🌺عبق ياسمين 🌺 (طور التنزيل )

part105

عبق الياسمين 🥀
🖋️ نور آية 🖋️
بارت...105🍂
و تتبغيه حيت هو و ماشي غيرووو..... ماشي غير هو اللي كان داير حاجز لقلبو..... هي كثر منو..... حتى انها كانت بانية حصن منيع حتى حد ماقد يجتازو قبلو..... حاولو كثار و ماخلاو مدارو و بجميع الطرق لكن كان غير الرفض من عندها.....
كان عندها خوف و قلق و رفض..... من كثرة ما كانت كتشوف حالات البنات و أحزانهم و الالم اللي كيسبب ليهم الحب كرهاتو قبل ما تعيشو..... و ظنت انها عمرها غتلقى شخص اللي تعيش معاه الحب السامي..... حتى بان محمد اللي من الأول بين على معدنو الصافي.....
بين على رجولتو و بين انه مباغي منهت والو بالعكس هو كان طامع...... طامع فالحلال مع الانسانة اللي حب قلبو و عشقها..... ختمو ليلتهم بحظن دافي و فداخل كل واحد فيهم كيدعيو ربي ميحرمهمش من بعضهم و يوهبهم الذرية الصالحة اللي تكون ثمرة حبهم و قطعة من قلبهم..... ❤️
عرسانا حتى هوما عاشو اول ليلة ليهم عادي كأي ليلة دخلة..... مكانش مشكل البكرة او العذرية او "الدم" مسبب مشكلة عند يوسف كيما كيسببها للبعض اللي كيقولك انا من سابع المستحيلات ناخد وحدة معندهاش بكرة و مغينزلش ليها الدم و "ماشريفاش" حتى انهم كيقيسو شرف البنت بقطرة دم....
كيقيسو شرف البنت بجلدة.... بمعنى ان البنت تقدر دير اللي بغات و تمشي فنما بغات و تعرا كيما بغات لكن تبقى محافظة على ديك جليدة راها شريفة..... واخا يكون هو مطلق سبعين مرة بالنسبة ليه الراجل غير راجل و خاصو ديما ياخد بنت بنوت..... تبا و سحقا لهذه الافكار.....
الافكار اللي غتخلينا عمرنا نرتقيو و نزيدو القدام..... علاش المطلقة ممنحقهاش تعاود تزوج و تعيش.....الارملة ممنحقهاش تعيش..... المغتصبة ممنحقهاش تعيش..... اللي تزادت بلا ديك البكرة ممنحقهاش..... بأي حق اساسا كيخرجو بهاد الاحكام.... بأي حق سولت لهم انفسهم يحكمو على نساء ضحايا مجتمع ذكوري شرقي بالموت.....
حتى ان الرسول صلى الله عليه وسلم اشرف خلق الله و افضلهم.... تزوج أرامل و مطلقات..... فبأي حق يجي واحد مكيحطش جبهتو للارض.... عارف من الدين غير مرتي دير زيف و الشرع حلل اربع نساء..... و يحكم على بنت اللي هو معارفش اصلا ظروفها بأنها ممزياناش لمجرد انها منزلتش منها قطرة دم.....
نهار غيختفيو هاد الافكار من مجتمعاتناااا..... فاعلموا اننا ارتقينا و اصبحنااا مجتمع يصلح نعيشو فيه.....
و يوسف عمر هاد المشكل ما سبب ليه عائق.... المهم عندو انه عارف ان حنان شريفة و بنت الناس و بنت الاصل..... مغيحكمش عليها بالموت من تجربة فاشلة سببها شماتة معرفش يصون بلارة كانت عندووو بل و اكثر بدلها بشخص من خبثو تفرق الخبث......
دوزو ليلتهم عادي و محسسهاش انها خايبة او ممزياناش حتى انه غازلها و مدح جمالها و جمال ثنايا جسدها اللي مقدرش ينكر انهم حمقوه..... ختم علاقتهم ببوسة على جبينها حاملة كل معاني الاحترام و الود و شكرها..... ماشي حيت دارت شي حاجة ولكن شكرها لانها هي.....
