قدر مراهقة 2

الجزء 60

#قدر_مراهقة2
#ميرال_مجد
#بقلم_فريال
الجزء 60
الي مكتوب عليه لهم والغم عمرو يتهنى وانا وحدة من الناس الي زهري معوج والحزن مداير معايا كونترا وعلى حساب الحطة تاعو راهي مطولة ومايخطينيش حتى يقضي على ناس الي نحبهم ويقربولي كامل. فقدت ثاني شخص والي هو ولدي ولا بنتي منيش عارفة كان صغير في عمرو شهر نتفة صغيرة وسببتلي الم كبير مكانش عندي خبر بوجودو لانو ماحسيت بوالو ولتيت بموت ماما والمشاكل هذوك ماكانش عندي وقت باش نهتم بروحي ولا بداري راجلي وكنت هاملاتو وبنتي لوكان مش مجد راهي ضاعت مرات نغيس ونروح بعقلي بعيد حتى يفيقني هو  كنت في عالم وحدي. نشوف ماما ومعاها 3 ولاد ميبانش وجهم ولا شكلهم ماقدرتش نميز اذا بنات ولا ذكورة بصح صوت ضحكاتهم لحق لعندي نشوف فيها رافدتهم وتمشي وتبعد وتتبسم معايا تم فقت مخطوفة نعرق في حالة عرفت بلي منام وراني غير نخلط شفت منا ومن مقدرتش نميز ولا نشوف وين راني كلش ظلمة وحاسة بجسمي مكسر وراسي ثقيل تقول فيه كاش عجل، حاولت نوض مقدرتش عيطت قولتلهم وين راني شكون هنا وينكم اييي ماتقولوش مت ولحتوني فلقبر ربي استجاب لدعائي هاه عندي الزهر طلبت لموت جات تجري عندي وهاني وحدي فلقبر بصح وين دفنوني شكون راهو قدامي وييييينكم ياأهل المقبرة هاني جيت جديدة معاكم متخافوش مني علبالي ذوك نار تخرج من قبري بصح حاولو تدفاو منها اني رايحة نفيدكم شوي انا نتحرق ونتوما تسخنو هاه رايحة لعند فرعون نقعد معاه في نفس الطابلة ونشايخو هو يحكيلي وش دار بكري حتى تفرعن ودخل لجهنم وانا نحكيلو كيفاه سبيت ناس ودخلت هنا بصح ياخوفي يشوفني يهرب انا نخلع بزاف، انا نحكي وحدي وتقمصت الدور صاي صدقت بلي مت ودفنوني واووووب نسمع صوت ضحك مع لول قولت الناس الي معايا فلقبر راهم يضحكو ايا قولتلهم اضحكو اضحكو ياوجوه الشر تعياو لاحقيني ونتشوطو ڨاع انا نشد بلاصتي وكي يلحقو لافامي نحرقهم ونضحك عليهم وجوه الشر ايييي ياماما وين روحتي انت في الجنة وانا في النار انت ربحتي دنيتك واخرتك وانا ربحت الشر طول عمري نسب ونعاير في ناس وهاني جبتها في ت***، شعل الضو وانا شفت السي راجلي الحلوف فاسخ بالضحك وشاد تليفونو كان يصور تشوكيت قولتلو وش راك دير هنا ولا حتى انت مت _ ايييه مت ودفنوني بقشي وحطولي تليفون نلهى بيه باش منتقلقش_ عندك الزهر انت حطوك في بلاصة شابة مش كيفي لبزوني هنا كلش فيا مكسر تقول حرقت الجوامع _ نقولهم يبدلولك لبلاصة _ مذابيك دير فيا مزية _ ميرال واش بيك راكي في عقلك شوفي مليح وين راكي هذا سبيطار ماشي قبر علاه لقبر يكون فيه سرير و الضو _ هاه وشنو _ ارجعي ترقدي ارجعي راهو وقت لفجر انا نروح نصلي ونبعثلك طبيبة تشوفك تبالي كثرولك البنج حتى وليتي تهلوسي زي السكران_ شاراك تقول انت وش دارولي _ والو والو غمضي عينيك ارتاحي في نهار ونحكيو ونفهمك مليح.
#فريال