قمر الإنتقام

✨الفصل السادس عشر ✨

قمرة : وي أمير 
أمير : قمرة صرات كارثة 
قمرة : واش كاين ؟ أهدر بلعقل (حكالها وهي تشوكات 😳) خلاص دوك نجي نتا اسبق وأنا نلحقك 
دخلت تجري لبست سروال كحل جين وسويت زرق بقلمونة وباسكات بيضا وراحت للصالون 
قمرة : بابا لازم نروح عند خالو تيم ايرجون 
منصف : روحي وبالاكي على روحك 
(رح تجيكم بيزار كيفاش باباها خلاها تخرج في الليل لأنو ببساطة هو يعرف بنتو ويدير كونفيونص فيها وزيد راهي رايحة عند خالها تسما باينة بلي راهي في أمان تروح بالطونوبيل وتولي ) 
قمرة : صحا ، كي نوصل نعيطلك 
خرجت تجري بعد ما بلاصات قلمونة تاعها نوضت وقلعت تجري ، وفي الطريق عيطت لتيم 
قمرة : خالو راني جاية ، وقلت لبابا بلي راني جاية عندك 
تيم : ارواحي ارواحي 
وحد الساعة ولحقت للمقر  تاعهم وطلعت ديراكت لمكتب الإجتماعات الخاصة ولقات لتم أمير تيم مجيد وأنس ، قعدت قدام أنس وأمير مقابلها 
تيم : بما أنكم هنا ندخل في الموضوع ، الجماعة لي كنا نتبعوهم وراحو أمير و قمرة للمكان تاعهم ، اليوم لقينا المصنع محروق لأسباب مجهولة والحراس زوج لقيناهم مقتولين  مرميين فالبوبال لي لتم ، بصح على حساب تقرير الشرطة العلمية الأدلة ماراحوش كامل نصهم برك والباقي كامل في القبو 
قمرة : وكاميرات المراقبة ما حكموا والو ؟
أنس : لي دار الخدمة هادي خططلها مليح ستنى وقت المناوبة تاعهم وكان عطل الكاميرات كامل باش دخل 
أمير : ودوكا كيفاش ؟ البلاصة لي كنا نعرفوها عليهم راحتلنا 
تيم : راح نستناو خبر من عند مخبر ديالنا لي عندهم باينة بلي كي يعرفو رح يتحركوا ويروح لبلاصة وحدوخرة ، بما أنو المكان تحرق ، كونو حذرين هاد الأشهر رح تصعاب الحالة وماشي محال تتخلط رح نكثفو الخدمة ونزيدو تحقيقاتنا عليهم ، أي معلومة جديدة رح نشاركها معاكم تقدرو تروحو 
خرج أنس مع أمير وقمرة وبقى تيم مع مجيد يهدرو وكان باين على تيم مقلق شوية 
قمرة : أنس وشبيه جنرال مقلق ؟ كاين حاجة وحدوخرة ولا ؟
أنس : معلباليش أنا بصح غير سمع بالخبر تقلق فوق اللازم ماشي كيما موالف ، أنا نروح نشوف كاميرات تع المطار 
قمرة : روح دوك نلحقك 
أمير باستغراب : علاه واش صرى في المطار ؟ ديجا رجلك وشبيها ؟
(شافها شوية حمرة وكانت تمشي عليها شوية معوجة )
قمرة : والو حادث صغير، لبارح كي كنا في المطار راح نركبو  طونوبيل استهدفتنا وكانت رح تقيسني كي جيت نبعد دارت رجلي 
أمير : سلامة رأسك،  بصح ياك ما  يعرفوكش ؟
قمرة: بصح يعرفو جنرال تيم ، وباينة خمو بلي كاين قرابة بيناتنا معليش ما تكسرش رأسك نتا من بعد تبان  ، هيا نروحو عند أنس 
راحو للبيرو عند أنس وهو كان يتبع في الكاميرات ويشوف الطونوبيلات لي جاو للمطار مالصباح حتى لعشية لاحظ طونوبيل كحلة كليو كيما لي وصفهالو تيم شاف ماتريكيل كتبو وبدا يحوس عليه في السيستام وكملو يشوف الفيديو حتى لمح لي كان راكب مع الشوفور مخرج سلاحو وعلى حساب الزاوية تاعو كان مستهدف سيبال 