تكاااها فوق صدرو كيلعب فشعرهاااا و يغلغل يدو فيه و هي غير مهدنة تتسمع لدقات قلبو و شفايفها مرسومة عليهم ابتسامة صغيرة تتحمد الله و تشكرو على يوسف و الامان اللي عطاها و تطلب يدوم عليها هاد الفرحة..... فيقها من افكارها صوتو كيسولها....
يوسف: فين تبغي نسافرو احنان
حنان: نسافرو؟
يوسف: اه نمشيو ندوزو واحد السيمانة نبدلو لجو شهر العسل زعما
حنان: معرفتش انا عمرني سافرت فينما بغيتي
يوسف: (حيد ليها خصلات ديال الشعر كانو مدرقين وجهها باش يبان حنيكاتها مزنكين و طالعها السر) وايلي عمرك مسافرتي
حنان: والله حتى عمرني فت الرباط مرة اللي مشيت مع يوسف لسلا و كنت غنموت بالخلعة هههههع
عبدالله:(سرح فضحكتها) علاش مالك
حنان:(بدات تتعود ليه بعفوية) مشينا عند لوستها و خرجوني نتسخر مع المرة ماعندها اللي يتسخر ليها وهو يتبعني واحد الشمكار هههههه والو نتزوج بيك صدقت راجعة للدار بلا سخرة كنترعد
يوسف: هههههه بالسيف ما يتبعك تانتي عاطية للعين تبارك الله زينة معرفت لمن شابهة
حنان:(بعدما كانت ضاحكة جمعتها بحزن) قالت ليا خالتي كنشبه فالعينين لبابا و الملامح لماما قالت ليا يوسف زوينة بزااف و حتى بابا الله يرحمهم....
يوسف:(بقات فيه و ندم علاش جبد ليها هاد الموضوع) الله يرحمهم ياربي يله دابا وقت النعاس و السفر خليه عليا (حط يدو على حنيكاتها و قرب وجهها ليه باش ياخد بوسة من شنايفها) تصبحي على خير
حنان:(حمارو حنيكاتها بالحشمة ضحكت و قالت) الله يصبحك فراحتو....
تكاها على صدرو و طفى الفيوز اللي كانت حداه.... عنقها عندو و غمض عينيه مستمتع باللحظة..... ❤️
يانور فجري..... يا قلبي البعيد 😍
الغد ليه فاقت عروستنا ناشطة و فرحانة و نفسيتها مرتاحة دخلت دوشت و توضات.... لوات عليها فوطة بيضة و خرجت عند بالها غتلقى يوسف مازال ناعس تا لقاتو جالس صدرو عريان كيحك فشعرو مخربق.... بالزربة باش بغات دور خبطت فالفاليز تا طاحت.... دارت بشوية لقاتو تيشوف فيها و يضحك....
يوسف: حشمتي زعما هههههه صباحك مبروك لالة العروسة
حنان:(ضحكت حشمانة) ههههه صباح الخير
عبدالله:(ناض بشورط حتا وصل لعندها باسها فخدها و قال) كيصبحتي مزيان مرتاحة
حنان:(هزات راسها بحال بنيتة صغيرة) اه الحمدلله
يوسف: مزيان لبسي حوايجك ندخل ندوش باش نفطرو و نتحركو.....
دخل و خلاها غطير بالفرحة قلبها كيخبط بعنف و كتحس براسها اول مرة تعيش هادشي..... لبست ملابسها الداخلية و فوقهم اونسوبل سخون و جلابة مخزنية بيضة ستيلها زوين خداتها معاها ياسمين.... نشفت شعرها و جمعاتو..... دارت ايكرون و عكر خفيف و بقات كتجمع الحوايج حتى خرج ملوي عليه الفوطة و الما كيقطر مع صدرو..... شعلو القلوبة فعينيها بالزربة حيدت نظرها عليه و كملت جميعهااا....
لبس حوايجو و خرجو بعدما جمعو حوايجهم كاملين...... وهوما هابطين فالسانسور عامر حاوط خصرها بيدو و جرها عندو بتملك..... هبطو لريسطو ديال الاوطيل فطرو فجو زوين كيتبادلو اطراف الحديث و يحاولو يتعرفو على بعضياتهم كثر....
