قدر مراهقة 2

الجزء 89

#قدر_مراهقة2
#ميرال_مجد
#بقلم_فريال
الجزء 89
كانت تجي لعندي كثر منهم كامل ختي لاتية بولادها وراجلها تجي مرة على مرة وخاوتي خدامبن يجيو مع لعشية يطلو عليا ويروحو ونساهم تاني مع كورونا قليل وين يخرجو ناس بابا شداتو لخدمة يعيطلي ديما يحكي وينصح ويصبرني وانا والو حرف مكانش، جاو خالاتي خوالي نساهم ولادهم جداتي يحاولو معايا باس يخففو عليا بصح وش يخففو وش يخليو راح يقدرو يطفيو النار الي راهي شاعلة في قلبي راح يقدرو يفهموني ويفهمو وش هو شعوري الم خذلان فقدان عجز كلش كلش تلم عليا واحد مايقدر يفهمني لانو مخسروش ولادهم انا الي خسرت بنتي وماما هوما كملو حياتهم عادي راهم يربيو في ولادهم اما انا بقيت قفة بلا يدين، الوحيدة الي تقدر تفهمني هي جداتي لانو مام هي خسرت بنتها بقات معايا تواسي فيا انا اكتفيت بحضنها وفقط كنت حابة نشم ريحة ماما فيها ونحس بحنانها وحنيتها علينا من ديما ام ماما قريبة ليا بزاف الوحيدة الي تفهمني وتفهم طبايعي وعقليتي على عكس لباقي كانو جابدين عليا لانو قبيحة ونردلهم لهدرة ويطلبو ربي يقفلي فمي شوي وكي تقفل فمي وسكت معجبهمش لحال وحابين ينطقوني بالسيف. ليوم بنتي عندها 4شهر ملي ماتت حاجة ماتبدلت فيا من نهار دفنتها وانا جابدة روحي على ناس وغير ساكتة وغايسة بصح ليوم غير عندي امل انو تجيني طفلة وتعوضني على فراقها، رايحة انا ومجد نشوفو جنس البيبي عندي 5 شهر حمل ماحسيت بوالو فيهم اصلا معندي حتى اعراض تقول حس بيا بلي منيش مليحة ومنقدرش نتحمل لوحم وعذابو عليها جا خفيف ظريف وكي بقى عايش ومتمسك بيا راهو هايل لانو مهتميتش بيه خلاص ماناكل مانرقد كي ناس فوتها بالسيروم وليباري وهكاك ومنع وقررت لمرة هذي منديرلوش كيما ختو راح نتقبلو ونعطيه كل حبي وحناني ووقتي ومنفرطش فيه سوا كان طفل ولا طفلة المهم يجي كامل مكمل ولباس عليه. كيما كان لحال روحت لطبيبة جوزنلي لقات كلش مليح كتبتلي فيتامينات لانو جسمي ضعيف بزاف ومع لوقت الي كنا فيه خافو نمرض ونروح فيها، لقيت عندي طفل فرحت يمكن هذيك هي اول مرة فرحت بعد موت بنتي مجد كان حاسبني مش راح نفرح ونتغشش بقى يحكي ويقولي عادي المرة الجاية نجيبو طفلة المهم الخلقة التامة ومزالك صغيرة وتعمريلي دار وحتى اذا بغيتي كل عام اولدي معنديش مشكل انا الي تشوفيها تناسبك ديريها (قالي هكاك من بعد دار عليا لحلوف ويحاسب فيا). خرجت شريت شوي قش لوليدي مكثرتش وقولتلو نروحو عادي رجعت نهدر فترة قصيرة وتعڨنت فيها شهرين ونص ورجعت نهدر مش كيف قبل بصح خير من مكانش نشفى نهار نطقت وقولت لمجد تشهيت الحريرة فرح مسكين كي سمع صوتي ومركزش مع لحريرة نساها خلاص حتى عاودتها الف مرة باش فاق وجابهالي.
#فريال