🌺عبق ياسمين 🌺 (طور التنزيل )

part103

عبق الياسمين 🥀
🖋️ نور آية 🖋️
بارت...103🍂
بالدعقة مشات ياسمين لتيليفون دوزت نمرة الدار تطلب و تعاود ميجاوبش محمد تسنات شوية حتى جاوبت مراة عمو...
ياسمين: الو خالتي.... لاباس كاينا حداك خالتي سميرة كلميهالي..... الو خالتي عفاك غنطلبك...... لا والو غا جيبي لي كارط ناسيونال ديالنا بربعة و جي عندنا لكوميسارية اللي قريبة ليكم....... لا لا متقولي والو لمحمد راه مكاين والو متخافيش..... صافي......
قطعت معاها و بعدت فحين مشات لوخرى حتى هي صونات لعائلتها حتى سالات و رجعت وقفت حداهم كيتسناو الشاف يكمل شي حاجة كيديرها..... سالا خدمتو هز راسو فيهم تيسوط و رجع هز التيليفون....
الشاب: وي خالد دخل عندي بغيتك (تسنا تا دخل البوليسي باللبسة) خرج هادو للكولوار تايجيو عائلاتهم....
عطاه التحية و خرجهم جلسو فالكراسا اللي كاينين فالكولوار هاد برد عليهم راسهم و رجعت عليهم الندامة و قالو اش دانااااا و علاش مشينا و كونما خفت ليد يخليوهم يعايروهم و يسكتو و هدشي ديما اللي تيوقع للانسان ملي تيندم ديما تيزلق فيها و يديرها قد راسو و ملي يبداو العواقب تيبدا يقول هاااا ندامتي و كون غييير درت درت و كون غير فعلت و فعلت و كون و كون كون و بين الكاف و النون يكون اللي يكون و الانسان مفراسوش بيلا اللي مكتابة ليه توصل واخا يتخبا عليها فجبل توصلك توصلك....
جالسين شي عشرة دقايق هكاك تم داخل محمد و يوسف كيجريو مع شافو البنات توجهو ليهم..... ياسمين غا بانو ليها نغزت حنان و حدرت راسها تتلعن النهار اللي مشات فيه للحمام..... وصلو عندهم كينهجو مخلوعين ماعرفوهم معامن واش تگريساو ولا شنو بداو تيسولو.....
محمد: مالكم اش واقع واش تعرض ليكم شي واحد ولا شنو (شاف وجه ياسمين) مالك نتي فوجهك شكون قاسك دوي
احلام: قصة طويلة اخويا ماتعرض لينا حد صافي تاندخلو عند الكوميسيغ و تعرف.....
يوسف: هادو راه عليهم حالة المضاربة ضاربتو فالحمام...
مكملش هضرتو دخلت مرة كبيرة شوية لكن مازال شادة فراسها توجهت عند البنت تدوي بالجهد و تغوت.....
المرة: تي معامن تاني غا قولي ليا صداعك مكيساليش وريني معامن (شيرت ليها على البنات) دابا هاد زطيونح تاهوما غلبوك و وصلوك للكوميسارية الخراجة حفات لك صافي
محمد:(بصرامة) احتارمي راسك الالة و جمعي فمك شوية...
جا عندهم البوليسي دخلهم عند الكوميسير..... دخلو كاملين توجه عندو محمد و يوسف و من الزهر صدق يوسف تيعرفو جلسو فالكراسا تيتسالمو و يسولو على الاحوال......
يوسف: واش سي مصعب هدا نهار غليض هذا
مصعب: سي تاج الدين عندنا فالكوميسارية حولها ليوم مضلمة اش خبارك اخاي و سي محمد هذا وا نهار مزوهر هذا
محمد: بيخير اخويا ما مزوهر والو ملي ولينا فالكوميساريات مدرناهاش تاحنا دراري
مصعب: هههههه هانيا هانيا غا ملي جيتو معرفة اش كيجيوكم بعدا
يوسف: المدام ديالي و المدام ديال محمد و خواتاتناااا
المرة:(شافتهم غيقلبوها معرفة نقزت عليهم) الشاف راه هوما اللي ظلمو بنتي شوف هوما شحال
مصعب: الالة تجمعي شوية من التنقاز تا نهضر معاك و راه باين اللي مظلوم من اللي لا.....
كمل هضرتو مع الدراري و البنات غا كيشوفو عياو بالوقفة و رجع عليهم العيا ديال الحمام و المضاربة بلا ياسمين اللي كلات الشحط راسها تيزدح و قمشة تتحرقها.....
مصعب:(دوا مع البنت و مها) شوفي الالة على وجه الدراري معرفة غتسامحو هاد المرة مرة اخرى نشوف كمارتك هنا نهبطك تگلاساي يله رولي من هنا.....
