أرويني بدماء جحيمك [Quench me with the blood of your hell]

𝑃𝐴𝑅𝑇❀42

🩸أࢪوينـــــــي بدمــــ♡ـــاءِ جحيـــــــمكَ🩸     

🗡الفصــــــــل الثـــــــاني:ثــــــــأر قاســـــــي🗡

✎𝑆ℎ𝑒 𝑊𝑜𝑙𝑓
𝑃𝐴𝑅𝑇❀42

ناضت مصدومة و غسلات فمها بالخف، قبل ما تخرج من الدوش و تتوجه للبالكون، طلات و غير شافت لي گارد مقتو لين فهمات بلي واقع هجوم على الڤيلا، بلعات ريقها بخوف و مسحات على وجهها كاتحاول تهدن و ما تخليش الخوف يسيطر عليها...

فهاد الوقت تفكرات واحد الحاجة و مشات بالجرا للدريسينغ و بالضبط للمجر لي كانت لقات فيه الاسلحة ديال زين، حلاتو و جبدات منو جوج مسدسات حجمهم صغير، قلبات هو اللول واش فيهم الرصاص و غير لقاتهم عامرين خشات واحد فالسليب ديالها تحت الشوميز الحريرية الطويلة لي كانت لابسة، و فيها فتحة جهة الفخاد،في حين المسدس الثاني بقات هازاه...

خرجات من بيتها من بعد ما حيدات بانطوفتها و طفات الضو،بقات كاتمشى ببطئ ملصقة ظهرها مع الحيط حتى وصلات للدروج و هما يبانو ليها جوج رجال كي تمشاو لتحت كي قلبو عليها و على لي معاها فالڤيلا،و بما انهم كانو عارفين بلي حتى رجل ما كاين معاهم،فكانو واثقين من ريوسهم و واخدين راحتهم،لدرجة واحد منهم توجه للكوزينة كي شرب فالما...

من غير شاب معاهم باقي مراهق كان الخوف متملكو بحكم هادي اول مهمة ليه ضمن مافيا شياطين الجحيم،كان فقط كي دور فيعينه و هو هاز السلاح و كي بلع ريقو مرعوب...

غمضات عيونها و خدات نفس طويل، ومشات للبيت ديال شهيدة دخلات لعندها و هي تبان ليها جالسة فالناموسية كاترعد و كاتشهد مخلوعة، غير شافت ليسا دخلات بغات تدوي و هي تسكتها ليسا بحركة يديها...

جرات السوارت لي كانو فالباب و مشات للبالكون سداتو و دوزات الخاميات، عاد خرجات من عندها و سدات من وراها الباب بالساروت، حطاتو تحت الحبق لي كان حدا البيت عاد مشات لبيت ليليان...

حلات عليها الباب و يالاه جات تدخل و هي تساطح معاها، ليليان تخلعات عند بالها شي احد اخر و قبل ما تغوت سدات ليها فمها بيديها و دفعاتها لداخل البيت....

ليسا(بنبرة خافتة): غير انا هادي... بقاي فالبيت ما تخرجيش و عيطي لزين انا ما غاديش يجاوبني...فهمتي كلامي؟(ليليان حركات راسها بواخا وطلقات منها)

ليليان(بهمس): اش داك الصوت؟

ليسا(كاتدور عينيها على البيت): ما عرفتش...الگارد تقتـ لو يعني شي هجوم من شي حد.. يا شفارة يا المافيا...