أنس : لونا 
دارو عندو في زوج قربت هي تشوف 
أنس : كان مستهدف مرت الجنرال ، من بعد بلخف دخل سلاحو وديمارا صاحبو ونتي كي شافوك جيتي في الطريق حبو يديرو حاجة 
قمرة: دوك نقول للجنرال ، نتا كمل حوس على وجوههم و إجبدلي زريعتهم كامل 
أنس : حاضر 
أمير : هدا باين عندو عداوة قديمة مع الجنرال  بيسك  ما كنتيش الهدف تاعهم معنتها 
قمرة: دوك نشوفو نروح نقولو ونجي 
راحت قمرة من بيروها للبيرو تع تيم ، كانت تمشي و تخمم في سيبال وخايفة عليها ، كي لحقت عندو كانت الباب مشقوقة خفيف وسمعاتو من غير قصد  يهدر ومنارفي بصح ما عرفتش معامن 
تيم : ياك قلتلك شحال من مرة ما تخلطش الأمور ، علابالك واش درت هكا ؟ نص الخدمة كامل ريبتها ؟ ، مدامك ماراكش في الميدان ما تقدرش تدخل روحك 
قمرة ما حبتش تكمل تسمع وتخترق الخصوصية تع هدرتو على هادي دقدقت وهدرت 
قمرة : جنرال نقدر ندخل ؟
تيم : مزال ما خلاصت هدرتي معاك (كوبا ) ادخلي قمرة 
فتحت الباب ودخلت وغلقتها موراها 
قمرة: لباس ؟ تبان مقلق ؟ 
تنهد تيم : والو برك على الخدمة ، كشما حبيتي تقولي ؟
قمرة: إيه على حكاية تع المطار ، شفت مع أنس الكاميرات ولقينا بلي طونوبيل كانت مستهدفتنا ، بصح ماشي أنا وماشي نتا 
تيم : شكون ؟
قمرة : سيبال ، بسك واحد في الرجال كان مخرج سلاح مصوب عليها من بعد بلخف خباه وديمارا صاحبو كي جيتو في الطريق حب يخوفنا 
تيم خبط الكرسي وسب بينو وبين روحو ، وقمرة ناضت ليه وشداتو من يدو 
قمرة : خالو  لازم تبقى هادي ، وعلى سيبال ما تخافش عليها أنا نحميها نولي الظل تاعها  نتا عليك برك تحافظ على هدوءك باش ما يستغلوهش ضدك 
شاف فيها وهي تبسمتلو بهدوء وعنقاتو وبادلها ، نجحت باش تخليه كالم ويتخطى نوبة الغضب لي كان رح يدخل فيها هي أكثر وحدة تعرف نوبات الغضب تاعو شحال واعرين ، يبان من برى كالم بصح هو كي يتقلق يولي ما يشوفش قدامو 
قمرة : هيا نروحو للدار 
دار يدو على كتفها وهي عنقاتو بجانبية وراحو كيفكيف .
تيم : طونوبيلتك ؟
قمرة : خليها هنا غدوة نديها 
ركبت معاه وقلع لدارو ، ووصلو بعد  مدة وكانوا الحراس في أماكنهم كالعادة غير شافوه حلو الباب ، سيبال كانت تطل مالتاقة وهبطت تستقبلهم 
سيبال : تيم 
راحت تجري وعنقاتو بسك مقبيل خرج مقلق مور ماهدر في تلفون ، بادلها العناق بزوج يدين وغمض عينيه شافت في قمرة لي غمضتلها عينيها تع مكان والو ودخلو كيفكيف 
سيبال : تحب نديرلك قهوة ؟
تيم : مكالاه ندوش ونرقد 
طلع يدوش وهي دارت لقمرة 
سيبال : واش كاين ؟ خرج مقلق مقبيل 
قمرة : المصنع لي كنا نتبعوا فيه تحرق ، غدوة يحكيلك ما تخليهش وحدو 
سيبال : اوكي ، تصبحي بخير 
قمرة : ونتي بخير 
طلعت سيبال تجبد حوايج لراجلها ، قمؤة راحت جابت ليزار خفيف وتكسلت فالصالون نشوف تلفزيون حتى رقدت كعادتها كي تبات عندهم .
