قدر مراهقة 2

الجزء 90

#قدر_مراهقة2
#ميرال_مجد
#بقلم_فريال
الجزء 90
انا قفلت 5 شهر حمل ومرت بابا ولدت انعم ايه كانت بالحمل وولدت وجابت طفل وكانت صدمة لينا لانو ماما يادوب كان عندها 7شهر زواج وجابت طفل قالولنا ولدت قبل لوقت بصح على شكون يفوتوها عليا انا ولا على خاوتي هاه كنا فايقين وعارفين بلي طفل كبير ولباس عليه باين بلي زاد في وقتو مش قبل وقتو الله يبارك عليه مطبز يشبه ليماه جاو خواتات بابا باركولها وكانو حابين يديرولو عقيقة كبيرة وعرس كبير رفض بابا ومرتو اصلا بابا حرم عليهم دارو بعد واش دارو وجهم صحيح وجاو ويغزلو فينا زعما هاهو باباكم الي كنتو تقولو ميديرهاش تزوج وجاب طفل ويماكم ياكلهم دود، اييييه يادنيا سكت كتمتها في قلبي ماقولت والو باركتلها بغيت نردلها حقها لانو وقفت معايا خيرها عمري ننساه كانت ثقيلة وتجي تعاوني ربي يحفظها من كل شر. كي راحو يسجلو طفل بابا كان مشغول راح خليل سجلو وكي رجع وجهو كحل كي شغل مشوكي ودا خلعة كبيرة كي سقسيناه شبيك وش صرالك قالنا من بعد نحكيو مش ذوك كي اصرينا عليه بزاف قالنا بلي بابا عقد على هاجر كي كانت ماما لانو تاريخ عقد زواجهم قبل تاريخ وفاة ماما بشهر يعني ماما كانت عارفة وهي الي شجعتهم على زواج تسمى بابا مخانش ماما كلش دارو قدامها يعني وش قولتلو كامل كنت غالطة فيه ظلمت بابا وقلقت من قيمتو واحترامو قدام الي يسوا والي ميسواش وفوقها خليناه وحدو وكرهناه، بصح وش هو سبب الي خلاه يعقد عليها وميقولناش ونهار هذاك ياك قالولنا راحو يعقدو يعني كانو يكذبو بصح وش وصلهم للكذب فيها ان ومنرتاحش حتى نعرف كلش. كي عرفنا بلي بابا عقد عليها في حياة ماما تبدلت نظرتنا ليهم وقررنا نتلمو ونديرو العقيقة لخونا ومنظلموهش يبقى صغير ماعندو حتى ذنب من غير انو ولد بابانا من مرتو ثانية عادي المهم توضحت بعض الامور ومزال تزيد تتوضح اكثر من هك. تفاهمنا انا وخاوتي مع بابا نديرولو عقيقة هو مع لول رفض بصح كي اصرينا قبل وكي شغل حشمان منا مبغاش يطلع راسو ويشوف فينا انا روحت حضنتو وطلبت منو سماح بكيت بكيت في حضنو من لوحش تاعو وتاع ماما وبنتي بقيت مدة وانا في حضنو مابعدتش ومبغيتش نبعد لانو توحشتو تاع صح تيتمت وهو في الحياة وكلو بسبب سوء التفاهم وقلة وعينا وتسرعنا بصح نقول الحمدلله على كل حال هكا ولا كثر صح خسرت بنت وام بصح مزال عندي اهل يحبوني وراجل مكانس كيفو فهاذ دنيا حنين ويحوس على رضايتي وراحتي حاملني على كفوف الراحة لاول مرة نحمد ربي انو بعثلي راجل كيفو بالرغم من بداية علاقتنا ولغلطة الي صرات بصح يبقى اجمل حاجة صرات في حياتي عوضي وسندي الذي لا يميل ولا يكسر تتخلى عليا دنيا وميتخلاش هو عليا راجلي واب ولادي.
#فريال