🌺عبق ياسمين 🌺 (طور التنزيل )

part106

عبق الياسمين 🥀
🖋️ نور آية 🖋️
بارت...106🍂
فالمغرب و تحديدا فدار شيماء.... دار من جوج طبقات كبيرة و زوينة مصبوغة و مجلجة و حتى فراشها زوين و نقية..... جالسا زبيدة (ام ايوب) فالكوزينة تتنقي الخضرة للغدا.... كانت العشرة و نص دالصباح جالسا و كتنكنك حتى دخل عليها ايوب يله مدوش مازال شعرو سارد جاي كيتمختر دخل لقاها جالسا هز قرعة و كاس و جلس حداها.....
ايوب: صباح الخير الوليدة
زبيدة: ظهر الخير هذا يله فايق متابعك والو
ايوب: الويكاند الواليدة هذا متنكديهاش عليها اش بغيتي نوض نعجن لك
زبيدة:(خصرت سيفتها) اممم تعجن عجنت تا مرتك اللي مازال خامرة لدابا معولة تفيق تلقا كولشي واجد
ايوب: وا راك عارفة الواليدة حاملة و مولفة الفشوش خليها ولا سيري فيقيها المهم خرجوني سوقكم
زبيدة: حاملة كتقول فيها بوجهك حمر واااا حشومة تقولها و نتوما درتوه فالحرام. الفشوش اللي مولفة راه خلاتو فدارهم كون بقات عا ديك الحرامية ديال حنان كنت مستفاداها
ايوب: فيناهيا حنان ضبرت على راسها بنت الكلب بالحق واللهما تبقى فيها
زبيدة:(خرجت فيه عينيها) اش بغيتي بالخنز يله گلنا تفكينا منهاااا باغي تجيبها تاني (يله بغا يهضر تسمع صوت اللور)
شيماء:(جاية كتعيوج ببينوار مزير عليها و الشعر مطلوق مناقصها خير) شكون هادي اخالتي
زبيدة: غاااا واحد الكلبة حاشاك مع ولدي تيموت على الكلبات يحيد وحدة يجيب التانية
شيماء: اويلي على كلبة حماقيتي اايوب راك عارفني حاملة خايب ليا
ايوب: مديهاش على الواليدة راها غا ضاحكة معاك جلسب تفطري
زبيدة: ما بقا فطور ايلا بغيتي تفطرو قادوه فطرت انا و باك و غسلت الماعن بغيتي نخليهم تال العصر
شيماء: (ميقت فيها) وحنا اخالتي كون غي خليتيه لينا
زبيدة: ايوا مناشي باردة القلب و ميتة ليا النفس تانخلي الماعن تال وسط النهار النسا الحرات دابا راه غداهم مردود و خبزهم طايب ولايني دارتها قلة نفس بنات اليوم....
شيماء:(تمرحت فوق الكرسي تتشوف فظفارها) ايوا حتى انا مولفة الخدامات يوجدو ليا ممولفاش نوقف نصاوب فطوري (ناضت و خلاتهم)
زبيدة:(تفقصت و تعصبت من هضرتها و برودة دمها) مكذبتش اولدي ملي قلت لك تتموت على الكلبات وليت نتعاير قدامك ولا حركة منك يا قليل النفس تفو على الرجالة بحالك
ايوب:(تعصب ملي قالت ليه مو هكاك ناض بعصبية مشا للبيت لقاها واقفة تتقلب فتيليفونها مشا ليها نيشان شدها بغفلة منها من شعرها و جرها لعندو و دوا بصوت مغدد) كووولشي نسكت ليه تال الواليدة ديك الهضرة ديال بنات الق&$# ماعندي ماندير بيها مي تحتارميها و يدك فوق راسك تتسمعي..
شيماء:(مصدومة تتوجع و تتحاول تفك منو) طلق منييي طلااااق واش حماقيتييي انا تضربنييي
ايوب:(زاد زير عليها و داها و جابها حتى حست ببنادم مشا و جا فكرشها) شششش صوتك ميعلاش الكلبة دابا غتبدلي هاد الحالة و تخرجي تعاوني الواليدة ولا معجبكش الحال رجعي للدار باك يلا قبلو بيك.... (طلق منها و دفعها حتى تزدحت مع الحيط)
خرج ايوب خلاها شادة كرشهت كتوجع و دموعها نازلين..... ماشي دموع الحزن و انما دموع الالم و الغضب.... ممتيقاش كيفاش قدر يعاملها هكا شافت تا عيات و ناضت بعدما فاتتها كرشها خرجت تعاون زبيدة خايفة يرجع ليها تاني حيت عندو الحق....