خرجو حامدين الله و شاكرينو اللي خرجت طريفة بقاو غا البنات و الدراري اللي يدورو دورة و يخنزرو فيهم خصوصا محمد فياسمين و احلام.....
مصعب:(وجه كلامو للبنات) نتوما اختي بنات نقيات اش وصلكم لبحال هاد النوع اللي خاصو غير علامن يحط باطلو حمدو الله خرجت طريفة
محمد: ربي يحفظك اخويا شكراا بزاف واخا كون جيتي عليا هبطهم يبردو عليهم نيت عضامهم و يجربو برودة السيلون (دارت فيه ياسمين الشوفة ديال ياك وهو يضربها ليها بواحد التخنزيرة تا حدرت راسها مابقاتش هزاتو).....
مصعب: لا لا ماشي ديالهم غا ديوهم وكان يرتاحو راه الخلعة تتحش الركابي
يوسف:(وقف هو و محمد و وقف معاهم مصعب) شكرا اودي اخاي مصعب الله يحفظك و سمحلينا على هاد الصداع
مصعب: مكاين حتى مشكل اخويا بالعكس ملي غي معرفتكم باين الظالم من المظلوم...
شكروه و خرجو البنات تبعوهم الدراري اللول مدواوش معاهم حتى وصلو لطوموبيل وقفو قدامها حتى لحقو عليهم الدراري حل محمد البيبان باش يحطو باگاجهم اللي نصو بقا مشتت فمسرح الجريمة يله بغاو يطلعو وقفهم....
يوسف:تبارك الله على العويتقات صيفطناكم تغسلو وسخكم وليتو فالمضاربة عمرها كانت ليكم المدام اليوم عروسة تا غتصدق حباسة
محمد: مشفتيش نتاااا واحد الملاك عندي متتحركش الدجاجة من فوق بيضها نهار دارت علمات الوجه گااااع خلات فيه السيكاطريس معنديش تاانا بالحق الهضرة ماشي هنا طلعو دابا....
طلعو البنات اللور مزاحمين حابسين الضحكة حيت الموقف نيت تيضحك و الدراري القدام غادين داوين فالخدمة..... بقاو هكاك تا وصلو نزلو خلاو ليهم الباكاج و زادو دقو..... حلات عليهم سميرة اللي كانت حدا الباب تتسناهم غير ايمتى يدخلوووو تخلعت عليهم و ماعرفت مالهم....
سميرة: على السلامة مالكم ياك مكاين باس شنو وقع
احلام: والو اماما ماوقع والو سوء تفاهم و تحل
محمد:(جا وراها) شوفي وجه لالة ياسمين و غتعرفي سوء تفاهم
سميرة:(شافت فيها لقات الشرطة قداش فحنكها شهقت) هييييه ارسول الله مااالكي شكون دار لك هكا
ياسمين: والو اخالتي اجي ندخلو و نعاود ليك... (دخلو للصالون جلسو كينهجو ارتاحو عاد بدات ياسمين تتعود) كنا كنغسلو شعرنا تا وقفت علينا بنت سولتني شنو كندير لشعري قلت ليها والو بقات كتحكر وانا كنحلف ليها وهي تبدا تعاير و تلاحت ليا على شعري نتفتني دابا راه الجلدة تتحرقني و قمشتني.... كلمنا عومانا خرجنا لقيناها معرضة لينا هي و جوج بنات بداو تيضاربو معانا تا وقفت الطوموبيل ديال البوليس هذا مكان..
سميرة: اويلييي بغيت ليها الگرد يعطيها موصيبة شوف كيفاش دارت ليك ياك غا عطيتوهم حتى نتوما
محمد: هكاك الوالدة سيري نتي گاع عاودو دوزيام ميطا وليتو صعيصعات هنا بقات غا الكوميسارية تاهيا وصلنا ليها
تيسير: اويلي بغيتي نسكتو ليهم تا من حنان ههههههههه هزت الطاسة و تتعطيهم (ضحكوووو البنات و حتى الدراري بلا مايحسو)
سميرة:هههههعه هكاك الله يرضي عليكم متخليو حد يحگر عليكم
يوسف: تبارك الله على الدريويشة كنا انطيحو العقد فالكاشو
حنان:(حشمت) سمحولينا راه هوما اللي حگرونا
سميرة: نوضو يا الهبالات بصحة بناتي واللي نسميه راجل يهضر يله نوضو ترتاحو ابنياتي....
