قدر مراهقة 2

الجزء 91

#قدر_مراهقة2
#ميرال_مجد
#بقلم_فريال
الجزء 91
درنا لرحيم العقيقة حضرو اهل هاجر وجداتي تاع بابا وجداتي تاع ماما وخالاتي جاو وباركو لبابا وفرحولو وخوالي تاني جاو كي عرضهم مبغاوش يحشموه لانو بابا عمرو ولا عايبهم ولا وصلهم من ديما كان مقيمهم ويخاف يقيسهم وتزعف ماما واصلا هو عويقل مفهمتش كيفاه جاب زوج طايرين (باينة انا ووائل ها جنون ولا خلي نطيرو مع جنون والي يقيسنا بكلمة نردولو عشرة وانا بكري كنت فم برك ذوك فم ودبزة قد الذراع قد اللسان شكون كيفي). فاتت العقيقة على خير جاو وجوه لخلا وعاود حاوزهم بابا لمرة هذي طيحلهم وعمومي ونساهم جاو زعما زعما زعفانين على ماما وغاضتهم تقول مش نفسهم الي جاو للعرس مطلسين وعادلين (هوما صح جاو لانو ام هند قالتلهم ارواحو وزيد يخافوها واعرة بزاف وتاع مشاكل وهوما يخافو على دارهم بصح هذا مش مبرر لواش دارو)، طلبو منا سماح وزعما زعما خاطيين ويحبو ماما ومشتاوش كي تزوج ايا قولتلهم عادي عادي والله ماتغششنا ياك سلفكم الي تزوج لازم تحضرو انا تاني كي يزيدو يتزوجو عموني عليكم نحضر ونعدل ونحرقس ولا وش قولتو فيها يانسا عمامي، حرف ماقالوه سكتو وفي نفس لوقت خافو يتزوجو عليهم جداتي غير تغزر فيا لانو جات طلبت سماح وبغات تتقرب مني بعدت عليها قولتلها كل واحد في حدو انت ابقاي بعيدة عليا وانا تاني بيناتنا الاحترام وفقط مش حابة نتجاوز حدودي معاك الخلطة بزاف تضر ياام بابا. فاتت على خير وبخير كل واحد وش دارلو كادو انا مديتلو دراهم مقدرتش نخرج ونشري مع كورونا عيت ومجد ميخلينيش اصلا. تفرقو الغاشي وكل واحد شد دارو قبل الحجر (احسن حاجة صرات في وقت كورونا والله رجال يشدو ديارهم فليل وميخرجوش وهكا تضمن لمرا بلي راجل ميخونش ويبات حذاك يامدام هاه الفايدة ولا خلي تعمرو الديار وتحسنت الاوضاع وتعمرو لكروش من الفيد الي شدهم وخلي وخلي). كامل ورحو لديارهم بقينا انا وخاوتي ونساهم بتنا تم وراجل اسراء ومجد تاني شدوهم يباتو في دار وائل وحنا نسا بقينا في دار بابا قررنا نقعدو نرفدوها يامات حتى ترتاح وتقدر توقف ونروحو خيرها عمري ننساه لا انا لا خاوتي لانو في الوقت الي فقدنا يمانا هي بقات جنب ريتال ومخلاتهاش تحس بالفراغ ولا نقص لدرجة انو هي رجعت تعيطلها ماما هاجر باعتنا كامل على جالها وعندها الحق تشبه لماما بزاف في عقليتها وحنيتها. سمانة وحنا معاها ومرات نرفدو طفل نلعبو معاه مام وائل وحن عليه ورجع يرفدو ويبوسو نحطوه وسطنا ونضحكو وهو يقولنا شتو شتو هاه ولادنا يعيطولو عمي صغير ولا شاه كيفاه يقولولو ذوك وهو اصغر منهم _ يحتارموه بالسيف عليهم ويقولولو عمو رحيم _ اواه مشكيتش يحتارموه تغفلي عليهم يضربوه ويمرمدوه _ هاه ويجيك بابا يتعارك معاك يقولك ولدك ضرب ولدي شدو لا نضربكم في زوج _ هههه شتي دنيا شكون كان يقول بلي نتزوج ونجيب طفل وبعدها الشايب يعاود زواج ويجبلنا اخ جديد قل من ولادنا _ مكتوب ربي شانديرو _ واه عندك الحق.
#فريال