هاهيا مدارتش بهضرتو يا تاكل العصا يا ترجع لدار باها اللي اصلا مبقاتش تقبل عليها.... خرجت لعندها للكوزينة محاملاش راسها دوات فوق خاطرها....
شيماء: فاش نعاونك اخالتي
زبيدة:(شافت فيها لقات عينيها حمرين عرفاتها غتكون باكية ضحكت و قالت بتمسكين) ايوا ابنتي مبغيتش نشقيك و نكثر علك ولكن داك الصالون من شحال هادي متخمل ملي ضرني ظهري
شيماء: اويلي اخالتي صالون كامل
زبيدة:(رفعت صوتها باش يسمعها ايوب) ايوا ابنتي واه الظهر قلتني اما كنت تنخرج ربعة فنهار
شيماء:(سمعت ايوب كيحنحن) واخا ولكن خاص اللي يعاوني
زبيدة: هانتي راه داكشي ديال الميناج فالطواليط لتحت طلعي لي برودوي و داكشي و راه ايوب يهز معاك السدادر حكي الحيوطة و الارض و مسحي الثرية عاد فرشي الله يرضي على بنتي.....
ناضت تترمي الخضرة فالطنجرة مخلياها تتقلا فسمها تا شبعت و مشات حيدت البينوار بقات بكولون و تريكو جمعت شعرها و شافت فظفارها اللي عاد دارت ليهم الجيل تتحسر عليهم..... جابت لي برودوي و وقفت عليه مرح فالصالون كيتفرج فالتلفازة....
شيماء: نوض هز معايا السدادر نخويو البيت
ايوب: صبحنا على الله لاش تاني يله ريحت منرتاحش
شيماء: ايوا مك قاتليا خملي البيت
ايوب: شوفي راه ها وذني منك داك ديسكور ديال مك مرتك معنديش معاه....
ناض بدا تيخرج معاها كولشي تا خوا البيت و هي غير شادة ظهرها اللي عطاها الحريق مع مموالفاش الهزان.....عمرت السطل و دارت ليه شوية تيد و جافيل و بدات تتخوي فالما تا وقفت عليها زبيدة.....
زبيدة: هذا هو الحكان فبلادكم ابنيتي
شيماء: كيفاش غنحك الحيط راه كبير
زبيدة:(زادت التيد و جافيل فالسطل حتى طلعت الرغوة و هزت شيتة عمرتها و بدات تتحك) هكااااا تيحكو الناس و دابا حكي كولشي و القنات خصوصا و حكي الارض تاهيا...
شللات يديها و زادت مخلياها تتحك على قلبها و تشلل حتى تهرسو ليها گاع ظفارها.... سالات و جلست ترتاح بينمااا نشف البيت تتحس بظهرها غيتقسم هاهو خرج ايوب لابس و مأنتك دارت شافت فيه مطلعاه و مهبطاه و قالت.....
شيماء: على فين بالسلامة
ايوب: موالف كنتشاور معاك امدام خارج عند صحابي
شيماء: ايه وانا شكون غيدخل معايا هادشي
ايوب: اري ليا طابلية و جلسيني حداك سميني سعاد لا تشاو بيبي....
خرج خلاها غتموت بالفقصة رجعت البيت كلو بوحدها ماسلات حتى سخفت و ظهرها تقسم.... فرشاتو كامل و مسحات الديكورات و ها زبيدة تتعيط باش يتغداو.... مشات تتلهت رمات السلام على شيخها و ريحت غتموت بالظهر.....
شيخها(عبدالحفيظ) : امالك ابنتي واحلة فروحك و تتخرجي فالبيت خليه تنجيبو المرة اللي مولفة تتجي ليه كل مرة
زبيدة:(يله بغات تهضر سبقاتها) ايوا هانتا تشوف الحاج عيت فيها قاتلك والو اخالتي البيت توسخ نخرجو قلت ليها نجيب لك مرة قاتلي الدار داري و قادة بيها
عبدالحفيظ:تبارك الله الله يرضي عليك ابنتي
ابتسمت ليه شيماء و الصدمة مابغاتش تسرط ليها كيفاش نكرتها بقات غا كتشوف حتى الماكلة مبغاتش دوز ليها.....