ناضو كل وحدة لبيتها سخفانين.... دخلت ياسمين طايح عليها الضيم علاش الله اعلم مع دخلت دارو دموعها فررر جلست فوق الكانابي حيدت الزيف بعدما سدت الشراجم كاملين و طلقت شعرها يرتاح و جلست تنخصص و طيح عشرة للعين تا دخل محمد لقاها هكاك مشا كيجري كيسول فيها مالها....
محمد: ياسمين مالك علاش تتبكي واش تضرك شي حاجة دوي (مد يدو لوجهها تيقلب فيه)
ياسمين:(تنترت منو) بسع مني نتااا اللي ضريتيني خليني عليك (خشات وجها فيدها كتبكي)
محمد: علاااش احبيبة اش درت لك اناااا اللي ضريتك
ياسمين:(هزت فيه عويناتهاااا مدمعين بحال المشة) مابقيتش فيك گاااع ماقربتي ليا ماسولتي فيا فالح غي تخاصم وانا مقلتيش نسول فديك الكلبة اللي وجهها گاع مقموش...
محمد:(بالصدمة شداتو الضحكة حبسها بزز و عنقها عندو هاز راسها عندو تيشوف فيها دموعها مخلطين مع الخنونة و كتنخصص بحال بنيتة صغيرة) نتي برب تا هبيلة واش انا اش عندي من غيرك احياتي راك الحب ديالي نقتل على ودك ولكن راه خفت ملي سمعت الكوميسارية ماعرفت واش تعرض ليكم شي واحد ولا شنو (هبط باس القمشة و دوز عليها صبعو بالشوية مخسر وجههو) دابا نمشي نقلب على هاد الكلبة فينما كانت نوريها تخسر ليا وجه بنتي اححح على حبيبتي..
ياسمين:(عجبتها هضرتو و بغات الضحكة تخرج ليها لكن بقات محافظة على تغوبيشتها و قالت بدلع) نتفااااتني امحمد و قمشاتني ضرتني بزاااف
محمد: الله على روح محمد الله ضرو ليا حبيبتي صافي صافي متبكيش الزين ديالي (هبط على فمها ببوسة رقيقة حتى شبع عطشو عاد بعد تيشوف فعويناتها) يخلي ليا الزين ديالي نوضي دابا داويها تانجيب لك شي كريم ديال السيكاطريس
ياسمين:(ذايبا وسط حظنو مبغاتش تنوض زادت تمخشت فيه و خشات راسها فعنقو كتنفس فيه) خليك بلاتي مازال بغيت نعنقك توحشتك
محمد:(تبورش من نفسها اللي كضرب فعنقو و زاد خشاها فيه و تكا) هاني احبيبي ماعندي فين نمشي (خشا نيفو فشعرها كيشم ريحتوووو)...
حنان دخلت للبيت حيدت الزيف و طلقت شعرها بدات تتنشف فيه بسيشوار خداتو مع الدهاز تا دق الباب و دخلت سميرة هازة ساشي ديال الحوايج.... حطاتها فوق الناموسية و جلست حدا حنان.....
سميرة: ياكما حتى نتي تعطبتي من شي قنت و الليلة ديالك
حنان: هههههههه لا كنت كنضرب من بعيد
سميرة: ايوا صافي تبقى هادي فالتاريخ هههههه لبسي ابنتي هاد القفطان و البلغة و ديري هاد الشبكة فوق راسك
حنان:(ضحكت بفرحة و عنقتها) شكرا بزاااف اخالتي معرفتش شنو غنقولك والله خيرك منساهش
سميرة: سكتي يا الهبيلة سكتي راك بنتي....
خرجات مخلياها تتكمل تنشافها..... سالات و تكات على ظهرها كتشوف فالسقف و مخها مسافر كيفكر..... كتقول واش بصح غنبدا حياة جديدة..... غنعاود نتزوج و نبني عائلة......
غتولي عندي مسؤولية جديدة خاصني نكون قدها و قادرة عليها..... واش اما قادة على هاد المسؤولية..... واش قادرة ندخل فعلاقة جديدة..... واش غنعطي فيها ولا غيغلب عليا الخوف..... و ايلا منجحتش.....
و ايلا صدق كيما اللول..... و ايلا ناض صداع..... و ايلا كانو مشاكل..... واش داك الوليد غنقد نعاملو بحال مو و نسد ليه فراغ الام اللي عندو.....
المعاملة قبل الزواج حاجة و مور الزوااج حاجة اخرى.... واش غنقدر نرضي هاد الراجل و نكون ليه نعم الزوجة..... واش غنقدر نحمل و نولد و مجرد التفكير فهاد النقطة خلا قلبها ينبض بعنف و الدموع يعمرو عينيها.....