طلع النهار ، فطن تيم بكري كالعادة صلى صلاتو وهبط ، شاف في الصالون لمحها راقدة ويدها طايحة ولوخرة راميتها فوق رأسها ضحك على حالتها تقول تدارب مع الرقادة ، طيب القهوة ووجد الحالة من بعد راح نوضها 
تيم : قمرة نوضي ، قمرة 
قمرة : اممم ماما خليني نرقد 
خبطها بدقايشة في الجبهة وبقى يضحك عليها 
قمرة : اييي ، خالووو علاه علاه 
ناضت تمسح على بلاصة الضربة 
قمرة : صباح الخير 
تيم : صباح الخير قردة ، نوضي اغسلي وجهك وارواحي تستقهواي
راحت غسلت حالتها وجات لقات سيبال لابسة وموجدة روحها 
قمرة : سيبالل صباحوو 
باستها من خدها وتبسمت سيبال 
سيبال : صباحوو قمرتي 
ريحت معاهم وكانو يهدرو في مواضيع مختلفة من بعد كملو وناضو خرجو كيفكيف ، قمرة ركبت ماللور وسيبال قدام تيم وراحو للمقر ، كي وصلو هبطت قمرة هي لولة وتكات على تاقة تع سيبال 
قمرة : انا نروح للدار عندي شغل ليوم  
تيم : بالاكي على روحك 
قمرة : ماتكسرش رأسك  
راحت ركبت وقلعت لدارهم في الطريق عيطت لأماني كانت 8:30 
أماني : وي 
قمرة : ناس تقول صباح الخير 
أماني : صباح الخير اسيدي 
قمرة: وجدي روحك على ساعة مجي ليك نخرجو 
أماني  : وين ؟
قمرة : كي نجي ساهل ، وقولي راجلك تان باش عشية يجي ديراكت لدار عندنا 
أماني  : أوكي 
كوبات وكانت قمرة لحقت للحومة ، طلع لدار صبحت على باباها ويماها وراحت بدلت حوايجها  دارت روتينها وعاودت خرجت مور ماقالت ليماها بلي اومبعد رح تجي مع اماني وعشية يجي عصام يتعشى تان 
ركبت في طونوبيلتها بعد مادارت نواظرها وديمارات وديجا كانت 9:20  ، بعد 15دقيقة لحقت للكارتيي تع أماني هو كارتتي ريزيدونس (فهمتوها 🙂🤝) هبطت وراحت للباطيمة تع أماني صونات وفتحتلها من دارها ، طلعت فالاسنسور للإيطاج ثالث ، ولقات أماني عند الباب ، جرات لعمدها تعنق فيها وتسلم عليها ودخلو كيفكيف 
قمرة : الله يبارك دارك شابة 
أماني  : كيما نتي ، دوري كيما تحبي نكمل ماكياجي ونجي 
كيما كان الحال قمرة خرجت للبالكون تطل على حومتها وقاعدة تشوف في العباد غير كلاص وحطة 
أماني : كملت 
كانت واجدة وشابة الزواج صح خرج عليها 
قمرة : خرج عليك الزواج يااه 
لبست صباطها وخرجو كيفكيف بعد ما تفقدت دارها 
أماني : وين نروحو ؟ 
قمرة : صالون دو تي ، لي قدام شركة تع خوك عندو وحد القهوة وحد الكوكيز مخك يحبس 
أماني : ايي شهيتيني ، هيا نروحو 
ركبو وديمارات قمرة . بعد مدة 
كانوا قاعدين في الصالون في الجنينة ، بسك جاي يطل على جنينة ، قدامهم في زوج قهوة حليب برك قمرة دوموندات كوكيز وأماني كيك سيباستيان ، كانت قمرة كالم بزااف تاكل وغايسة تشوف برى 
أماني حمحمت : خير ان شاء الله جبتيني باش نبقاو ساكتين وقيل ؟
قمرة : واش نهدرو مثلا ؟