اللِّي كَيْعَمْلُه إبْلِيسْ في عَام, تْعْمله العْكُوزَة فْسَاعهْ
عند محمد و ياسمين.... فاقت ياسمين كتحل فعينيها بزز تتحس بالبينوار ديال الدوش اللي نعست بيه ملوي عليها و شعرها مخربق..... تحسست بيدها البلاصة حداها ملقاتش محمد....
هزت راسها ملقاتوش.... جلست فالسرير تترتاح و تستوعب فين هي و شكون هي و اش كدير.... ناضت من بلاصتها طلعت الريدو حتى دخل الضو..... دازت للكوموند لقات وريدة حمرة محطوطة فوق ورقة مطوية..... خدات الوردة بابتسامة شماتها عاد هزت الورقة حلاتها لقات محمد كاتب فيها
"صباحو حبيبة بدلي و هبطي عندي"
حطاتها و دخلات نيشان للدوش غسلت هاد خرجت لبست ملابسها الداخلية بالخف و جبدت حوايجها اللي غتلبس عبارة على مومي جينز ازرق مع بيل كولو طالع شوية مزير كحل و فيست بوردو.....
عقدت الفيست و دارت معاها ويست باگ او حقيبة خصر ديال الجلد..... سرحت شعرها بالزربة وغي من الفوق. و جمعاتو ذيل حصان مع مكياج خفيف نهاري بعكر خفيف..... رشت عطرها و لبست سبرديلتها و خرجت....
نزلت للاستقبال تتقلب على محمد تا بان ليها جالس فجريدة لورانيا.... وهي غادة عندو كيبان ليها جالس مع شي واحد او بالأحرى وحدة..... عقدت حواجبها باستغراب مظنتش انه ممكن يتلاقا مع شي واحد تيعرفو.....
وصلت عليهم شافها هو اللي كان مقابل معاها ابتاسم لكن البنت كانت عاطياها بالظهر شافت غير شعرها المطلوق على راحتو و شمت عطرها.....
ياسمين:صباح الخير
محمد: صباح النور جلسي تفطري (شافها شارت ليه بشكون هادي) غير جلسي هادي انسة رجاء كليانة مهمة ديال المحل و تلاقيتها صدفة ملي نزلت....
ياسمين:(جلست و عاد شافت رجاء اللي كانت هاد المرة على طبيعتها بعيونها البنية و وجهها الصافي صدمتها بجمالها ابتاسمت ليها بود و مدت يدها تسلم عليها) اهلا انسة رجاء متشرفين
رجاء: اهلا حبيبتي متشرفة بيك لكن معرفتش نتي شكون (طلعاتها و هبطاتها)
ياسمين:(معجبتهاش طريقة هضرتها لكن صرطتها و قالت بثقة) انا ياسمين مرات محمد
رجاء:(شافت فيها بصدمة و رجعت شافت فمحمد و قالت باستغراب) نو واي متقولش ليا تزوجتي ايمتا و كيفاش واو
محمد:(على نيتو قال) ايوا هادشي اللي عطا الله ربطتني هاد بنت الناس مخلاتنيش مازال نتفافا (شاف فيها لقاها تتخنزر فيه ضحك عند بالو غير كاضحك)
رجاء:(بضحكة استفزازية) هههههه ايوا ملي هكا حالك ساهل بالزربة تفك غا حبيا
ياسمين:(عصبها محمد بجوابو و كملت ليها رجاء الباهية قالت بحدة) حتى دابا يلا بغا مرحبا حشومة نشدوه صحة (وقفات تحت نظراتهم) معجبنيش هاد الفطور غنمشي نشوف شنو ناخد (زادت تحت نظرات محمد المستغربة ناض وقف حتى هو بغا يتبعها)
رجاء: سمح ليا امحمد اذا كنت خلقت لك شي مشكل بسبب كلامي انا والله دويت عن حسن نية و غير ضاحكة
محمد: لا لا بالعكس مكاين حتى مشكل نخليك دابا حتى نتلاقاو ( زاد تابع ياسمين فين مشات).
رجاء:(تبعاتو بنظرها حتى اختفى عليه و قالت وهي تتشرب قهوتها) حالك ساهل القطيطة ماشي نتي اللي تغلبيني...
تبع محمد ياسمين مستغرب من حدتها و تصرفها اللي عمرو كان ليها مع انه كيشوف انه لا هو لا رجاء قالو تا حاجة غالطة غير ضاحكين و صافي و ظن انها ولفات ضحكو....
لقاها واقفة فالبيفي ديال الفطور هازة طبسيل كتهز فيه داكشي اللي بغات تا وقف عليها....
#يتبع ❤️❤️
صدقت هي مولات اللمعة 🤣🐍