قدر مراهقة 2

الجزء 75

#قدر_مراهقة2
#ميرال_مجد
#بقلم_فريال
الجزء 75
كيما كان لحال وصلني لدار خويا وطول طريق وهو يهدر ويعارك وياكل في روحو مبقاش ويطير يخنقني هذا كامل ومزال ماتأكد بلي انا مولات لفعلة معندوش دليل بصح قالي حاسس بلي انت درتيها بلعاني نعرفك ونعرف فصايلك الناقصة قلت كبرت ودارت عقلها بصح والو كل ماتكبري كل ماينقص عقلك، انا اذا نطق العڨون والحيوان ننطق كلمة لا ماقولتهاش علبالي نتحمس ونخلطها ونعتارف ايا بلعت فمي بيد مانلحق لعند رنيم ونطرطق براحتي. لحقت ماستنيتوش حتى يحطي معايا زربت هزيت بنتي والكابة وروحت للباب نطبطب برجلي لانو يديا لزوج معمرين كي طولت مبغاتش تحل رجعت نعيط يارنيييييم حليييي راني جيت، هو كي شافني نعيط نزل لعندي يتخنزر وينسف زي لحنش قالي بلعي فمك ناس تسمع ولا نردك ذوك لدار_ طفرت ذوك منرجعش ولحقت لدار خويا ماعندك ماديرلي _ شوف اسيدي راكي تتحدايني _ لا خلاص نتمسخر بيك شبيك قلقان هذا كلو من الرقاد بزاف تخلط مخك وليت غير تيري برك _ بلعي _ ربي عطاني فم ولسان باش نحكي بيهم شكون انت باش تقولي بلعي شكون شكون _ راجلك واذا مقفلتيش هذاك الڨاراج الي عندك راح نولي قاتلك _ وينى ڨاراج عندي زوج واحد لفوق وتاني لتحت بسلامتك وسعت لحالة ورجعت ڨاراج _ الله يهديك هذي هدرة ذوك يهدروها الناس برا _ ها انت الي قولت. جا ينطق لقينا لباب تفتح كانت رنيم شعرها واقف في السما باينة بلي هذا وين ناضت من رقاد انا كي شفتها هكاك فشلت وطرطقت بالضحك عيت نسكت مجد يتخنزر فيا انا والو تقول راهم يدغدغو فيا دزني ودخلني لدار سلم على رنيم وناض خلاني من وراه طايحة في لرض ونضحك بالصوت بنتي كي شافتني نضحك مام هي ناضت تضحكي معايا (طبوزتي من ديما تحب تضحك وتصفق وقليل وين تبكي حاطة بلي دنيا باهية وكلش مليح لانو ماعاشتش فيها بزاف). راح تبقاي تضحكي هكا زي لمهبولة ولا راح تدخلي _ ايه ندخل ندخل ارفدي لجين تشو وانا نلحقك فشلتيني _ علاه شفتي قرد عريان _ لا شفت قردة مكشردة ههههه _ كلبة نوضي وهاتي طفلة هنا راح ترجعيها كيفك، رفدت لجين وفاتت وخلاتني من وراها ميتة بضحك زهي تقولها متبعيش ماما راهي مهبولة كلات كواغطها تبعي باباك رزين وعاقل خير _ كي شغل انت بعقلك ياقردة _ قردة وراجلي هابل عليا _ ايه خويا مسكين موخذ مالقى شكون يحب ويتزوج غير انت _ علاه معجبتكش _ ايه _ رايك ميهمنيش لوحيه في ق***_ شوف شوف لهدرة الزينة اكي بديتي تخلطي متنسايش راني اخت راجلك يقولو اللوسة سوسة وانا بسلامتي فت السوسة بمراحل مكلاه تخلطي فيا ونعشي مخلطتها معاك يامرت خويا القردة _ ميرال عيب عليك لوكان يسمعك وائل وش يقول عليا _ مايسمع ماوالو قبل مايجي سڨمي روحك وقابليه ماشي تبقاي هكا وتخليه يهرب _ حتى يدخل لدار كي الناس من بعد ساهل لحال _ علاه ميروحش _ مايجي حتى لنصاص الليالي ومرات لصباح باش يدخل يدوش ويبدل قشو ويروح_ من وكتاه وهو هكاك، خليني من حكايتو فوتي قدامي برك (حسيتها تتهرب ومهيش حابة تقولي وتبدل في الموضوع).
#فريال