قدر مراهقة 2

الجزء 79

#قدر_مراهقة2
#ميرال_مجد
#بقلم_فريال
الجزء 79
كيما كان لحال فراو لمشكل تاع وائل بالسيف بلمعارف وجريات باش خرجوه والراجل الي ضربو باللوطو سمحلو وبالمقابل بابا لقالو خدمة وتكفل بعلاج يماه وهذا بعد مافاق الراجل وسمح لخويا بلا مايعرف شكون هو ولا ولد من سمحلو وبابا قرر يعاونو كنوع من الشكر على واش دار لانو لوكان ماسمحلوش راهو دخل للحبس وتفزدت حياتو لمزية ظهر عاقل ومتسامح وقلبو كبير وكي حكاولو بلي ضربو غلطة ومش بقصدو تفهم لوضع وسامحو بكل بساطة (كاين عباد حتى وتضربهم لوطو غلطة يستغلو لوضع وميسمحوش لناس حتى يستغلوهم ويدو لمقابل). بعد ماخرج من لحبس وائل عيا يحلل ويطلب سماح من رنيم وهي والو تقول حيط ماتفهمش قالتلو اهمالك وقبلتو بصح ترجع تشرب وتبقى تتلوهط برا فليل هذي منقبلهاش ودار بابا تنادي هاي ليك خليتهالك بطول ولعرض ورفدت ولدها وراحت وهو غاضاتو وندم وبقى يحلل فيا باش نحكي معاها ونقنعها بصح انا رفضت وقولتلو دبر راسك درتها بيديك حلها بسنيك واحد ماضربك على يدك وقالك روح تسكر تستاهل وش صرالك وحتى انو قليل في حقك _ حتى انت وقفتي معاهم ومفهمتينيش _ كيفاه هذي نفهمك راك في عقلك انت تروح تسكر وتخرب دنيا وتبغينا نفهموك علاه درت هكا في روحك من وكتاه انت تروح للحرام نسيت وش علمتنا ماما _ ها اسكتي عليا انت ماعارفة والو مكيش حاسة بواش راني نحس انا كلش جا على ضربة وحدة مرض ماما بعدها موتها ومن بعد زواج باباك _ هاه وهذا سبب مقنع يخليك تسكر متنساش الي ماتت يمانا كامل مش غير انت وكامل تجرحنا وبكينا وعانينا بصح مروحناش للحرام ولا فكرنا فيه كل ماتضيق بيك دنيا كاين الصلاة تريح قلبك علاه عليك لمنكر هذا تخيل لوكان قتلك راجل ماشي ضاعت حياتك ويتمت وليدك وانت عايش وش تربح لتم شعر _ راني ندمان _ ندامة كي تجي روطار ماعندها فواش تنفع ذوك طفرت وطاح الفاس في راس حاول كيفاه ترجع مرتك وتصلح من روحك وترجع كيما خوك خليل رغم كل المشاكل الي فاتو عليه ومزالو متمسك بصلاتو ميراطيهاش خلاص _ نشوف كيفاه نرجعها ونبعد على لخماج مرة وحدة _ ايه بعد لا تلقى روحك وحدك ورنيم تعاود تتزوج من وراك _ تبوس عينها والله ماتتزوج غيري _ انا نزوجها بنفسي مكرة فيك لوكان متسڨمش روحك _ ديريها ونفزدلك وجهك لوقت هذاك _ متقدىش لانو تكون تبكي على مرتك ههههه _ امشي قودي عليا كلبة _ انا كلبة وانت وخويا معناها انت تاني كلب _ ميرال بديتي تاني _ ها خلاص منزيدش نخليك على خير انا نرجع لداري وانت ابقى وحدك زي لغول _ ميرااااال احشمي _ خلاص خلاص باي.
#فريال