قدر مراهقة 2

الجزء 52

#قدر_مراهقة2
#ميرال_مجد
#بقلم_فريال
الجزء 52
ليام تفوت بسرعة وكل واحد يرجع لدارو وحياتو غير اهل لميت الي يبقاو مشتتين وحزنانين على المرحوم وحدهم يعانيو ولا واحد يقدر يحس بيهم وبوجعهم لانو كل واحد وطبيعتو كاين الي ينسى بالخف وميتأثرش وكاين الي يدير روحو مايحس بوالو بصح هو من داخل مدمر وغير ربي عالم بحالو وكاين الي يبقى لاصق فهذيك الحادثة وميقدرش يتجاوزها ويلجأ للحبوب وصوالح خرين باش ينسى، انا كنت من نوع الي ساكت من برا ويبكي من داخل حاجة من داخلي رافضة تصدق وش الي صرا مزالني حاطة بلي كلش منام ورايحة نفيق منو في اي لحظة تدخل ماما من باب شومبرتي باش تنوضني نروح نقرا بصح للاسف الشديد مش ماما الي تنوضني ماما راحت راهي تحت تراب راجلي الي ينوض فيا وواقف معايا يحاول ينسي فيا ويلهيني باش نرجع كيف كنت بصح للاسف مقدرتش يدير هاذ الشي لانو انا رافضة نحكي ولا نشارك حزني مع ناس وحتى ولو كانو هاذ الناس قراب ليا. فاتو 20يوم على موت ماما محسيتش بيهم لانو جايبتها ليل مع نهار راقدة بفضل الدوا كنت نهرب من الواقع تاعي لرقاد باش منتوجعش خاوتي بقاو في دار يامات وكي شافهم بابا مدمرين هكاك بعثهم راحو لدار جداتي ام ماما وانا واسيل رجعنا لدارنا والي صدمني تاع صح هي عمتي كي رجعت طلبت منا سماح وزعما زعما راح تبقى في دارنا مع بابا تهتم بيه بيدما رجعو خاوتي ونساهم واتاري هي كان عندها مخطط ثاني خلاوهم في دار عمتي وبابا وهاجر وجداتي وندمو كي خلاوهم. ليوم تلمينا كامل في دار جداتي عرضتنا انا وخاوتي وخالاتي وخوالي لمتنا عندها كانت مريضة شوي من يوم ماتت ماما وهي طايحة فراش كانت اقرب وحدة ليها بين ولادها كامل كانت مسالمة متحبش المشاكل وديما تتجاهل الناس الي يقيسوها وكي تنضر تبعد متبقاش فلبلاصة هذيك وقلبها بيض بالخف تنسى وترجع كيف كانت على عكسي انا منسكتش على حقي والي يقيسني بكلمة نردلو عشرة واذا واحد غلط في حقي منسمحلوش ومستحيل ننسى حتى ويفوتو سنين على لحكاية هذيك ونبقى حاقدة عليه حتى يموت هو ولا نموت انا قولو قلبها كحل وشيطانة وشريرة قولو كلش مايهمنيش بصح انا مننساش الاساءة وخصوصا الي يتعمد يضرني ويجرحني مننساهالوش. كنا ملمومين كامل انا وخاوتي جينا كامل عندهم بابا مجاش قالنا مشغول ومنقدرش نجي ووصانا نروحو كامل وكي قولتلو انا منروحش زعف مني وقالي وصية يماك تبقاو طلو على جداتكم عيب عليكم تخلوها بقى ورايا ورايا حتى جيت وياريتني ماجيت.
#فريال