قدر مراهقة 2

الجزء 56

#قدر_مراهقة2
#ميرال_مجد
#بقلم_فريال
الجزء 56
رحت نمشي لعندو انا وخاوتي نسقسيو فيه ونحاولو نفهمو وش كان وهو غير ساكت مابغاش يجاوب والو عيت معاه انا اسيل خليل وائل والو مابغى ينطق مابغى يدير والو قاعد في نفس لبلاصة بلا اي حركة وهاجر وراه مهبطة راسها، بقى ساكت حتى نطقت اخت بابا (ماتستاهلش كلمة عمتي ومن نهار هذاك كرهتها وحقدت عليها لانو قاستنا بزاف وماخلات مادارت فينا) قالتلو مرحبا بلعريس ومرتو فوتو شبيكم واقفين لتم ولا اصبرو لازم ندير العادات وتقاليد باش نستقبلكم كيف مايلزم راحت جابت معاها كاس حليب وتمر وقربت باش توكلو زعما خوها وتزوج وفرحانة على جالو بصح هي دارت كل هاذ الشي باش تخرب دارنا وتفرقنا، شد وائل الكاس وردخو للحيط وناض يعيط ويعارك فيهم ويهدر مع بابا بصح اذا نطقت الحجرة ينطق بابا والو ساكت ويتخنزر في عمتي الي تضحك وتقولهم اخرجو اضربو لبارود وديرو لغنا عروستنا جات واخيرا راح يتهنى خويا ويرتاح في حياتو طول عمرو كان مغبون وذوك فرج عليه ربي ورزقو بالزوجة الصالحة. كبرت لحالة ووائل دار لعماماتي وجداتي ونسا عموني حاوزهم هنا وقفتلو اخت بابا وقالتلو مش دارك وتاع خويا ومش عاجبك برا علينا وخويا تزوج وواحد مايدخل فيه وخلوه يفوت هو ومرتو يا الغيارين نتوما عايشين حياتكم وبغيتوه يبقى وحدو والله مانسمحلكم تغبنوه اني هنا نزوجو ميات مرة اذا بغا ونتوما اندبو ولا اخبطو ريوسكم للحيط ولاد الكلبة سلمى، هنا بابا عيط عليها وقالها بلعي فمك واحشمي على عرضك لا نتصرف تصرف اخر وش المهزلة هذي وش جابك لداري وش جابكم كامل لداري شكون عطاكم لحق تدخلو وديرو لغنا ورايكم متحشموش على عرضكم لمرا ماعندهاش 20يوم ملي تزوجت ونتوما مدايرين زرنا في دار لا حشمة لا حيا _ لوكان جات تهمك مرتك راك ماتتزوجش عليها متلعبهاش عاقل وخاطيك وحنا الي جبرناك على زواج ياك بفمك جيت وقولتلنا رايح نتزوج هاجر وروحت فتحت عليها صباح وقولت رابح نعقد وحنا درنالك لعشا مجاياش تزوج بلا عشا وش يقولو ناس مهرب مرا على كبرو ولا شاه. بلعي فمك وقودي من دراي كلبة، بابا صح انت تزوجت _ ماش وقتها لهدرة هذي فوتو لدار خلي يروحو ناس ونحكيو _ لا وقتها فهمني تزوجت ولا لا جاوبني _ بنتي خليني نفهمك _ ماتفهمني والو تزوجت هيه ولا لا؟، سقسيتو وكنت متمنية انو يقولي ماتزوجتش مستحيل نتزوج عمتك تعرفيها تحب لمشاكل وديما دير هكا باش نتعاركو انا مانخممش فيها يالوكان بعد الف سنة عندي مرا وحدة اسمها سلمى وفرات ماتدخل حتى وحدة من غيرها لداري، انا تمنيت ومالقيتش.
#فريال