اصعب حاجة وقعت و الحاجة اللي خلات الكاس يفيض هي الاجهاض اللي دارت و ولدها اللي مشا...... بقات هكاك حتى جاو عيطو ليها لغدا فهلا خرجات تغدات مع النسا بالضحك و النشاط و كل مرة تجبدها وحدة تاحشموها..... سالا الغدا و تجمعو عندها البنات كل وحدة هازة قشها.....
بدات ليها ياسمين بالشعر سرحاتو ليها كامل بالبلاك حتى بان طويل و دار ليها زيت جونسون اللي خلاه تيلمع..... قادت ليها تيسير الظفيرات بصباغة نيود خفيفة..... ناضت احلام خدمت الشعبي و تحزمت و بقات كتلوز فيها حتى نوضات فيهم الهوايش..... تبعوها ياسمين و تيسير و عاد حنان بقاو كيشطحو و يدردكو تا هجمت عليهم سميرة مع خولة و حياة تاهما بقاو كيشطحووو.....
البيت رجع كيزدح بالدرديك و الدراري مجموعين فالصالون تيضحكو عليهم..... اذن العصر و تفرتك المجمع بقاو غا البنات لبسو قفيطناتهم.....
حنان لبست قفطان بروكار بيج مخدوم بالعقيق ديال العريسات مع بليغة عالية..... طلقو ليها شعرها كيمشي و يجي فوق ظهرها و دارو ليها مكيااااج خفيييف بزاااف عاد دارو فوق راسها فوال ديال الشبكة..... ريحوها و بخروها بالعود و جلسو معاها كيتسناو فالعدول يجي......
عند يوسف كان هو و محمد فالبيت لابس جبادور ابيض و بلغة و مقاد الحالة و حداه محمد لابس قميجة و سروال.....
محمد: هانتا غتعاود تاني تدخل للقفص المصدي
يوسف: مصدي گااااع تسنا نقولها للمدام و غتشوف الصدأ ديالك فين غيوصل
محمد: نتوما اللي عندكم مصدي اما اما مذهب و مرصع بالدياموند هههههه لا معاك بصح و جاوبني بصراحة دابا واش تتبغي ديك بنت الناس
يوسف:(تقاد فالجلسة) شوف اخويا غنجيك نيشان الحب دابا راه مكاينش واش مازال ماكملت حتى شهرين باش عرفتها غنبغيها كاين الإعجاب كاين الاحترام عارف بيلا هاديك بنت الناس هي اللي محتاج فحياتي و فحياة ولدي و الحب مازال يامو جايين..
محمد: اش غنقولك الله يسهل عليكم تستاهلو بجوج كل خير...
اذن المغرب و جاو العدلين دخلوهم للصالون فين كان يوسف و حسن و محمد و الرجال جالسين.....بداو كيديرو فالمعاملات اللولة..... نوضو حفيظة باللي فيها لبسات قفطان بيض حتى هي و نزلت عند حنان اللي كانو معاها البنات خرجتها هي و سميرة و البنات موراهم.....
دخلت للصالة و تتحس بگااع العينين عليها... حشمات و حسات بالحرارة..... جلست فوق السداري و بينها و بين يوسف العدلين فقط.... سولوها على شروطها و على الصداق اللي فالبلاصة جبد ظرف من جيبو مدو ليهم و بدورهم مدوه ليها.....
عطاتو لياسمين بلاما تقلبو ولا والو..... سولوهم واش قابلين و عطاوهم سناو..... تعلنو بزوج زوجا و زوجة..... قراو الفاتحة و دارو دعاء...... خرجو العدلين بعدما خداو مستحقاتهم و بقاو العائلة مجموعين فالصالون......
قرب يوسف لحنان و بدات تيسير مدخلة صينية فضية ليها زوج خواتم و الحليب التمر و تابعاها نسرين بصينية اخرى فيها ساعة ديال اليد و اونسوبل ذهب فبواطات..... خطو داكشي و صلاو على النبي...... مد يوسف يدو بعدما تقابل مع حنان و حيد ليها الفوال..... هزت فيه عينيها بشوية و الشعوو داز بيناتهم..... باس جبينها و ضحك ليها بالرقة تحت تصفيقات الكل......
هزو التمر بزوج بيهم و عطاو لبعضهم و تبعوه الحليب..... هز الخاتم اللي خدا ليها اللي كان عبارة على خاتم ذهبي من زوج قطع سامبل مرصع بحجيرات خفاف لبسو ليها و طبع بوسة على يدها..... هزت هي خاتم فضي بسيط ديالو لبساتو ليه.....
رجع هز لاونسوبل لبس ليها العقد و البراصلي و الخاتم.... تصورو معاهم و صلاو على النبي فرحانين ليهم..... فداخل حنان كاين تخوف صغير لكن متجاهلاه و محاولتش تفكر فيه زيادة باش ميغلبش عليها.....