قدر مراهقة 2

الجزء 74

#قدر_مراهقة2
#ميرال_مجد
#بقلم_فريال
الجزء74
لحق وقت العصر وفات باش ناض السي شباب مدوخ ماهو عارف والو غير يتخبط زي الحوتة الي يخرجوها من لما لانو كثر من الجو تقول ملهوف عام ماشرب ولا شافو (انا الي حتمتلو يشرب وكل مايقول شبعت نزيدلو قرعة تقريبا شربها وحدو انا ذقت برك وهو راح فيها يستاهل)، فات دوش وعيط عليا كي شاف شحال الساعة دارلي حالة قالي كيفاه ماتنوضينيش وتخليني راقد للوقت هذا وياك قولتلك مسافر علاه عليك زكارة هذي ماشي خدمة لوكتاه تبقاي بالعقلية هذي تاع الذر _ وش وش بيك تاكل في روحك وش درتلك انا شادخلني فيك اذا انت رقدت حتى تنفخت علاه قولتلي نوضيني ماقولتليش امالا خلاص الغلطة تاعك متحاولش تردها فيا وتمسح لموس فيا انا باش تبرأ روحك ومرة اخرى قبل ماتحاسبني وطير فيا راجع روحك من بعد ارواح ليا فهمت _ لمن هذي فهمت لمن _ ليك للجيران _ شوف انت ساعفتك شوي راح طيري عليا شدي فمك لا نكسرهولك _ راني نرجف راح نموت منك الي في يدك ديرو، قرب شدني من فكي وبقا يزير هو وجعني شوي وانا نوضت مندبة كبيرة مابغيت نسكت ندمع ونسب نهار هذاك كلبت تاع الصح وهو سبابي انا خاطياتو وهو حاب يرد لوم فيا كي مسافرش (انا مادرت والو ياك نتوما شاهدين هو الظالم باينة انا مانغلطش)، كي شافني زعفت وتقلقت منو راح لبس قشو ورفد تليفونو وجا خارج لحقتو قولتلو وين _ لجهنام تاكلني _ ان شاء الله بصح قبل ماتروح اديني لدار خويا _ علاه _ كيفاه هذي علاه ياك تعاركنا وطاح لقدر وانا لازم نصد ونروح ليه _ شوف اسيدي قررتي وخلاص _ ايه ياتديني انت يانعيط لخاوتي ونخلطها لعشية هذي _ اذا حابة تخلطيها خلطيها ماعنديش مشكل بصح انت الي راح تنضري وهوما يعرفوك ويعرفوني مليح واكيد يوقفو معايا _ في احلامك نرفد تليفون ونبكيلهم شوي وندمع ونندب يجيو يجريو ويدورو عليك نقولهم او ضربني وحڨرني ونزيد نخبط روحي شوي ايا تكمل المسرحية _ شوووف الخبيثة شوف مخططة لكلش خصك غير تنفذي نتوما النسا مايقدر عليكم غير ربي الي خلقكم _ كي شغل نتوما ملاح وعاقلين وحنا ظالمين _ النسا هوما الي يدخلو بزاف لنار _ بسباب شكون ماشي بسباب الرجال الي يخونها راجلها تتعوج وتنتاقم منو والي يخليها حبيبها تسحرو والي يلعب بيها واحد تباصيه وخلي وخلي حنا اي حاجة نديروها فهي اكيييد بسبابكم _ ربي يهديكم واعرين نتوما _ هيا تديني ولا نعيطلهم _ امشي قدامي امشي مصيبة وطاحت فوق راسي نديك ذوك وفليل نروحك _ لا راني غضبانة نقعد يامات وانت جيب الجماعة باش تردني وانا نحط شروط ومن بعد نقرر اذا نسمحلك ولا لا _ ايييه يالالة كشما حابة نديرلك تاني_ حاليا مابغيت والو _ امشي درڨي وجهك عليا لا نبتلي فيك لعشية هذي. طلعت نجري لبست بالخف حجابي ورفدت كابتي كنت ديجا موجدتها اصلا كنت معولة نهرب منو باش ميفيقليش وزيد حتى رنيم عيطتلي قالتلي ارواحي تقعدي عندي كرهت وائل يظل يخدم مايروح حتى لنصاص الليالي وليت نخاف ونمل بسرعة لانو دار كبيرة وانا وحدي زي لبومة مام وليدي صغير ايا انا درتها سبة زعنا غضبانة ورايحة نروح نقعد يامات نفركت من وراه ونشوف الاخ الكريم وين راهو غاطس ومنها مجد ينسى لحكاية ومايفيقش اصلا بلي انا الي عطلتلو على خدمتو.
#فريال