبين نبعد اكثر من كذا؟ ما تبين تسمعين حسّي ولا تشوفين خلقتي؟ تبين تنقطع دروبنا؟ونفترق؟ وش تبين احكي لي تعبت من وضعنا
ناظرته تسمع كلامه تنزل دموعها كالشلال ما ترمش للحين يهدد بها بالطلاق من نطق"تبين نبعد اكثر"
"دروبنا تنقطع" وغطت وجهها تجهش بكاء من خلص كلامه تحس بشعور غريب جداً ما بيهدا غير بحضنه لكن هيهات عند كبريائها
تنهد فزاع يمسح على وجهه ينطق بنبرة هادية يحاول يداريها:وش تبين قولي لي ما برفض اللي ودك يصير
ناظرته ونطقت ببكا بصوت مليان تعب:ذليتني و هددتني ما احترمت العشرة اللي بيننا،مابيك اكرهكك اكرهكك
لانت ملامحه لأنها تشرح له شعورها وللحين تصدمه بكلامها اللي مثل السيف يضرب بقلبه
سكتت لاما تناظر نظراته اللينة ونطقت ببكا:اكرهك اطلع من عندي
زفر بحدة يمسح على وجهه يناظرها و خرج من الغرفة باستعجال لجل ما يتهور بتصرفاته،وبكت لاما تناظر خروجه بالطريقه ذي و مسحت وجهها من دخلت الممرضة لجل تفك المُغذي تناظرها بجمود
ناظرتها الممرضة تبتسم لها بهدوء:اهدي شفيك ما في شي يستاهل دموعك الغالية،الف سلامة عليك
ناظرتها لاما بهدوء تخرج من ما شافت ردة فعل منها
سرّحت لاما بالفراغ قدامها تنزل دموعها بملامح جامدة تعيدّ كل شي صار معها لها اسبوعين حياتها متلخبطه
ومب مستقرة غمضت عيونها من راودتها فكرة الطلاق
تبكي بصمت،
دخل فزاع وناظرها تبكي وسرّحانة بالفراغ قدامها وزفر يمسح على وجهه وناظرته لاما من سمعت تزفيرته ونطقت ببكا وصوت خافت تعكس شعورها
:ناد لي رائد مابيك ان...قاطعها من نطق بجمود يرمي عليها الشماغ اللي متغرق بالدم:مافي حد غيري البسي وتعالي بنتظرك برا
ناظرته من طلع بعد ما ناظرها بنظره ما فهمتها و تنهدت تتاوه بألم من وقفت تتمسك بالسرير من داخت
تغمض عيونها بقوة و سرعان ما اختل توازنها تطيح على السرير خلفها وبكت بصمت تعض شفتها تناظر الغرفة خالية حتى بطيحتها ما كان معها،فزاع مهملها جداً و يبيها ترجع له؟نزلت راسها تبكي تغمض عيونها بقوة وسمعت صوت الباب تعتقد انها ممرضة
اما فزاع دخل الغرفة من طوّلت لاما يعقد حجاجه بخوف يناظرها جالسة على السرير و تبكي بقوة ومغمضة عيونها ومشى لها و وقف قدامها يناظرها
:فيك شي؟
ما ردت وبكت تسمع صوته وكمل فزاع يمسك كتفها:لاما
رفعت راسها تبكي تنطق ببكا من شعورها:حتى الحين وقت طحت ما كنت موجود استند عليك حتى الحين فزاع،ولا مرا كنت معي بوقت طيحاتي و لا مرا خففت عني،ما عمرك سألتني عن شعوري سكتت شوي تبكي بقوة تنطق تناظر عيونه:انتَ اناني تفكر فقط بنفسك اناني وحقير اكرهك اكرهك،اذيتني و اهملتني كثير
سكتت تجهش بكاء تترك فزاع مصدوم ومذهول من كلامها يناظرها تبكي يراجع كلامها بعقله طاحت الحين وهو مب معها،هو معقول مهملها؟ ناظرها تبكي ونطق باستعجال يجلس بجانبها:لاما لاما ناظريني طيب لاما
