Love Discovered

1

"Handumanan, sa usa ka awit~"

"Noy! Naa na imo gihulat oh!" Tawag sa akong manghud nga si Charles sa dihang nadungog na nako ang tingog ni Priscilla Raganas, usa ka artista sa kahanginan sa radyo sa RMN.

"Kusgi aron maakabot diri ang tingog!" Sugo nako niya kay naa siya sa payag nagpahuway.

Nikuot ko og mais sa bag nga nakahikot sa akong hawak unya nagbungkal sa yuta dayon akong gihulog didto og gitabunan dayon nibaktas gamay og gibalik ang pagtanom.

Naa man gud mi sa among bukid karon aron mag tanom og mais kay aron maka-ani nasad among pamilya. Amoa maning yuta nga gimana pa ni papa sa among lolo. Halos magpinatyana pa sila kay kamanghuran man kuno tapos dose pa-jud sila magtunga.

Maayo nalang ky gitubuan pud og gamay nga konsensiya iyang mga magulang maong nabahinan pud siya og tulo ka-ektarya.

Ambot ba sad ning mga uyuan namo nga sa dihang kinahanglan atimanon si lolo wala man nanungha pero katong namatay na og maka-angkon og yuta halos mag-pinatyana. Kani laging buotan atong amahan gipasagdan ra niya nga halos wala siya'y madawat bisan pa siya ang halos nag-atiman kang lolo sa panahon nga nag-sakit na.

"Ang maong istorya karon ky mahitungod sa laki nga nagkagusto sa babaye nga dili siya kayang higugmaon pabalik~"

"Ayay pagkasakit!" Komento nako sa dihang ning silong ko kadiyot sa payag aron muinom og tubig.

"Sakit jud na noy ky laliman ka, bisan unsaon niya og panguyab sa babae ky dili man jud siya sugton." Komento pa ni Charles samtang gakitkit og sambag nga gisungkit niya sa kilid sa payag.

"Unsa pa man ang kulang? Unsa pa akong kinahanglan buhaton aron dawaton ko nimo og mahalon!"

"Dili ka hitsuraan Mike, gatrabaho pajud ka sa bukid. Unsa nalang ang iingon sa uban tao kung ikaw akong maong muyab?"

Nag-lingo ko sa akong nadungog.

Mao jud ning uban babaye ky ikaulaw og ang lalaki dili hitsuraan og labaw na ga-trabaho sa bukid.

"Ayay jud mo mga girls!" Kantiyaw nako og ningkatawa.

"Mao ky mamili man og gwapo!" Segunda pa ni Charles.

"Unsaon mana nimo ang gwapo og walay ika-pakaon nimo og mag-minyo namo?"

"Bitaw, sus maynalang nang ga-trabaho sa bukid ky naa pay gihaguan."

Daghan pami gi-komento pero nibalik mi sa pagtanom ky hapon na. Manguha paman gud mi og kamunggay aron ibutang sa lutuon ni mama nga panihapon.

Ako diay si Robin Garciano, baynte-singko anyos na og nagpuyo sa usa ka probinsiya nga matod pa sa uban dako og gasto sa pamasahe.

Nakahuman ko College sa course na Bachelor of Science in Agriculture ky tungod gusto nako atimanon among yuta og tamnan og mga tanom nga puwede namo kuhaan sa among kinahanglan.

Hitsuraan man sab ko gamay, atimado pud akong lawas kay ga-exercise ko matag buntag sayo og naa pud koy mga na-uyab sauna sa eskwelahan pero  pinakadugay na ang 1 year ky ma-turn off kuno sila sa dihang mahibal-an nila nga gusto lang ko mahimong farmer sa among lugar.

Gusto daw nila nga ang ilang ma-uyab kundili mga criminology ky engineering or mga teacher kay mga professional puhon.

Niundang rasab kog pangita og panguyaban kay gusto lang usa ko mag focus sa among uma.