ابعد عمر عن اسر الطايح لأجل ما يتسبب ب شي
وبعد مدة من اتصالهم على الأسعاف وصلو الأسعاف للأستراحه ماخذين اسر وتاركين العيال بصدمة وحيره مايدرون يلحقون ورا مين يحاتون مين !! اسر وايش بيصير فيه ولا نياف الي سوا فعلته وانحاش ومصيره بعد الحادثة ...
،، عند نياف جالس يمشي بالشارع وأنفاسه تتعالى مع كل خطوه صح انه يحب المشاكل والهواش بس مايحب يضر احد وخصوصاً ان اسر اخو صديق اخوه
ماكان متوقع تكبر الأمور لكن غره الشيطان وفعل فعلته الغبيه الي بتكون سبب في تدميره وتدمير حياته
وصل للبيت دخل بشكله المبهذل والغريب عن العادة
شعره وثوبه المبهذلين ووجهه الأحمر دخل يرجف وهو مو عارف وش يسوي
قابل اخته ودن وبصوت مصدوم نطقت : نياف !!!
أكملت كلامها : نياف شفيك بسم الله !!!!
دفعها بيده يوخرها عن طريقه وهو يقول : اذلفي عن وجهي مو فاضي لك فاهمه زين ؟
صرخت ودن وهي توقفه بيدها وتردد : يمه يمه تعالي
نزلت غاده بسرعه وهي تسمع صرخات بنتها ودن
غاده بخوف : شفيه شفيه ؟؟
ودن : يمه نياف نياف ما اعرف وش فيه
نياف بغضب وبأعلى ماعنده : ابعدي عن وجهي لارتكب جريمه فيك الحين .. ودفعها على الأرض
وقف بندم لانه دفعها..ثم ابتسم بسخرية وهو يشوف فزت امه لها وخوفها عليها
كمل طريقه بيروح لفوق .. بس وقفته وهي تضربه على صدره وتقول : وش مسوي تكلم وش مصيبتك الجديدة؟
أنصدم من كلمتها وكأن انصب عليه ماي بارد وتجمد
رددت : وش مسوي يا نياف وش مسوي يا مصيبه جبتها على رأسي ماحصلت منك إلا البلاوي والمشاكل
لكن الشرهه مب عليك علي انا الي ماعرفت أربيك للاسف .. أكملت كلامها : وش انت مسوي
رد عليها والحزن اجتمع بعيونه : ماعرفتي تربيني لأنك كنتي مشغوله بتربية غيري يايمه عرفتي ليش ما تربيت
عرفتي ليش صرت كذا لأني كنت احتاج أشوف منك اهتمام وحب بس كل ذا راح لغيري راح لبنتك بنتك الي شوفيها الحين مفتخره فيها ومعجبه فيها اشد الإعجاب ورافعه رأسك ب أدبها وأسلوبها وبرها فيك
اما ودن مصدومه من نياف الي شايل كل هذا بقلبه عليها .. وأمه الي ماعرفت وش تقول ووش ترد عليه هي تعرف ان كل الي قاله نياف حقيقه..ماودها تنكر ولا ودها تعترف بغلطها وتتحمل مسؤلية ولدها وكيف وصل لهالحاله
استجمعت نفسها ونطقت وهي تدافع كل عاده عن ودن : عيب عليك هذي أختك اولاً فوق كذا توأمك كيف تغار منها !!!
نياف بضحكه وقهر : كل عاده رجعنا لودن حتى وأنا بهالحال يايمة
واذا عن الغيره اي اغار تدرين ليش لأني صرت حكوه بلسان الناس يعايروني فيك متخيله يقولون لي امك ما عرفت تربيك ولا قدرت ارد عليهم مع الأسف
والحين ابعدي عن وجهي انتي وبنتك خلوني اطلع لغرفتي ولا رحت جلست عند واحد من أخوياي
عند ودن الندم الي تحس فيه حالياً غير كيف إنها اخذت كل الحب والاهتمام الي مفروض يأخذ منه نياف سمحت لدموعها تنزل
ورددت والغصه في حلقها : نياف نياف تكفى لاتروح تكفى
" اما نياف تركهم على حالتهم وصعد لغرفته
" بالمستشفى الساعه الثانيه عشر ليلاً "
اسر على سرير المستشفى بعد ما خيطو له جرحه العميق وبجمبه عمر وسالم
بدأ يفتح عينه ببطء .. عمر لما شافه يحاول يفتح عيونه نطق وهو مرسومه الفرحه بوجهه : اسر الحمدلله على سلامتك خوفتنا ياولد
اسر ببطء يحاول يحط كلمتين على بعضها : وينه الكلب !
لف عمر على سالم وهو مصدوم انه عارف ومتذكر
ونطق يرد عليه : مين الي وينه ؟
اسر بهدوء : انت عارف مين .. سالم بمحاولة تهدئة الوضع : اسر تعوذ من الشيطان
اسر : الشيطان هو لو تعوذت منه بيطير .
عمر : اسر الشيطان غزه ولا هو مايسوي كذا تكفى لاتكبرها وتعوذ من أبليس بيجي لك لعندك وهو نادم وبيعتذر لك وش تبي بعد اكثر
اسر بضحكه خفيفه على جمب : ابي حقي
"دخل الدكتور وهو يستسمح الدخول ومعه المحقق والشرطي " دخلو الغرفه وهم يسلمون : السلام عليكم ورحمة الله
نطق المحقق بصدمه : اسر!!!!
انتهى