ما ردت تبكي وهي منزلة راسها وكمل فزاع يمسك يدها غصب عنها يبرر موقفه:لاما كنت انتظرك على الباب ليه ما ناديتي عليّ؟ متى اهملتك لاما متى؟ ان..قاطعته من نطقت بانفعال تناظر عيونه:انتَ دايم مهملني ماخذني للتسلية فقط ولا تسأل إذا في حماره لها شعور بجانبك دائماً تفرض نفسك عليّ ون..سكتت تضحك من قهرها تمسح دموعها توقف مباشرة ما تهتم لدوختها
:انا اصلاً ليه اتكلم
لانت ملامحه من كلامها يوجعه قلبه كل هذا الشعور زرعه فيها؟انشدت عروق عنقه من قهره وجهه تحول للون الاحمر ونطق بصوت خافت من ضيقته من ضحكها و بكاها بنفس الوقت:لاما
ناظرته وجمدت ملامحه من شكله و صدت عنه باستعجال ما تبي تتعاطف معه ماتبي تعطيه فرصه،
توجهت للسرير تمسك الشماغ تحطه على راسها بعشوائية و فتحت باب الغرفة تطلع تتجاهل فزاع اللي يناظرها و زفر يناظرها و سرعان ما لحقها يناظرها متوجهه للباب الرئيسي واحتدت ملامحه يناظر مجموعة الشباب اللي واقفين على الباب و ركض يمشي بجانب لاما يحاوط ظهرها من الجنب يمشي بجانبها يرفع يده للشماغ يثبته على راسها يناظر الشباب بحدة و تجاهلهم يخرج من المستشفى
ونزل نظره لها ينتبه لنظراتها و صدت عنه لاما تزم شفايفها ببكا،ناظرته يمشي لناحية الكراج و نزلت نظرها لخطواتهم و نزلت دمعتها تغمض عيونها لجل ما تتبعها دمعة ثانية،ماتبي تبكي بجانبه بهالحظة ابداً
ركب فزاع سيارة رائد اللي تركها لهم و روّح مع سعود
وناظرها من ركبت بجانبه يتنهد يشوفها رجعت ظهرها للخلف تغمض عيونها و نزلت الشماغ عن راسها بحكم ان سيارة رائد مضللة،صد عنها ياخذ نفس يحرك السيارة يسمع الهدوء بينهم يبلع ريقه يتذكر كلامها يعقد حجاجه هو ما قصر معها كل شي تطلبه يجيبه لها
وما يجلس معها كثير بسبب شغله،يفكر بعمق جاهل عن الأفكار برأس اللي يمينه~
تفكر هي ما تنكر انه يجيب لها كل شي تطلبه لكن برضوا هي تحتاج لحنان و اهتمام وحُب اكثر من كذا،
تعبت من كمية البرود في علاقتهم دائماً تتغاضى عن كثير من الاشياء اللي تزعجها لجل ما تخَلفّ بينهم مشاكل لكنها الحين ما تقدر تتحمل اكثر من كذا،غرقت بتفكيرها و بلعت ريقها من تراودت فكرة الطلاق لذهنها مرا اخرى~
ناظرها فزاع من وقفت السيارة يناظرها مغمضة عيونها و فتحت عيونها وناظرت القصر قدامها و مسكت الباب لجل تفتحه وتنزل لكنه مد يده باستعجال يكبس زر الأمن حق السيارة يناظرها و غمضت عيونها لاما تنطق بصوت واضح عليه التعب:افتح الباب بنزل
ناظرها وهز راسه بالنفي:ما بتنزلين،احكي لي وش مكدر خاطرك مني؟ ليه يطلع منك هالكلام الحين؟ ليه ما حكيتي من وقت حسيتي نفسك متضايقة؟
تنهدت ما ترد وصدت عنه ترجع ظهرها للخلف بتعب تحط يدها على بطنها البارزة وغمضت عيونها تتنفس بهدوء بتعب،وناظر حالها فزاع يعقد حجاجه ينطق بضيق:تكلمي قولي شي لا تسكتين لاما قولي لي اللي ودك
نطقت وهي تمسح على بطنها وللحين مغمضة عيونها
:المفروض اني احكي لك عن اللي مضايقني؟ ليه ما تحس بنفسك؟
تنهد يسمه كلامها يلمح التعب به ونطق يمسك الدركسون بقوة من شعوره تشتد عروقه يناظرها