أماني  : على إسلام مثلا ؟
قمرة كانت راح تشرب قهوتها وحبست وحطت الكاس وشافت فيها 
قمرة : واش نهدر مثلا ؟
أماني  تنهدت : قمرة ، علابالي بلي راكي مخلطة ، حكاتلي إنصاف واش قاتلك ، معلاباليش كيفاش بصح إسلام خويا مانساكش 
قمرة باندفاع : مالا علاش كانت ردة الفعل تاعو هديك ؟ معاملة الغرباء ؟  ، فالأول مافقتش علابالك تالمون كنت مركزة على واش رح ندير نسيت كليا بلي وليد عمي وصديق طفولتي نساني وماولاش يعرفني ، وبلي نسا بلي ختو عندها صحبة وحدة ولي هي بنت عمهم بصح نساااا
قالتها بنوع من الحدة والانفعال بصح قدرت تحافظ على نبرة صوتها 
قمرة : هدرة إنصاف فطنتلي مخي ، قلت كيفاش بنادم تربى معايا ومن الصغر مع بعضانا وتفارقنا في عمر ماشي صغير بزاف وفوقها ينسى بلي أنا نفس الإنسانة لي بنينا أحلام مع بعض 
أماني : قمرة حتى أنا راني كيما نتي من جهة نقول ما نساهاش بصح كي نسمع لهدرتك نسأل نفس السؤال 
قمرة  :.......... 
أماني : هيا نروحو ، حابة نشري عفايس 
قمرة : هيا 
خلصت أماني وقمرة قاتلها تروح للطونوبيل بسك حبت تروح لدورة المياه (أعزكم الله )  غسلت يديها ونشفتهم وشافت في المراية مدة طويلة حتى طاحتلها دمعة مسحتها تجري وخرجت دايرة نواظهرها ركبت وقاتلها أماني نروحو للسونتر  .
دارو بزااف بلايص وأماني تخير وتحوس وقمرة غير تقوللها إيه ، لحقت 15:00 
أماني : عييت هيا نروحو ناكلو ومن بعد نجوزوا عند إسلام 
قمرة  : علاه ؟
أماني  : يسحق وحد العفسة نديهالو 
راحو لريسطو تع إياد كي شافهم راح يهدر معاهم 
إياد : مرحبا بيكم ، ان شاء الله تكونو بخير ؟
أماني  : يسلمك  ، الحمد الله ونتا ؟
إياد  : بخير ، واش تطلبوا ؟
قاتلو أماني  وقمرة حبت اتاي برك ، راح إياد وهدر مع سارفور واش يجيبلهم 
أماني : ونتي ما تاكليش ؟
قمرة  : راني شبعانة 
أماني  : كليتي شوية كوكيز صباح شبعتي ؟
قمرة : دوك نروح ونخليك هنا وشوفي شكون يجيبك 
أماني  : خلاص ما قلت والو ، يخي شمطاء
كلات أماني وقمرة تهدر معاها في مختلف المواضيع ، كملوا خلصوا وخرجو وراحو للشركة عند إسلام  ، قمرة ما كانتش حابة تروح بصح ما حبتش تبين . كي وصلوا وطلعوا فالاسنسور قمرة بعتت ميساج لأمير إذا راه فالبيرو وقاللها إيه ، تفتح الاسنسور 
قمرة : أنا نروح عند أمير 
أماني : أوكي كي تكملي ارواحي عند إسلام
همهمت قمرة وراحت عند أمير  دقدقت وخلاها تدخل كانو معاه زوج خدامين وحدة سيكريتار تاعو ولوخر يخدم لتم 
أمير : صابر كيما تفاهمنا على يومين ابعتو 
صار : معليه سي أمير 
أمير  : تقدر تخرج ، جوزي قمرة 
دخلت وقعدت فالفوتاي لتم وأمير هدر مع سيكريتار تاعو جيبلهم قهوة في زوج 
قمرة : مدابيك قهوة مرة وباردة 
أومأت السيكريتار باحترام وخرجت 