يوسف: شنو بان لك نمشيو لافران تتكون زوينة هاد الوقت
حنان: كيكون فيها الثلج ياك نمشيو علاش لا
يوسف: صافي نمشيو دابا ناخدو شي حوايج و غدا الصباح نخرجو
حنان: ومحمد امين غنديوه ياك يمشي معانا
يوسف:(ابتاسم ليها) لا غنمشيو ندوزو راس فالراس اش بغيناه
حنان: لا لا عفاك والله حتى ولفتو
يوسف: يالالة غا كنضحك معاك بغيتي نديوه نديوه....
كملو فطورهم بالضحك و خرجو بعدما خلص دازو لبوتيكات ديال الحوايج خدا ليها زوج مونطوات و تريكوات سخان و دي بوط خسر عليها الفلوس.....
مشاو للرياض لقاوهم معرضين ليهم بالحليب و التمر..... مشا يوسف للمحل نيشان و طلعت حنان مع ياسمين و تيسير للبيت..... دخلو حطت داكشي و تجمعو فوق الناموسية كيتحتو....
ياسمين: يالالة و الناس صابحين ناشطين و منورين ما السر يا ترى
تيسير: هههههه الحلوة يا اختاااااه مشفتيهش صابح ناشط يخسر و يشري فالحوايج
حنان: هههههه ماسخات متتحشموش راه غي حوايج البرد غنسافرو لافران
ياسمين: ايوا بصحتك احبيبتي كيدوزتو ليلتكم ياك كولشي سانك سانك
حنان: الحمدلله كولشي هو هداك يوسف صدق حنين بزااف و راجل تخيلو اول مرة غنسافر فحياتي
تيسير: خوتي گااااع رجال ياختي الله يجعل سعدي بحال سعدكم و بصحتك والله حتى فرحت لك تستاهلي
ياسمين: و ايلا قلت ليكم حتى حنا مسافرين و عرفتو فين (خرجو عينيهم فيها) طووووركيا
حنان: بصاااااح سعداااااتك
تيسير: وااااكواك الحق المزوجات عايشات و انا البرد فيا الملل فيا الحزقة فيا يا القردة سيري لطوركيا ديري هوليوود سمايل عند صوفيا
ياسمين: ههههههه طااااالوني محمد يديني عند طااالوني بغيتيه يطلقني تم و يرجع بشي تركية نيت
حنان: شكون هاد طالوني البنات اويلي
عاودو ليها على صوفيا و قلبوها ضحك حتى ضروهم كروشتهم.... شوية ناضت تتقيس الحوايج و هوما تيوريوها شنو تدي معاها حتى قادات فاليز ديالها و عاد نزلو يشوفو الرياض اش واقع فيه.....
محمد فالمحل جالس فالبيرو كيشوف شي خدمة حتى سمع الدقان سمح بالدخول وهي تدخل نعمة البنت اللي خدامة عندو....
محمد: وي نعمة كاين شي مشكل
نعمة: لا اسي محمد غير جات واحد الكليانة تتسول عليك
محمد: شكون هادي و علاش تتسول ياكما قلقها شي واحد
نعمة: لا لا هادي مادموزيل رجاء برحيل اسي محمد راك عارف ديما تتبغي تعامل معاك نتا
محمد: اه وي صافي هاني هابط سيري نتي لخدمتك.....
ناض بعدما سمع سمية..... كيفاش لا و هي كليانة مهمة للمحل بنت واحد من اغنياء البلاد و تتاخد جميع مجوهراتها غير من عندو و قديمة حتى ان صحاباتها و عائلتها كولشي كياخدو غير من عندو الشي اللي كيخليه يكن ليه واحد الاحترام و يدير ليها قيمة حتى انها متاخدش يلا مكانش و كانت هادي مدة باش مجاتش للمحل.....
سد بيروه و هبط بانت جالسة فالبيرو تتدور عينيها..... بنت فالعشرينات من عمرها زوينة بزااف و باين عليها الغنى والترف اللي عايشا فيه..... شعرها الاشقر مصاوباه بعناية مع مكياج متقون مواتي العدسات الرمادية اللي دايرااات....
