ضفاف الامان

الضفة رقم ٣

﷽

مساكم جوري شذراتي الحلوات 🩵

تصويت وتعليق على كل الفقرات يا احلى شذرااات بالدنيا

{ضفاف الآمان بقلمي ( ميـس ال صـلاح) }

.....
....

آنه تعباااان افهموني !
تطلع روحيييي كل ساعه
إذا ما اموت موت الله اسوي الليله طرگاعه
على عيوني التعب گاعد !
غراااب وينهش بجثه ...
اضم عيوني بيديه
أمثل عود اريد اغفه!
افهموني الوجع اكبر بعد ما ينضم بغرفه
صياااح وناس جاي تموت احس براسي مستشفى
من انامن لا تگعدوني اعتبروني نمت ظالم
ومو شرط النفس موجود
الميت ينحسب نايم
آنه ابن ادم مثلم أچذب لو گلت سالم
قلق يمشي بشراييني
أخافن لو نمت وحدي
خدعوني وعشت هلگد
گالو فتره وتعدي
بعد ما عندي كل طاقه
وصلت وياهم لحديّ
يگتل نفسه بسلاحه اذا يتحاصر الجندي
وحشاهم ما متعبيني انه تعبان من عندي

لشاعرها (عزام الشمري )

::::::::

الكاتبة // ميــس آل صـلاح

::::::::

ما حسيت إلا باب البيت إنهجمت علينا هجم !!!!

يدگون على الباب برشاشاتهم
إتغلغل الخوف بگلبي !
وأسمعهم يحچون بالأجنبي

فكيت الباب وشفت
كومة جنود أمريكان واگفين يم بابنا
دفعوا الباب وفاتوا يحچون ويايه
كلشي ما افهم عليهم
حسيت جسمي كله يرجف من الخوف
وكل تفكيري صار يم جهالي
شلون احميهم من هالحقراء المنحطين

طبوا للبيت ببساطيلهم الخايسه مثلهم
ونگسوا البيت ...
الجهال تصرگعوا بس يبچون خايفين منهم
كلهم بحضني ملتمين
وعمتي ظلت تتوسل بيهم
تريد تفهم شبيهم وشيردون !

شافت واحد بينهم لابس مثلهم
بس هو عراقي واضح على شكله

عمتي چلبت بيه : ولك يمه شتريدون نسوان لحالنا بالبيت ويه هالجهال ... متشوف شلون تصرگعوا من الخوف ؟

الولد العراقي جاوبها : حجية تفتيش ماكو شي لا تخافون !

عمه : هيچ گالوها لعد هجمتوا البيت على روسنا يا يمه ! ما عدكم غيره انتم؟

الولد العراقي : حجية اني مترجم وهذوله أمريكان شغلهم هذا غير ديمشطون المنطقة و يحصرون السلاح

عمه : من كون الله يحصركم بنار جهنم و لا يوفقكم لا دنيا و لا آخره !

المترجم : رحمة الله والديچ حجية ... هسه المهم جاوبيني ليش وحدكم وين ابو البيت