قمرة : واش كاش جديد ؟ لبارح خليتكم لتم ؟
أمير  : مكان والو للدوك مزال ما بان والو ، بصح الأدلة لحقوا مالقري ناقصين بصح يفيدو شوية دوك يامات وبالاك نديرو إجتماع
قمرة : همم فهمت 
سكتت شوية وجات قهوتهم ، شربة شوية وشافت فيه 
قمرة : نسقسيك سؤال بصح يبقى بيناتنا 
أمير  : بيانسور سقسي 
قمرة : زعما كاين كاش عميل ما نعرفوهش حنا وراهو خارج الخدمة ودار هاد الشي ؟
أمير باستغراب : كيفاش ؟
قمرة : مثلا أنا كنت مستبعدة لفترة ونفترضو انو ما تعرفونيش نتوما ودرت هاد الحاجة 
أمير  : فهمتك ، بصح كيفاش جاك التخمام هدا ؟
قمرة : هي في الصح...(سكتت شوية حايرة دير فيه كونفيونص ولا لالا من قالت خلي نقولو ويصرا واش يصرا ) لبارح كي رحت عند جنرال باش نحكيلو على واش لقينا ، كانت الباب تاعو مشقوقة وماشي بقصدي سمعت هدرتو مع واحد وكان باين مقلق 
فلاش باك 
"تيم : ياك قلتلك شحال من مرة ما تخلطش الأمور ، علابالك واش درت هكا ؟ نص الخدمة كامل ريبتها ؟ ، مدامك ماراكش في الميدان ما تقدرش تدخل روحك " 
نهاية فلاش باك 
قمرة : من بعد ما حبيتش نزيد نتطفل عليه دقدقت ودخلت واخر حاجة قالهالو هي انو مزال ما خلاصت هدرتو معاه 
أمير  : بيزار زعما يكون عميل سري ومانعرفوهش بصح العملاء كامل معروفين لتم مام السريين ، لوكان نسقسوا أنس  ؟
قمرة  : لوكان علابالو يقولي ما يخبي والو عليا ، خممت بزاف نحوس فالارشيف تع المقر بصح بأي سبب ؟ جنرال يفيقلي ويعرف تخمامي 
أمير  : حتى أنا ما نقدر ندير والو (سكتوا شوية ) خلي مور الإجتماع وتبان باش ما نتسرعوش ، بالاك هاد العميل يجي يخدم معانا ولا يولي 
قمرة : بالاك بصح ما نظنش الفعلة تاعو رح يجوزوهالو بالساهل في النهاية خسرنا في جزء كبير من المهمة (ياو لوكان تعرفو المخبي 😌😌) 
جاو يكملو لهدرة دقدق الباب ودخلت أماني مع إسلام معنقاتو 
أماني  : ميرو واش راك ؟
أمير  : أمونة المزيونة 
ضحكت وهدرت معاه شوية وإسلام يشوف في قمرة وهي متجاهلاتو ، جا أيمن 
أيمن : اوههه لجماعة كامل راهي هنا
سلم عليهم كامل وزادو قصروا شوية وقمرة ساكتة برك وغايسة 
أماني  : قمروش هيا نروحو 
فاقت على روحها وناضت رايحة معاها ، قاللها أمير وأيمن بلي عشية بالاك يجو يشوفو عمهم وهي رحبت بيهم ، من بعد خرجت أماني سبقتها لتحت مع أيمن  وأمير بقى يكمل خدمتو ، كي ركبت الأسنسور من زهرها إسلام طلع معاها ، كانت ساكتة على غير العادة وإسلام صح تقلق (معلابالوش علاش تقلق كي ما راهيش تهدر معاه ) وفجأة عبز قفلة تاع بلوك وحبست الأسنسور دارت شافت فيه وعاقدة حواجبها 
قمرة : خير إن شاء الله وقيل جاك لهبال ؟
إسلام  : إيه جاني لهبال وقيل معجبكش لحال ؟
قمرة : اذا حبيت تهبل اهبل بعيد خليني نهبط 
إسلام  : ولوكان ما نخليكش ؟
