قدر مراهقة 2

الجزء 84

#قدر_مراهقة2
#ميرال_مجد
#بقلم_فريال
الجزء 84
عظم الله اجرك وربي يرحم بنتك طير من طيور الجنة ربي عطاهالكم وربي داها الموت حق وكلنا رايحين نموتو ليوم ولا غدوا ربي يصبرك الجملة هذي بقات تتعاود في وذني مرة زوج ثلاثة حتى عيطت فرد عيطة وطحت فلرض على ركابيا نعيط ونبكي ونقولهم كذب كذب بنتي لباس عليها كذابين كذابين بنتي مزالها عايشة راكم حابين تلعبو بيا اكيد هذي لعبة تفاهمتو عليا كامل باش تقلقوني وتزعفوني هيه باينة تردولي فيها كعاد انا ديما نتمسخر ونلعب بيكم ياك هكا ولا راهو حلم نغمض عينيا ونعاود نحلهم نلقى كلش فات وهذا مجرد كابوس بشع وراح يفض ويرجع كلش لطبيعتو ونتلمو انا ومجد وبنتنا الطبوزة ونعيشو في سعادة وهناء. بقيت نحكي وحدي تقول وحدة مهبولة مجد نشوف فيه قاعد فلرض ويبكي بابا تانيك وائل خليل خاوة مجد يماه كامل لحقو يبكيو انا كي شفتهم تلمو هكا جنوني حضرو وتقلقت منهم عيطت عليهم قولتلهم بلعو قودو منا متبكيوش بنتي ماماتتش راهي عايشة علاه تفاولو عليها علاه حرام عليكم وش راكم ديرو بنتي عايشة اعباد الله عايشة ماماتتش متموتش راهي صغيرة تبقى معايا متروحش وتخليني مزال تكبر وتدخل تقرا ونمشطلها شعرها ونلبسها ونقريها بنتي تخرج هي لولى راح تكون قافزة منخليهاش تتاذى راح نحميها بنتي طبوزتي راح تخرج ذوك معايا ونديها لدار ترقد في حضني. مجد محضناتو يماه وانا معنديش ماما هو دارو بيه خاوتو ويماه حاطاتو في حضنو وانا ماما مكانتش ماما راحت ماتت وخلاتني بقيت وحدي مكانش الي يمسحلي دموعي ويطبلي خاطري ويقولي متخافيش ابنتي كلش راح يفوت بنتك راح تخرج بخير متخافيش ابنتي يماك معاك راني هنا منخليكش وحدك، ياريتها عايشة كانت راح تخفف عليا شوي تحطني في حضنها علاه انا مكتوبلي الحزن ولعذاب علاه ديما انا نخسر علاه علاه علاااااااه اربي علاه نضت نخبط في وجهي ونندب ونعيط بأعلى صوتي جهلت نهار هذاك عيا بابا يشدني وانا والو مبغيتش نركح حضنو بارد معجبنيش مهوش كيما ماما الحنينة كنت ننسى كلش في حضنها نحس بالامان عندها حتى ويخونو العالم كامل ويخذلني هي لا متخلينيش ومتبعدش عليا ومتخلي حتى واحد يدخل بيني وبينها الام حاجة مقدسة بزاف حتى ونبقى نحكى منا لغدوا منقدرش نوفيلها حقها، كي شفت مجد دايرين بيه خاوتو ويماه حسيت بالوحدة والعجز الغيرة ايه غرت كعاد يماه معاه وتواسي فيه وانا وحدي ماعنديش يما يتيمة نصارع وحدي فهاذ الدنيا الغدارة الي كل مرة تعطيني ضربة تهدلي حيلي وتقسمني نصين نص محطم وكاره كلش وباغي يهرب من هاذ الدنيا ويروح للاخرة وينهي حياتو ونص الثاني يحاول يتماسك ويقنع نفسو بلي هذا ابتلاء من عند الله باش يشوف قوة صبري وايماني.
#فريال