قدر مراهقة 2

الجزء 78

#قدر_مراهقة2
#ميرال_مجد
#بقلم_فريال
الجزء 78
قعدو يفهمو فيها ويهديوها وهي مابغات تركح والو قلقت ومن حقها انا مابغيت نقول والو قدامهم علبالي لساني بلا فرانات ونبدا نخلط برك ومجد من بكري يتحلف فيا يزيد يكمل. بعد ماراحو طلعنا لشومبرة لولاد رقدو (مجد كي شاف لحالة مخلطة خلاني نزيد نبات ومام هو بات لتحت في صالة مبغاش يخلينا وحدنا خاف). بدينا نحكيو وانا نقولها متخافيش بلاك سوء تفاهم ومهوش يسكر وهو عاقل وخاطيه _ ايه كان عاقل بصح تبدل _ لا ماشكيتش يديرها _راني نقولك الراجل تبدل عليا ضربة وحدة مافهمتش علاه وكيفاه بصح متأكدة بلي تبدل انا مرا ونحس واحساسي جامي يخيب كان ديما واقف معايا وميخلينيش نبات وحدي وذوك يغيب باليومين مايسقسي مايعيط لدرجة هذي كره مني وش درتلو انا وش دخلني فالشي الي صرا معنديش ذنب هوما يغلطو وانا نتعاقب في بلاصتهم وفوقها مكملين حياتهم عادي كأنو مادارو والو وانا لهنا  نتشوا على نار هادية مكانش الي قال نطل على لمخلوقة هذيك وش بيها وش تحتاج والو نساوني كامل _ منسيناكش بصح تلهينا بمشاكلنا حتى حنا الشي الي فات علينا صعيب متنسايش وش فوتنا ومزال نفوتو وانت علاه متعيطيش تحكيلنا نديرولك حل _ راكي قولتيها الي فات عليكم صعيب مجاياش نزيد نعيطلكم نشكي ونندب على راسكم _ لا امر هذا مايخصكش وحدك يخصنا كامل ويمسنا كان لازم تعيطي فالوقت هذاك باش نوقفوه عند حدو ومايتماداش كثر عجبك الحال ذوك كي وصلنا لمحاكم _ معجبنيش بصح يستاهل خليه يتعاقب الحلوف باش ميبقاش يخمم يعاود العفسة هذي ولوكان تاخذو رايي خلوه يباصي ومتخرجوهش من الحبس يقعد عام ولا عامين يرجعلو عقلو _ وكي يدخل الحبس انت شكون بيك _ نرفد حوايجي ودار بابا تنادي انا الراجل الي ميديرليش قيمة مندورش بيه خلاص _ ربي يهديك مزال مابان والو بالشوي كلش يتوضح واذا كان غالط اكيد راح يتعاقب واذا مظلوم ربي يفك صراحو _ مزالك برك واثقة بلي مظلوم؟ وش من نيتك كلش يثبت بلي هو الغالط _ منعرف بلاك كاين غلط في نص _ مكانششش الرخيس دارها _ ارقدي وغدوا يرحمها ربي ويتوضح كلش _ ان شاء الله. رقدنا ليلة هذيك وش من رقاد مغمضين عينيا ونخممو انا من جيهة غاضني خويا ومن جيهة ستشفيت فيه لانو دارها بيديه يحلها بسنيه هو وش داه لشراب والسهرات علاه عليه لمنكر هذا لوكان شد دارو خير من لمشاكل بصح هو لا تبع الطريق لعوجة حتى خذاتو ودمرتلو حياتو ان شاء الله مايموتش الراجل تفوت لحكاية بأقل الاضرار ونعرفو علاه دار هكا ووش وصلو يحط لخماج في فمو وان شاء الله مايكونش الي في بالي برك لانو ساعتها راح يزيد كرهي ليهم اضعاف مضاعفة.
#فريال