كانت واقفة مع لمراية بظهرها وهو محاصرها معاها ويديه في جيوبو متصنع البرود للطرف وقمرة تتجنب تشوف فيه 
إسلام  : واش وليت نخوف حتى ما تحبيش تشوفي فيا ؟
شافت فيه وعينيها حمورة مقلقة وحاسة بالقنطة ، هي ماكانتش مليحة وراو يزيد عليها وتخمامها تان 
قمرة : واش تسحق من عندي ؟ 
إسلام : واش درتلك باش راكي تعاملي فيا هكا ؟ تتجاهليني عندك يومين 
قمرة  : علاش بسيف نهدر معاك وقيل ؟ مرانيش مليحة صافا ؟ ماشي لازم نهدر معاك 
إسلام  : وشبيك؟ (قالها بهدوء وحنية ) ( أيما قلبيي😭😭 ) 
هي لي هبطت عينيها وسيات تشد روحها بسك لوكان تنطق كلمة تطرطق تبكي واخر حاجة حابتها هي دوكا انو تبكي . سيات تستجمع قوتها باش تقدر تهدر 
قمرة : إسلام  
إسلام  : وي 
قمرة : خليني نهبط  ، أماني  راهي تسنى فيا 
إسلام  : خليها تستنى 
قمرة تنهدت : خليني نروح مانيش قادرة نهدر ولا نتجادل معاك 
إسلام  : أنا ما قتلكش اتجادلي معايا ، سقسيتك سؤال واحد وراني نستنى الجواب تاعو 
على شعرة وكانت رح تضعف وتسقسيه إذا  نساها ؟ صح ما تفكرهاش نهار جات عندهم ولا تمثيلية برك ؟ زعما ما قدرش يهدر معاها قدامهم كامل ؟ بصح كانو وحدهم شحال من خطرة وما لمحلهاش ، جات تهدر حتى صونا تلفونها إنصاف 
قمرة : وي إنصاف 
إنصاف : وين راكي زين ؟ قاتلي أماني خرجتو تدوروا 
قمرة : إيه  خرجنا ، دوكا رانا خارجين مالشركة تحبي نجوز ليك ؟
إنصاف  : وي تساعدني نستناك عند لاري تع بوس 
قمرة : أوكي  ما نطولش ، باي 
كوبات ورجعت شافت فيه ، من بعد دناتو وراحت دارت القفلة باش يمشي الاسنسور وتفتحت للخرجة وخرجت دارت يدها على رقبتها تتنفس بعمق حست روحها تخنقت من بعد دارت نواظرها وراحت تركب كانت أماني تراقب في حركاتها وشافت إسلام كي خرج ومن ملامحو باين بلي ما فراهاش معاها 
قمرة : رح نجوزو عند إنصاف هدا وين هدرت معايا 
جازوا عندها وراحت معاهم للدار عند قمرة ، حطتهم قمرة وقالتلهم بلي نسات تشري حاجة تروح تشريها وتجي  .
ديمارات تسوق خرجت مالحومة كامل وراحت لبلاصة شوية بعيدة جاية على  لبحر ، حبست طونوبيل وبدات تبكي ، تبكي وماعلابالهاش على واش تبكي حست كلي واحد راهو يخنق فيها والتنفس تاعها ضاق فتحت الباب وهبطت تتنفس وتبكي وتسيي دخل لهواء  ، حست ببنادم وقف عند رأسها  طلعاتو لقات......(شوية تشويق 😌)
~~~~~~~~~~~~~~~~~~~~~~~~~~~~
عند أمير خرج مالخدمة وكان عيان شوية ، تفكر هداك السيد لي كان يقلق إنصاف وحب يعرف إذا مزالو يقلقها على هديك عيط لوحدة يعرفها تخدم عند عبدو هداك سيكريتار تاعو حتى 
أمير : واش مريم ، لاباس ؟ الحمد الله  ، عيطتلك على واش قتلك كاش جديد ؟؟ ، راكي متأكدة ؟ صحا كشما يكون قوليلي 
كوبا وراح للدار ديراكت ، دخل دوش ورقد هكاك مالعيا وكان دار رفاي باش ينوض ويروح لعند عمو 
