قدر مراهقة 2

الجزء 85

#قدر_مراهقة2
#ميرال_مجد
#بقلم_فريال
الجزء 85
بقيت نندب ونبكي ونطير كي الطير المجروح الي قصولو جناحو وهو يحاول يبعد ويرجع زي قبل بصح انا قصولي جناح واحد وذوك زادولي واحد لدرجة هذي انا منحوسة نفرح شوي نبكي الدم من وراها خسرت شرفي وقولت معليش مكتوب ربي خسرت برائتي وقرايتي وقولت معليش مكتوب خسرت ماما وقولت معليش قضاء وقدر كانت مريضة وماتت وكبيرة ومكتوب ربي داها وذوك زدت خسرت بنتي الصغيرة الي ماعاشتش بزاف في دنيا هذي وش نقول ذوك مكتوب زهر قدر نحس وش نقدر نقول عليه وش نقدر ندير فهاذ الحالة نرضى بمكتوبي ونسكت ونكتمها في قلبي ونخليها تحرق من داخلي حتى دمرني ولا نوض نحطم كلش ونكسرو ونعيط ونندب بصح حتى ولو درت هاذ الشي ماراح يبدل والو مش راح يرجعلي بنتي ولا ماما ولا البيبي الي ضاع صحيح مزعفتش كي صاع مني لبيبي لانو جا في وقت كنت محطمة وخسرت اعز انسان عندي عليها محزنتش عليه بصح ذوك بنتي كي راحت خلات فراغ كبير في حياتي ومستحيل يتعمر حتى ويجيوني الف طفل وطفلة مش راح يدو مكانها، ندمت على كلش تصروفاتي الطايشة وكي خليتها وروحت بلا ماندور ورايا خليتها وبعدت كأني خليت كاش سلعة من ورايا ولا حاجة من قشي من نهار عرفت بحملي بيها كرهتها وحاولت نقتلها كرهتها لانو هي جات نتيجة الاغتصاب ولانها بنتو هو رفضت وجودها مع لول بصح من بعد تأقلمت وحتى كي ولدتها فرحت بزاف اني جبت طفلة نربيها نلبسها نمشطلها نعدلها نديرلها كلش بصح جاني اكتئاب وخلاني نبعد عليها وهكاك وبقى قلبي معلق بيها طول فترة قعدتي في دارنا بقيت متفكرتها كي يجيبها باباها نبقى نبوس ونحضن فيها بالتخبية عليهم مش حابتهم يشوفوني هكاك ويقولولي كعاد تحبيها علاه بعدتي عليها وخليتيها ومكنتش قادرة نستعرف ونقولهم بلي هذي نفسها الي كنت نحاول نقتلها من قبل وهي نفسها ذوك الي قلبي معلق بيها ومنقدرش بلا بيها وخايفة نزيد نأذيها عليها بعدت هكاك ورجعت على جالها قررت نبدا من جديد ونعطي فرصة لعايلتي الصغيرة ونكبروها مع بعض نعطيها كلش ونعوضها على واش فات. نحن نريد ونتمنى اشياء كثيرة ولكن للقدر رأي اخر، كنت نرسم ونخطط لمستقبلي معاها بصح الموت فرقتنا وبعدتها عليا وهاذ المرة انا مخليتهاش ومبغيتش نخليها كلش صرا فوق ارادتي لوكان جات بيدي نموت انا ونخليها تعيش هي بصح وش يدير الميت في يد غسالو هذا قدري ولازم نتقبلو قدر مراهقة دمرها الحزن وفراق الاحباب وخذلان الاقارب.
#فريال