لابسا صاية قصيرة ديال الجلد كحلة مع بيل اسود و فيست فالابيض و الاسود لايحاها عليها و بوط طوال..... من الساك اللي هازة و الاكسسوارات و الساعة اللي دايرا يبان لك مستواها المعيشي و لأشمن طبقة مجتمعية كتنتمي...
محمد: (وقف عليها ماد يدو) اهلا انسة رجاء نهار كبير هذا اللي شرفتينا
رجاء:(ابتاسمت و فعينيها لمعة غريبة) اهلا سي محمد كيف داير الامور تمام
محمد: الحمدلله تفضلي جلسي شنو تشربي بعدا
رجاء: قهيوة سادة اذا كان ممكن
محمد: طبعا ممكن الله ياودي الانسة رجاء تطلب جمل مشوي يحضر
رجاء:(كتهضر بزرانة و رقي) شكرا ربي يخليك الصراحة ليك وحشة والله العظيم
محمد:(بعفوية) حتى نتي المحل نور بوجودك ايوا اش حب الخاطر نجيب لك الكطالوغ تشوفي الكوليكسيون اللخرة
رجاء:(بغات تهضر وهي تجيب البنت القهوة تسنات حتى مشات عاد كملت) لا الصراحة هاد المرة عندي طلب خاص
محمد: وي مرحبا على الراس والعين بحالاش هاد الطلب
رجاء: الاخت ديالي الكبيرة عيد ميلادها الشهر الجاي و بغيت ليها شي حاجة سبيسيال حتى واحد مدايرها شي اونسوبل يكون خفيف و مرصع
محمد: فهمت طلبك كاينين شي حوايج فالكوليكسيون زوينين و مازال مخرجوش شوفيهم و اذا معجبوكش نتافقو هلى حاجة اخرى.....
جاب ليها الكطالوغ تتشوف حتى استقر اختيارها على واحد خفيف و زوين و عاطي للعين علمها انه غيكون واجد من هنا لواحد السيمانة....
تبادلو أطراف الحديث وهي محافظة على ادب و رزانة فهضرتها حتى انها كتبان قمة فالانوثة..... سالات قهوتها و ناضت مودعاه املا فلقاء اخر..... خرجات من عندو فرحانة كيما ديما وهو وصا الدراري على المحل و خرج.....
تغداو مجموعين فالرياض و جر مرتو واخا طلبوه يبقاو لكن دركهم الوقت و الطيارة اللي مازال تابعاهم عندهم مع الثلاثة دالصباح و عاد جميع الحوايج..... توادعو معاهم و خرجووو فاتجاه عش زوجية ديالهم.....
ياسمين: محمد دوز لشي سيبير مارشي ناخد شي تخربيق
محمد: من هنا نعلمك دي فاليز صغيرة صافي تال تما و خودي الحوايج راه موجودين و رخاص
ياسمين: صافي واخاااا اححح شحال فرحانة.....
وقفو قدام مرجان هز بزطامو و دخلو مشات لجيهة ديال لي برودوي خدات باندوش و شومبوان و لابخي شومبوان و ديودورون و قطن المهم خدات جميع الاساسيات اللي غتحتاج تما..... شافها هزت اولويز قرب عندها كيضحك.....
محمد: باقي مابغا يعفو علك الله من نعومة بالاجنحة و تجيبي شي مومو تيطير
ياسمين:هههههه وااا مكاين والو هاد الساعة مي نديو الاحتياط
محمد: غا ديري فبالك راه متجي من تم تاتجي هازة صبري تقادة ابنت مصطفى....
ضحكت و زادت مخلياه تيسوط..... خلص و خرجو فاتجاه دارهم..... مع وصلو دخلت دوشت باش تربح الوقت دارت دوش خفيف بما انها مستيكية الحالة و دايرا سوان و كولشي..... خرجت نشفت شعرها بفوطة و ظفراتو گرينات باش يله يتبوكلا من هنا تيبغيو يمشيو.....
دخل محمد يدوش حتى هو و هي بدات تتجمع فالحوايج..... جبدت اللبيسة باش غتمشي و جوج لبيسات اخرين حتى لتما و تاخد و الما باقي عمرت الفاليز شوميزات بالالوان و الاشكال..... معولة تخربها.... قادت ديالها كاملة و دازت لديال محمد حتى هو جمعت ليه مستلزماتو.....
