ٰ ♪الســـــــلام عليكُم ♪
ٰ ــــ"التَملُك"ــــ
ٖ بـ قلم الكاتبه "ريـام الـطائي"
ٰ ﴿فَصَبْرٌ جَمِيلٌ وَاللَّهُ الْمُسْتَعَانُ﴾
ــــــــــــــــــــــــــــــــــــــــــــــــــــــــــــــــ
ٰ
كاعدة بغرفتي واسمع صوت اهلي اهلي المُتحضرين بالصالة وهمَ يعيطون طبعاً لازم تعودنه على هذا الروتين طبت اختي خايفه تباوعلي تريد تشوف ردة فعلي واني جامده ابتسمت بمكر وكتلها.
تالين: ها؟ .. شنو ترديني اخاف مثل كل مره؟ ماكافي ماتعودتي على هلروتين ميتغيرون وعيونج الاحبهن.
اجت بحضني ضمت راسها تناشغ وتحجي بحركه.
آيلا: والله مليت احس على يوم نموت من هذا اليصير ليش مانلتم مثل كل العوائل ونفرح ونضحك ونتشاقه ليش بس مشاكل ليش؟؟؟
تحجي وتبجي نفس كل مره عفتهه بعد ماغفت طلعت وهمَ بعدده عياطهم عالي
.
كاظم: طلعت المسعده ..... وينهه هاي الثانيه؟
تالين: نايمه!! . شتريد منهه ماكافي عذابهه النفسي؟
كاظم: لسانج انتِ وياها يرادله كص.
سمعته وبداخلي جريته زيج . عفته ودخلت للمطبخ شفت امي جاي تشرب مي.فاطمه : هاا؟ واخيراً طلعتي من الغرفه تكولي اساعد امي اسوي اصخام بوجهج!
تالين: ترى عندنه دراسة وهمومنه كافيه فـ ارجوج مالي خلك.
فاطمه : اي اي خوش عذر... يلا ولي من خلقتي ماناقصتج.
تالين: على اساس اني الناقصتج.
حجيت وشربت مي ورجعت للغرفة.
شفت آيلا نايمه بتعب حبيبة روحي. غطيتها ونمت يمها فزينه ثنينه على صوت المنبه غسلنه وتريكنه وحظرنه نفسنه للمدرسه.
ــــــــــــــــــــــــــــــــــــــــــــ
آيلا.
طلعنه من البيت نمشي للمدرسة ونحجي امور عشوائية وفاتت سيارة مضللة من وصلت يمنه انفتحت الجامه وواحد كال.
" اروح فدوه للغزلان ". تالين شالت طابوكه وشمرتهه عليه ولزمتني وشردنه دخلنه المدرسه جان يوم مُتعب من الامتحانات.
حلينه للبيت. .. طلعنه وشفنه نفس السيارة واكفه جمدت من الخوف وتالين تحجي بعصبية.
تالين: خرب اهلك هذا شعنده هنا يريد طابوكه ثانية؟
آيلا: عليج الله عوفي يولي خلي نروح للبيت اخاف والله .
سمعتني ورحنه للبيت وقبل لندخل اجت نفس السيارة ونشمر منهه ورقة اخذتهه تالين وكالت بالغرفة نقراها دخلنه سبحت وتمددت احس التعب ماخذ روحي.
تالين كبالي على جربايتها تقرء الورقة ووجهه معقوج
آيلا: شبيج تالين؟ شمكتوب؟
ــــــــــــــــــــــــــــــــــــــــــــــــــــــــــ
تالين:
فتحت الورقة واقرء ومستهزئة منه جان مكتوب
" غيرج استقوو عليَ هواي وهمَ الخسروا باجر تجين تعتذرين لو اشوفج الويل يا ادبسز لتحاولين وياي. انصحج لان تتأذين.... مهيمن "
قريتهه وضحكت بصوت.
تالين: يعني هذا من كل عقلة يخوفني؟ ههههههههه دخلي يطير لا الزمه اسوي وصله مسح.كدام المدرسة.
آيلا: يمعوده هسه شخسرانه اعتذري خاف صدك يأذيج!
تالين: هههههه معليج يروحي هاي النماذج اعرف شنو تريد هاي تحب الاهاين.
عفت الورقه وكمنه اكلنه طلعنه من المطبخ وشفت امي وابوي بالصالة
كاظم: خفه لهلوجه ثنينجن.. هسه لو عندي ولد شحلاته يتفر بالبيت احسن من هـ الشكول من تففف..
تالين: نفس امنيتك صدكني.
كاظم: شنو قصدج ولج؟
تالين: قصدي ياريت احنه هم عندنه غير عائله شويه بيهه حُب وحنان احسن منكم.
.
فاطمه: دمشي لجج امشي نضفن البيت مالي خلك اكول يلااا.
تالين : عندنه امتحانات مفارغيلج.
فاطمه: آيلا عوفج من هاي اختج الادبسز روحي انتِ نضفي آيلا: بس ماما اني هم عندي امتخانات.
فاطمه : امشي لججج
تالين: كلنه عندنه امتحانات مفارغيلج .
حجيت بعصبية مكتومه واخذت آيلا وطبيت للغرفه حجيت وياها بحركة.
تالين: انتِ لشوكت تبقين هيج مضحكه؟ كم مره كتلج دافعي لنفسج شبيج فاهيه؟؟؟؟ المره الثانيه اطيح حظج.
حجيت وهيه تهز براسهه بـ اي. درسنه ونمنه ثاني يوم بطريقنه للمدرسه وشفنه نفس السيارة واكفه يم المدرسة رحتله واني مبتسمه بمكر. وصلت يمه وشمرت الورقة .
تالين: شنو عبالك تخوفني؟ عشره مثلك ميهزون شعره مني..
مُهيمن: يعني تحبين تجربين شي اقوى؟
تالين: خاب ما تنچب؟
مُهيمن: ههه بسيطه تالين بسيطه
تالين: لحضه لحضه؟ منين عرفت اسمي؟
مُهيمن : عرفت كل تفصيلة عنج
تالين: المهم.. توكل مني لا اسحلك كدام الناس ياخيخه عفته ودخلت للمدرسه.
ــــــــــــــــــــــــــــــــــــــــــ
آيلا طلعت من المدرسه وجاي نمشي وماحس اله نفس السيارة اجت يمنه بكل سرعتهه طبكت ونزل واحد خله منديل على تالين واخذها واني جامده واحس الدنيا وكفت بعيني..
يتبع....ـــــــــــــــــــــــــــــــــــــــ اهلاً اهلاً حبايبي طبعا شلونكم.يارب بخير 🤍🌚
.
اعرفكم اني الكاتبة "ريـام الـطائي" ✨
وهذا اول بارت من قصتنة.
ــــــــــــــــ
لتنسون التصويت والتعليق بين الحوارات. احبكم. ♡
ٰ
أنت تقرأ
"التَملُك"
Romanceٰ ♪الســـــــلام عليكُم ♪ ٰ ــــ"التَملُك"ــــ ٖ بـ قلم الكاتبه "ريـام الـطائي" ٰ ﴿فَصَبْرٌ جَمِيلٌ وَاللَّهُ الْمُسْتَعَانُ﴾