:ما بحس لو ما بينتي لي يا حَرمي
ميلت شفايفها و فتحت عيونها تتنفس بصوت واضح تتضايق ما تدري وش بها:افتح الباب
عقد حجاجه من حالها يناظرها ونطقت لاما تمسك الباب:افتحه
كبس يفتح السيارة بخوف و سرعان ما فتح بابه ينزل باستعجال من نزلت لاما تمشي للجهة الخلفية من الحديقة بحكم انها قريبة من الكراج و ناظرها منحني على بطنها و تستفرغ"اكرمكم الله" ومشى لها بخوف يوقف بجانبها يحط يده على ظهرها ينطق بنبرة واضحة عليها الخوف:بسم الله عليك بسم الله عليك
طاحت تجلس على رجولها للحين تستفرغ بقوة و عقد حجاجه فزاع من شكلها و وجهها و الواضح انها متضايقة كثير و تركها يركض للقصر بسرعة عالية لجل ما يتأخر عليها،دخل الصالة يناظر الجميع جالس و ينتظرونه و وقفوا اول ما شافوا شكله
نطق فزاع يناظر سعود:لاما لاما
ركض سعود تمشي خلفه وريد باستعجال وطلع غيث يركض معهم ولحقه رائد و فهد و غند وهالة ونجلاء اللي ساندة راجح
ناظر سعود لاما اللي تستفرغ بقوة وجلس بجانبها
نطقت وريد تناظر سعود:اجيب لها نعناع و موية؟
هز راسه سعود و ركضت وريد تتناسى وضعها تدخل القصر،
بكت لاما وهي تستفرغ تأشر على صدرها بمعنى اختنقت وعقد حجاجه سعود ينطق وهو يضغط على ظهرها بقوة
:طلعيها لاما طلعيها لا تبلعين شي بتختنقين طلعيها
ناظرهم فزاع و وجهه احمر يشوف دموعها اللي تنزل بكثرة
نطقت ريفال تجلس يمينها:لاما حبيبتي طلعيها لا تبلعين شي ضرر كبير لو بلعتي طلعيها كلها
تنهدت لاما تشهق تبكي تغطي وجهها من طلعت كل اللي بجوفها ترتجف بقوة وناظرها سعود و رفع نظره لغيث اللي وجهه احمر من حال بنته و ناظر سعود لاما يقرب منها يضمها يمسح على ظهرها وصد عنهم فزاع وتأنيب الضمير ذبحه كل شي صار بسببه
جلست وريد تمد لسعود اللي حاضن لاما الموية وبعد سعود عن لاما يبلل يده بالموية ويمسح على وجهها
لأنها شبه فاقدة للوعي حولها وناظرته وريد تستند على الجدار بتعب تحط يدها على ظهرها من حست بثقل على بطنها
ناظرها راجح و تنهد يمشي لها يوقف بجانبها يدخلها تحت ذراعه وباس راسها وتنهدت وريد تنسد راسها على كتفه بتعب والنعس ذابحها لكنها بتطمن على لاما،
رفع سعود لاما وناظر مافي حد غريب ينزع عنها عبايتها يناظرهم فزاع بهدوء ظاهري فقط ودخلها تحت ذراعه يمشي بها للجلسة يجلسها و ناظرتهم لاما تخجل منهم من تصرفها تنزل راسها ترتجف بهدوء
وهمس سعود بمزح:يمكن نزلتي كيلو خلاص عاد ماله داعي الاحراج يا الساطية
ابتسمت بهدوء تناظره تشهد على وقفته معها وضحك سعود يضمها تغمض عيونها لاما براحه،وبعد عنها يمد لها كاسة النعناع ينطق يناظرها يميل راسه:اشربيه كله مابي اشوف شي يبقى بالكاسة
هزت راسها بهدوء تشرب بهدوء تناظر غيث اللي نطق يناظرها:وش فيك يا ابوي ليه كذا يصير معك؟
رفعت اكتافها وكانت بتنطق لكن نطق سعود من عرف وش بتنطق:مافيها الا العافية ماخذه برد ومب ماكله كويس
تنهدت غند تناظرها تنطق بحده من خوفها:بتنزلين غصب عنك تاكلين معنا من هنا و رايح،قلبي وقع بين رجولي من خوفي عليكِ