الوقت بالزربة داز و وصلات العشرة و كان خاصهم يخرجو يله يتعشاو و يمشيو للمطار بحيت الاجراءات تتاخد وقت..... حلت شعرها اللي كان تبوكلا كامل دارت ليه سيروم و خلاتو مطلوق على راحتو..... لبست اونسوبل ديال الخيط عبارة على بيل خفيف بيج و سروال فنفس اللون واسع مع جاكيط سخونة كحلة و سبرديلة بيضة.....
هزت ساك متوسط غتهزو معاها فيه گاع داكشي اللي غتحتاج و خرجو بعدما تأكدو من ان كولشي مسدود و البوطات طافيين......وصا محمد الكونسييرج و دور معاه حتى غرقو دعاوي و مشاو فاتجاه مطار الرباط سلا.....
تعشاو و دارو جميع المعاملات و دفعو الباگاج و بقاو كيتسناو موعد طيارتهم اللي كان قطعها محمد فالبيزنيس كلاس لاسطنبول باش يمشيو مرتاحين..... وهوما جالسين ياسمين جالسا و محمد حاط راسو على فخاضها و يديها تيلعبو فشعرو.....
ياسمين: حبيبو الطوموبيل شنو غدير فيها
محمد:(هز فيها عينو ضاحك) جديدة تاني هاد حبيبو اختي ههههههه خليتها فالباركينغ في امان الله وحفظه خفتي على خرشاشتك
ياسمين:(نتفاتو بالشوية) بزاف علك تا خرشاشة مالك شاريها ليا
محمد: ايه تتنتفي يا المصفرطة مالك شكون شراها لك كنتي خدامة فوزين الكحبة
ياسمين: شوف دابا غرضك تعصبني ياك
محمد: احححح كون تعرفي غرضي غرضي نتكي والديك هنا و ندير لك ماكلة جمل
ياسمين: راه انا اللي غندير لك ماكلة الضبع
محمد:(هبط ليها راسها لعندو و قال بهمس) كولشي من عندك زين ازين (طبع بوسة على شفايفها)....
وصلو للديار التركية بعد رحلة طويلة عياو فيها نيت.... خداو طاكسي بعدما وصل باگاجهم و دارو جميع المعاملات فمطار اسطنبول الدولي.... اتجهو لأوطيل فور سيزن واحد من احسن الاوطيلات فالمدينة كيطل على البوسفور وصلو ليه و مع نزلو تبهضت ياسمين من جمال المنظر.... هندسة معمارية خطيرة و تصميم أروع بلا الضواو و داكشي غير الدخلة واو....
ياسمين: هادشي زوين بزاااف امحمد باينا غالي
محمد: تا حاجة متغلا على حبيبي
ياسمين:(عنقات يدو) ياااااي شكرا حبيبي بزااف
دخلو اكدو الحجز ديالهم و خداو الكارط و جا عندهم الشخص اللي كيجر لي فاليز فكروسة..... طلعو فسانسور و ياسمين متحمسة......
خداو شومبر زوينة فيها شرجم كبييير تيطل على البوسفور و البالكون فيه جليسة تيطل على البيسين..... غرفة رائعة بالدوش ديالها.....مع دخل ليهم الولد لي فاليز دور معاه محمد و سد الباب.....
دار عند ياسمين اللي كانت تتحيد فسبرديلتها ماحسات بيه حتى هزها و لاحها على السرير و طلع فوقها مكالي بيديه باشما يرميش بثقلو عليها.....
محمد: شحال وانا صابر علك و شاد روحي عليك بسيف
ياسمين: خلعتيني امحمد
محمد: محمد مرض بيك ابنت الناس وا عطيني دوايا ولا نهتر و نخرج نحيح على التواركا
ياسمين: ماشي دابا عافاك غنموت بالعيا و عرقانة خلي غير حتى ندوش
محمد:(هبط لوذنها عض ليها اللحيمة ديالها حتى قفزت و رجع همس فيها) باغيك بكلشي ليك و كيما كنتي كنتي
ياسمين:(كبرت عويناتها وسبلاتهم) دقيقة امحمد دقيقة
محمد:(ساط و تلاح عليها لجنب كيسوط) نوضي الالة تابعاك تابعاك غا نوضي...
