قدر مراهقة 2

الجزء 53

#قدر_مراهقة2
#ميرال_مجد
#بقلم_فريال
الجزء 53
بين شياخة وتقصار نحاولو ننساو همنا مع انو مستحيل ننساو لحقني ميساج من عند بنت عمتي هند مع لول حرت كيفاه تفكرتني وبعثتلي لانو مش من عوايدها تجاهلتو ومحبيتش حتى نفتحو ونشوف وش فيه كي طولت زادت بعثتلي الفضول قتلني باش نعرف وش بعثت دخلت نقراه وياريتني مادخلت ولا قريتو ولا عرفت وش فيه ولا تبعتها ودرت عليهم وخسرت انسان خلاف. لقيتها باعثتلي بلي بابا مريض وازربو ارواحولو لدار مهوش راضي يروح لسبيطار بلاك تقدرو تقنعوه انا خلعت مت في لحظة هذيك خفت يموت بابا ويخلينا كيما ماما ونبقاو وحدنا عاودت عيطتلها لقيت تليفونها مقفول حكيت لخاوتي وش كان مام هوما تخلعو لبسنا قشنا وجينا رايحين كل واحد رفد مرتو وخرج انا طول طريق نندب على مجد ازرب ازرب ازرب او يموت او يخليني وحدي ووش صرالو ياك كان لباس نعيط ونعاود والو مبغاتش ترفد الكلبة مام بابا تليفونو مقفول عيت لمن نعيط حتى قولت لوائل يعيط لواحد من جوارينا بلاك يكون عارف وش كان وهذاك الي كان عيطلهم وقالولو عندكم الغاشي عمامكم وعماماتكم متلمين كامل في داركم لتم انا صاي طرطقت بلبكا تفكرت كيفاه ماتت ماما ولغاشي متلم في دارنا وكيفاه دفنوها وبعدت علينا كلش تلم على ضربة وحدة نبكي ونقول مابكيت حتى مجد وخلعتو مالقى يسوق ويزرب يلحقني لدار ولا يسكتني انا ولا يسكت لجين الي فحمت بلبكا كي شافتني نبكي وندير هكاك، بالسيف لحقنا لدار والي كنت خايفة منو صرا لقيت طونوبيلات قدام دارنا تاع عماماتي وعمامي ولباب محلول ورجال واقفين برا بديت نشوف في الباب وفي مجد ونحاول نتأكد بلي راني قدام دارنا وبلي هذا لكارتي تاعنا ومنيش نحلم كلش حقيقي الغاشي عندنا وبابا مكانش مهوش واقف معاهم برا من غير عمومي واحد ماكان، شفت في مجد وقولتلو مات ياك مام هو راح وخلاني كيما ماما بقيت وحدي تيتمت من الجهتين علاش يصرالي هكا علاه _ اهداي بالشوي بالشوي نفهمو كلش مكلاه تتشائمي لوكان مات راهم عيطولنا ندخلو لداخل ونعرفو كلش هاه مام وائل وخليل لحقو ذوك ننزلو نفهمو كلش _ ايه هيا. نزلت انا وخاوتي كي جينا داخلين عمومي جاو لعندنا وجهم تخطف قالولنا وش جابكم قالو وائل وش الهدرة هذي جينا لدارنا ياك مناش غالطين _ لا مكمش غالطين بصح رشيد قالنا بلي روحتو لدار جداتكم وبلي متروحوش حتى لغدوا عليها حرت كي شفتكم كشما كان ياك لباس؟_ لباس جينا نشوفو بابا برك قالولنا بلي راهو مريض _ شكون قالكم هكا باباكم لباس عليه وراح خرج غير متتخلعوش وارجعو لعند جداتكم خير _ كي شغل راك تحاوز فينا ومش حاب تخلينا ندخلو لدارنا وش كان غير الخير _ مكان والو ارجعو برك، نطقت انا وقولتلو كي ندخلو نعرفو وش كان باين من وجوهكم بلي مخبيين علينا حاجة _ ماخبينا والو _ ندخلو ونشوفو _ قولتلكم مكان والو، قالو وائل عمي ابقى بعيد حنا داخلين لدار وراح نعرفو كلش مكلاه تدخل وتخليني نغلط معاك، قال كلامو ودار عندنا قالنا فوتو قدامي وش مقعدكم لبرا ناس تشوف،دخلنا لدار وياريت مادخلنا ولا شفنا الي شفناه تصدمنا صدمة عمرنا.
#فريال