شريان قلبي (طور التنزيل)

part12

‎الجزء 12✨🦋

‎#شريان_قلبي بقلم #عهد_تلمسي
‎وصل للڤيلا ، خرج من الطونوبيل و تمشى حتى وصل للباب ، حلّوا و كيسمع الصقيل و الضواو مطفيين ...طلع فالدروج و وصل قدام الغرفة ، حلّ الباب و بانت ليه ناعسة بحال شي أميرة .. شعرها مطلوق على المخدة و وجهها منوّر .. قرّب من الناموسية ، جلس قفازي و دوّز يدّو على خدّها بشويا .. كيفكر شنو غيدير .. واش يخدم بهضرة صاحبو و عائلتو و ينسى كلشي ولا يخلّي هاد الزواج غادي كيما هو حتى يكتاب شي نهار و يطّلقوا .. يطّلقوا ؟ جاتو صعيبة يفكّر فيها واخا باقي ما عندو تجاهها حتى نوع من المشاعر و لكين كيحسها ولاّت جزء من حياتو .. ناض من الوضعية لي كان عليها ،حط ليها التيليفون حدى راسها و خدى سروال رمادي ديال الدار ، دخل دوّش و لبسو ، خرج من الدوش نشّف شعرو .. بقى شحال كيكفر واش ينعس حداها ولا يجيب سرير آخور .. فالأخير اختار ينعس حداها حينت فديك اللحظة بالضبط كان محتاج يشم ريحتها من ورى نهار شاق ديال الخدمة ... هز الغطى و تكّى حداها .. قرّبها ليه بشويا و هي بسرعة فعز نومها حطّات راسها على صدرو و يديها كذلك .. ابتسم بدون شعور مع الحركة لي دارت باللاوعي ديالها .. ضوّر يديه على خصرها و بقى كيفكر حتى داه النعاس ...
‎ساجدة : لا لا انا بنت الناس .. انا ماشي شي وحدة مامزياناش 
‎فاق آسر وسط الليل مخنزر كتبانليه ساجدة كلها عرقانة و كتمتم بشي هضرة .. عرفها راها عايشة شي حلمة خايبة .. حرّكها بشويا و هو كينادي باسمها باش تفيق ... حلاّت عينيها و هي مخنوقة و كتنهج بحالا كانت كتجري .. كانت الدمعة على طرف عينيها .. هزّات راسها لي كان على صدر آسر و شافت فيه شوفات ضعف و انكسار .. هضرة جميلة قصّحاتها و هانتها ...
‎شدّ وجهها بين يديه و تكلّم و هو كيفحص فوجهها .
‎آسر : ساجدة تهدني انا معاك .. قولي ليا مالك ؟ باش حلمتي ؟
‎ارتابكات و ماعرفاتش واش تعاود ليه ولا لا .. خافت تجبد مشاكل فالعائلة و هادي ماشي عادتها و ماشي من أخلاقها .. اكتفات انها حدرات عينيها .
‎آسر : (بعصبية )عفاك أ ساجدة دوي ما تخلينيش هكّا كنفكر شنو طاري ليك
‎نزلوا دموعها بسرعة ..كانت أصلا نفسيتها مدّمرة و زاد عليها بالغوات .. حسّات براسها بوحدها كتواجه هاد الأحاسيس ديال الإهانة لي خلاّتهم فيها جميلة ... اما هو فاش شاف دموعها ندم حينت انفاعل عليها بسرعة .
‎آسر : ( قرّبها و عنّقها ) صافي شششش بلاما تبكي دابا .. الى ما بغيتيش دوي غير نساي و تكالماي .
‎رجعوا نعسوا و هي شادّة ليه فالتريكو ديالو .. بينما آسر بقى كيفكّر فالسبب لي خلاها تولّي هكا .

‎أصبحنا و أصبح الملك لله
‎فاق آسر هو اللول .. دوّش و لبس حوايجو نزل للتحت كتبان ليه طابلة الفطور واجدة و خارجة واحد البنت من الكوزينة كتحط فالطباسل ..غير شافتو سهات فيه حينت قالوا ليها غتجي تخدمي عند واحد الكوبل و لكين ما توقعاتش راجلها يكون تيتيز .
‎مريم : صباح الخير سيدي ( و هي كتفرنس )
‎آسر : صباح الخير ( محافظ على غوباشتو )
‎جلس فبلاصتو كيشرب فقهوتو ... ما دازش بزاف ديال الوقت حتى بانت ليه ساجدة نازلة فالدروج لابسة شورط فالكحل و تريكو فالزرق .. كانت نازلة و منتابهة لرجليها باش ما تقّلش عليهم .. حسّات بيه غينوض من بلاصتو باش يجي عندها و هي تهزّ عينيها فيه و ابتاسمات .
‎ساجدة : غير خليك .. را وليت حسن .
‎مع ذلك مشى عندها و طلع درجات قلال باش وصل ليها و مدّ ليها يديه .. شافت فعينيه لي كعادتهم خاليين من أي مشاعر .. كتحسّ فيهم جروح عميقة مخفية ورا داك اللون الرمادي لي مزيّن عينيه .. رغم هادشي كامل الطريقة باش كيعاملها كتخليها تحس براسها أميرة .. شدّات فيديه و بقى هو نازل معاها درجة بدرجة حتى وصلوا للطابلة .. فهاد الأثناء كانت مريم مقابلاهم و كدوي فخاطرها " و تا هي ما صدقاتش خايبة و تيتيزة من الفوق .. ( خسرات سيفتها ) سعداتها بيه "
‎جلسوا فالطابلة ديال الفطور و هي مستغربة من شكون وجّدها.. بقات كضّور فعينيها حتى دوى آسر .
‎آسر : را صيفطات الواليدة خدّامة تعاونك فالدار ..
‎أومأت ليه ساجدة براسها بعدما أرضى فضولها و ما بغاش يخليها ضارها راسها .. فطرات على خاطرها و هي تسمع تيليفونها كيصوني .. هزّاتو بان ليها رقم جوديا .. هز فيها آسر عينيه من بعد ما كان كيقرى فواحد المقال .. جاوبات ساجدة فالحين .
‎ساجدة : ألو جوديا (تعمدات تقول اسمها باش يرتاح آسر )
‎جوديا : ألو مرات خويا كي دايرة ؟
‎ساجدة : لاباس الحمدلله و نتي ؟
‎جوديا : الحمدلله .. انا صراحة عيطت عليك على قبل داكشي لي طرى البارح .. عارفة مرات عمي ديما كتزبلها بهضرتها و لكين ماديش عليها .
‎ساجدة : لا لا ماشي مشكيل
‎جوديا : واخا تقولي هكا .. را شفتك لبارح كي ولّيتي و دموعك كانوا قراب ينزلوا .
‎ساجدة سكتات حينت ماعرفت ما تقول .. كتحاول ما يعرفش آسر و لكين ما عندها حتى شي جواب لي غتقولوا ليها .. بقات ساكتة بضع ثواني و هو الشيء لي ردّ ليه آسر البال و ما بغاش يبيبن .
#تتمة