لتحت في الصالون كانو النساء كيف كيف يقصروا (صفاء نايلة أمينة نسرين سليمة وفطوم ) 
(كاين شخصيات الدور تاعها ماشي مهم كيما راجل صفاء ونسرين ، أما  لبنات كيما ماريا خت إنصاف ورؤيا خت أمير رح يبدأ الدور تعهم بعد بارتات قلال دوكا نسيي نركز على الشخصيات المهمة لي الفكرة تدور عليهم ❤)
نايلة : والله أيمن هدرت معاه على العرس ، قالي مزال ماشي دوك بالاك عام لجاي 
أمينة : معليش خليهم كيما يحبو ربي يدوم محبتهم إن شاء الله 
صفاء ، نايلة : آمين 
صفاء : وإسلام وقتاش نشوفوه عريس ؟
أمينة : يا ختي عييت معاه هداك الطفل ، شفتلو شحال من وحدة ما قبلش (مكاش منها تخرط برك باش يسكتو عليها بسك علابالها بلي هو وقمرة لبعضاهم 😌🤭) 
نايلة : دوك هو وحدو يجي ويقولك اخطبيلي كيما أيمن ، بصح ما نكدبش عليكم أنا حسيت هو وقمرة يتوالمو بزاف سيرتو كي نشوفهم كيفكيف 
صفاء : صح عندها الحق ، عندهم وحد الإنسجام الله يبارك عليهم 
أمينة : يسلمك حتى أنا نخمم ونشوف ونقول تليقلو وحدة كيما قمرة هو كالم وهي شاعلة يتوالمو 😌 
نايلة تضحك : هي بالذات 
في الجهة الثانية عند نسرين ولوخرين كانوا يهدرو هما ثان بيناتهم 
سليمة : خالتي سمعت أمير يهدر وقال بلي منصف وأنيسة رجعو من السفر ، ماشي محال لوكان أنيسة تسمع واش درتي تجي ، وإذا جات رح ينفتحوا حكايات عندهم سنين مغلوقين 
فاطمة : ما عندها مادير  غير إذا نطقتي نتي وتجبدوا لحكايات 
نسرين : خلاص خلونا من هاد السيرة يما ، نروح نشوف إيلين ونجي 
~~~~~~~~~~~~~~~~~~~~~
عند قمرة قاعدة فوق كرسي لتم تاع برى وقدامها هداك الشخصلي حبسلها ، شكون زعمة ؟
قمرة : يعطيك الصحة كي عاونتني 
إياد بابتسامة : ولو واجبي ، ياك راكي مليحة دوك ؟ 
قمرة : أحسن وي 
إياد : تحبي نوصلك ولا تعيطي لكاش واحد يجي يديك ؟
قمرة : نروح وحدي معليش ومن فضلك ما تخبر حتى واحد واش صرى ليوم  ،و صحيت على واش درت ما ننساش موقفك هدا 
تبسملها وردتهالو بصح كانت إبتسامة باهتة تبين مدى حزنها ، ركبت طونوبيلتها وهو تان قرر أنو يتبعها حتى لدارهم باش يتطمن عليها أكثر بما أنها أكدتلو بلي ما حبت حتى واحد يسمع واش صرالها . وصلت لحومتها وهو تطمن عليها وجاز قدامها روشتلو مام هو ردهالها وراح وهي طفات طونوبيل وهبطت طالعة وكان قريب  المغرب 
سمعوا صوت مفاتح 
أماني : هادي قمرة باينة 
راحت تشوف لقاتها هي ، شافت حالتها لي تبان مهدود حيلها بصح حستها تحاول تخبي 
أماني : قمروشتي طولتي ؟ غير الخير ياك ؟
قمرة : برك عيطولي شدوني بالهدرة وكنت نحوس واش رح نشري ومالقيتش وش حبيت 
خلطت برك الهدرة وتجاوزتها ، أماني تنهدت ورجعت للكوزينة عند أنيسة وإنصاف ، منصف كان راح للجامع .
