بين عينيها حكايا

الجزء الأول

#بين_عينيها_حكايا
.
.

.
.
.
.
.

ملاحضة /القصة تصنيفها للبالغين🚫
أكرر هناك بعض المشاهد للبالغين🚫
أذا لم تستطع قرائتها اقرأ الجزء الذي يليها 🚫
.
.
.
.
.
.
.
.

نبدأ حكايتنا من عيناها

والله مااخترت الفراق وأنما
حكمت علي بذلك الأيامُ

___________________
شتاء بغداد
:
:

گاعدة آني وأخواتي الأربعة حوالين الصوبة
وقوري الجاي يفور عليهة وصينية بيهة صحن كليجة وكعك كل وحدة گبالهة كوبهة وكل وحدة تحجي شكل
واني أستمعلهن أستمع لأحلامهن

ومخططاتهن وشيحبن يسوون بعد مانستلم فلوس الراتب  كل وحدة منهن ماخذة زاوية وتنطنط من يمهة وتقاطع الثانية

وكالعادة اخر العنقود ماخذة مكانهة المفضل بصفي
متكئة بعكسهة على رجلي وتباوعلي
بصفنة

-الحلو شبي صافن

شمس- وهج أحجيلي قصة حياة ماما

وهج - شموسة معقولة ماحفظتيهة

نطت ضلال من يمهة

ظلال-اني هم أريد أسمع فدوة احجيهة مرة لخ

شمس- حافظتهة بس من تحجيهة انتِ أحس نفسي عايشة وياهم بذاك الوقت

ضي -الله من أسمعهة من لسانج وصوتج عبالك أسمع ماما ويجي بخشمي ريحة الذرة المسلوگة عالصوبة والحب الشمسي المحمص والبلوط المشوي اللي تسويهن ماما بالشتا

فَي- وصوت المطر والگراگيع واحنة خاتلين كلنة بنفس البطانية مال الجيش التجكجك

وكالعادة بديت أسرد بالقصة مثل ما جنت أسمعهة من أمي واني اتخيلهة بكل مشهد
:
:
:١٩٦٠

بنص النهار والشمس حلوة وريحة التراب
المرشوش بالمي بعد ماكنست امي الحوش
وآني أحنجل بالباب

فرحانة بالثوب الخيطتة إلية أم عناد الخياطة
من قماش البازة المشجر ولابسة الجفية الجديدة
الجابهة جدي ويا من بغداد بوحدة من روحاتة علمود
الكحة القوية اللي بصدرة

يعاني منهة من سنين بسبب التتن والتدخين ومجاي
يطيب لأن مايقبل يترك الدخان
كل شهر ياخذة أبوي وعمي
ويرجع محمل ويا الحلاوة الشكرية والحلقوم
ويجيب الي اني بالذات هدية مخصوص
لو لعابة گطونية
لعبة من الگطن يسووهة ويلبسوهة ملابس مزرگشة
ألوان

لو يجيبلي جفية تصير مثل الحجاب الصغير
مطبوعة ورد والوان حلوة نلبسهة
أحنة البنات الصغار لو يجيبلي ملبس وبيض اللگلگ

جنت مميزة عند جدي ومدللة لأن بس اني
بين اخواني الكبار أثنين
واني آخر شي

وگعدت أمي هاي كم سنة بلا خلفة بسبب الربو
مو زين عليهة الحمل
أخواني طعمة وجليل بالاعدادية واني سبع سنوات اول ابتدائي