لاحت ليه بوسة و ناضت بالخف حيدت جاكيط الفوقية.... مشات للفاليز جبدت طروس و بينوار و ملابس داخلية و دخلت بجرا للدوش..... جمعت شعرها كلو الفوق..... حيدت حوايجها و دخلت دوشت بلاما تغسل شعرها....
نشفت بالخف و دهنت لحمها بكريم مرطب ريحتو زوينة.... لبست ملابس داخلية شبكة فالبيج مع بينوار حريري واصل لنص فخدها.... عقداتو و رطبت وجهها..... دارت مرطب شفايف كيلمع..... خلات سنيسلة رقيقة فعنقها و خلخال ذهبي فرجيلاتها..... جمعت الدنيا و
خرجت حفيانة كتمشي على طراف صعبانها..... شافت جيهة السرير لقاتو متكي سفاحي غير بلكالسون..... ضحكات وهي كتشوفو غير كيسوط و معاجبو حال..... حنحنت باش ينتابه ليها و فعلا هز راسو هو يتبهض..... ديما باهراه و مفاجآه رغم انها مكديرش شي مجهود لكن كلها على بعدها كتعجبو و تيموت فيها....
تسناها تا وصلت عندو..... جرت حزام البينوار و هي كتشوف فيه بنظرات اغراء..... لاحتووو برجلها و مشات فوق السرير على ركابيها تا وصلات عندو..... بغفلة منها جرها فوقو و خدا شفايفها عندو كيلتاهم فيها..... مكان عندو لا الوقت ولا الجهد باش يهضر....
دخل نيشان فالتطبيقي...... من قبلة رقيقة تحولت لقبلة عنيفة ترجمات وحشو ليها.... ترجمت الحب القوي اللي كيكنو فيها.... حتى انها مقدرتش تجاريه فقبلتو..... كلا ليها شفايفها حتى رجعو كلهم دم..... للحظة حبس.... بعدها عليها و شاف فعينيها بنظرة عمييقة..... محاول يوصل ليها افكار كثيرة و مشاعر اكثر..... قال بصوت فيه بحة رجولية دخلات مع مسامعها بحال سيمفونية.....
محمد: حياتي قلبتيها..... رجعتي مني دري صغير تتحركيه كيما بغيتي.... رجعتي مني مريض و دواه نتي.... اش درتي فيا ابنت الناس
ياسمين: ماشي حسن منك انا.... ايلا نتا مرضتي انا راه نموت بلا بيك... حتى اني كنطلب ربي يجعل نهاري قبل نهارك
محمد:(حط سبابتو على شفايفها و ضغط باش تسكت) ششششش متجبديش على فمك سيرة الموت مازال الدنيا قدامنااااا ششششش....
بخطوة جريئة منها عضت على صبعو باغراء..... باش يرجعو يغوصو فعالمهم الخاص..... عالم فيه هو و هي..... متحدين اجسادهم و قلوبهم..... كيمارسو الحب على اصولو..... كيوصلو لبعضهم احاسيسهم بالفعل قبل القول...... كتوصل ليه حبها بقبلات و حركات..... و كيوصل ليها حبو بقبلات و كلمات الغزل.....
دوزو ليلة طويييلة رغم العيا الا انهم حتى حد ماقدر يمنع نفسو على لاخر..... ختمو ليلتهم و علاقتهم فالدوش فين بقات فاحظانو فالبينوار عامر بالما حتى بدا الحال كيصبح.... ناضو كل واحد دوش و خرجو نعسو فاحظان بعضهم بعد ليلة بقات مرسخة فعقولهم..... 🔥
#يتبع_غدا ❤️❤️
غنعييييشو تاااني الحب فطركيا مع هاد الجوج 😍😍 داخلين فأحدااااث ناااار يا حبيبي نااااار 🔥🔥 خليييييكم أكتيييف معايا و كثرو من التعاااليق
#