ابتسمت بهدوء وناظرها فزاع بملامح جامدة وده يقوم يسحبها من بينهم ويضمها بقوة يهدي من خوفه و روعته عليها،ناظر سعود نظرات فزاع وتنهد يفهم وش يدور في باله
نطقت هالة تناظرها:انتبهي لنفسك يا امي
ابتسمت لاما بتعب لها وردت لها الابتسامة ونطق ذياب يناظر فزاع بحدة:ان وضعك هذا من فزاع احكي لي يا لاما
ناظره فزاع وناظره ذياب بحده وناظر نظراته راجح ينطق بحدة:ذياب،وش طوله تبهدل به خله،ما بيقصر مع حَرمه مب سامع سعود يقول ماخذه برد
تنهد ذياب يمسح على وجهه يناظر لاما وتنهدت لاما تنطق بابتسامة تتجاهل شعورها:ما يأذيني
ناظرها فزاع و ارتخت ملامحه من كلمتها وصد عنها من ما ناظرته يمسح على وجهه بقهر
التفتت سعود يدور بنظره وريد لانه ما شافها و ابتسم يميل راسه يناظرها جالسة يمين راجح ونايمة على كتفه يضحك بهدوء وطلع جواله يلتقط لها صورة من غير محد ينتبه عليه و ارسلها لعساف يكتب تحت الصورة "هذا حالها من اسبوعين بس تنام ما تجلس معنا كثير كله نوم،تعال لجل تصير تجلس معنا" حط ايموجي يضحك وقفل جواله يحطه بجانبه وناظر نجلاء من ناظرت لاما تنطق:تبين عريكة اسوي لك؟
ابتسمت لاما لمدراتها لها تهز راسها بالنفي وناظرتها نجلاء تتنهد
نطق ذياب يناظر وريد اللي نايمة على كتف راجح:الله يرجع عساف سالم يارب
آمنوا على دعائه و ابتسم سعود ينطق يناظرها:وريد
ما ردت ونطق بضحك:بنت الغزال
التفت من نطق الليث اللي تو جلس مع ملاك بضحك
:اتركها وش ودك فيها خلها نايمة
ضحك سعود:طول وقتها نايمة
ابتسمت هالة تناظرها ومسحت على وجهها تنتظر اللحظة اللي تعلن فيها فقط
ابتسمت ملاك تناظرها وابتسمت بهدوء تاخذ نفس تصد عنها،
فتحت عيونها وريد من حاوط راجح ظهرها يمسح عليه بحنية ومسحت وجهها تناظرهم وابتسم يناظرها
:صح النوم
ضحكت بنعس تعتدل بجلستها:نعست!
ضحك سعود ينطق:روحي نامي
هزت راسها بالنفي وميل شفايفه سعود يناظرها و صد عنها يناظر فزاع ينطق يأشر له بحواحبه:خُذ حَرمك وتوكل
ناظره فزاع وناظر لاما اللي تناظر سعود وكانت بتنطق لكنه فهم على سعود يوقف مباشرة يمد يده لها ورفعت راسها لاما تناظره و ناظرت الجميع جالس تمد يدها ليده يمسكها فزاع بقوة و وقفها معه
نطق سعود وهو يوقف يناظر وريد:اي شي يصير تعالوا لي،وانتي قدامي هِيا
ضحكت وريد ودخلها سعود تحت ذراعه يمشي معها يناظر لاما و فزاع اللي مشوا للدرج مبتعدين عنهم
ابتسم سعود يبوس راس وريد يوقف قدام جناح عساف:رغم اني مب مصدق انك مافيك شي لكن لعله خير
ابتسمت بعبط تناظره وضحك سعود يضمها بهدوء تغمض عيونها وريد برضا و راحه بحضنه وبعد عنها سعود يناظر عيونها ونطق بهدوء يتركها ويمشي
:تصبحي على خير
ابتسمت تناظره قبل يبتعد:وانت من اهله
ناظرته من طلع للطابق العلوي لجناحه وتنهدت تدخل الجناح تسكر الباب خلفها وتنزع عبايتها ترمي نفسها على السرير بعشوائية تنام بنعس شديد من غير تفكير~