دخلت لبيتها حطت دوزانها (بالمناسبة بيتها تان فيها صال دوبان نسيت ما حطيتش هاد التفصيل ) راحت غسلت وجهها وطرافها توضات صلاة واش فاتها وبدلت حوايجها لتاع دار سيرفات رمادية مع تريكو بيض قصير دارت شعرها طماطيشة ولبست بليغتها وراحت للكوزينة وحاولت تغير من مودها على هديك دخلت تمشي وطبل في الباب 
قمرة : ماما واش كاين عشاء ؟ راني جيعانةةةة 
أنيسة شافت فيها بنظرة بومباستيكية 🤣😭 وطلعت حاجب 
أنيسة  : واش والفتي وقيل نطيبلك ونوجدلك ارواحي تشوفي تعاونيني ولا بالبليغة للظهر ، شوفي شريتها جديدة قبل مانجي للدزاير 
قمرة : باينة جديدة ومدام أنيسة ما تبردش لوكان ما تسييهاش فيا 
دخلت تعاونها في وسط الضحك مع لبنات هما ثان كل وحدة واش كانت دير ، أنيسة  تحبهم حتى إنصاف دخلت لقلبها بلخف وخلاتها كي بنتها ، وأماني  رباتها ملي كانت صغيرة تسما ماشي جديدة عليها الأجواء  على عكس إنصاف. 
~~~~~~~~~~~~~~~~~~~~~
فات الوقت ، وكانوا وجدوا الطابلة جا عصام وتلاقى مع أمير  ودخلهم منصف للصالون 
أمير  : صافي بليزير عمي كي شفتك وعرفتك 
منصف : يسلمك وليدي حتى أنا فرحت كي شفتك 
كملوا يهدرو في مختلف المواضيع ، من بعد حطولهم لعشاء وقعدوا كامل كيفكيف (مهم دار قمرة كل يوم شكون يجي يتعشى 👍😂) 
منصف كان قاعد قدام أماني وكل دقيقة تعنقو وتغزل قمرة (من بكري تتمسخر معاها هكا ) 
قمرة : بنت عمي 
أماني  : بنت عمي 
قمرة : ماشي شغل كثرتي فيها ؟ احشمي 
ضحكو على قمرة ، عصام يعرفها غيورة تغير على باباها تسما تضحكو كي تبدا دير هكا 
كملوا عشائهم وناضوا لبنات يلموا حالة ويجيبو تحلية ، وحطوها وقعدوا يهدروا 
قمرة : نروح نحط تلفوني يتشارجا ونجي
إنصاف  : اوكي 
راحت لبيتها دارتو يتشارجا وكان بيسي تاعها شاعل لقات ميساج تع خدمة شافتو خفيف ودارت عفايس وخرجت مولية للصالون ، كي ولات سمعت صوت زيادة ، دخلت وشافت إسلام قاعد ، اووو وقتاش دخل هدا كيفاش ما سمعتش الباب ؟ لهاد الدرجة راهي out ؟
إسلام كي جا ، حلتلو أنيسة سلم عليها ودخل معاها للصالون ، اول ما حط رجلو حوس عليها بعينيه خفيف ما لقاهاش ، دخل سلم على لي كانو لتم وراح قعد قدام عمو وختو ، حتى شافها جات وحواجبها معقودين كالعادة بالاستغراب وتشوف فيه شغل فضائي 😭🤣😭🤣، من بعد راحت قعدت قدام إنصاف  وبدات تقصر معاها بلعقل  وانضمت ليهم أماني  تهدر بحماس 
أماني  : إنصاف  لوكان تذوقي التشيز كايك تاع  كافي جديد  تهبلي 
(بون مام ريسطو تع إياد كلاو عندو من قبل هاد لعفايس تسما ) 
إنصاف ضحكتها كيفاش كانت تهدر 
قمرة  : بصح تع إياد  خير  
إسلام  حكم غير إسم إياد  ، شاف فيها ببرود كامل وكلش ، وهي غير شافت نظرة تاعو دارتلو تاع واش راك تشوف فيا وكملت تهدر ، كالعادة قمرة المهبولة 

هلووو ، علابالي طولت بصح كنت مشغولة بصح كتبتلكم بارت ، قولولي اذا لقيت افكار مخلطين فالبارت باش نسقمهم  ، لوف يو ❤