بين عينيها حكايا

الجزء العاشر

#بين_عينيها_حكايا
.
.
.
.
.
.
ملاحضة /القصة تصنيفها للبالغين🚫
أكرر هناك بعض المشاهد للبالغين🚫
أذا لم تستطع قرائتها اقرأ الجزء الذي يليها ❤️
.
.
وتشاء أنت من الأماني نجمتاً
ويشاء ربك أن يناولك القمر

.
.
.
.

وَهج
______

التوكل على الله مفتاح من مفاتيح النعم
تتمنى شي وتسعالة بكل طاقتك
وميكتمل
تحزن تتألم تجزع
واذا ببشائر الله تنزل عليك مثل الغيث الاول
من المطر

متوجهة
بتعب
لغرفتي بالطابق الثاني
او بالأحرى غرفة ماما القديمة
اصارع الذكريات بلكي الگة بيهة مواساة لروحي

فتحت الكنتور القديم المتهالك
وطلعت الصندوگ الفضي اللي داخلة
طلعت الدفترين

اللي عرفت بيهن كل شي يخص حياة ماما
قبل الزواج وبعدة
الدفتر الأول

جان مكتوب داخل أول ورقة منة

(حياتي بكَ)

داخلة ورقة مطبوگة من نفس الدفتر مرتبة مثل الظرف وهي لازگة بمكانهة بيهة السوار الفضي الشذر

وبيهة ورد مجفف

رغم فاتحة الدفتر وقاريتة اكثر من مرة
لكن ماخليت اي وحدة من اخواتي تقرأ ولا عرفتهم بوجودة ببساطة لأن يحتوي على كل كلمة تخص حياة ماما قبل زواجهة ببابا

حياتها الخاصة وحبهة للشخص اللي أسمة ناظم
وهيامة بيهة وغرامهة ألة
هالدفتر بس اني اعرف محتوى
ومن يگلولي البنات احجي حياة ماما
اتخيل نفسي اسردلهم كل شي من أول ماصدت عين ماما بعين ناظم

لحد ماافترقو

والتقت ببابا حتى يعرفون ان عوض ربنا كبير
رجعتة للصندوگ

طلعت الدفتر الثاني
مكتوب بداخل ورقتة

(حياتي من بعدك) مع 5 شذرات وجوهرة ثمينة
عرفت من خلال اللي قريتة تقصد بابا واحنة
اني وخواتي

گعدت عالسرير

فتحت الأوراق ووگعت منهة صورة الية
اني وبابا وليث
بابا جاعصني بحضنة وليث يسحب بية

واخذتني دوامة الذكريات لصوت ماما وهي تصيح قبل لا تاخذ الصورة

-انتبهووو للكاميرا

وگعت دموعي وبللت الصورة
واني أسترجع ذكريات طفولتي

هذا صوت ماما وهي تصيلحي أكمل دروسي
وهذا صوت بابا يدلعني بالكلام

وصوت بيبي الحنون وصوت أسدي
وهو يصيح لعابتي

وهاي اني فرحانة بالنتيجة أولى عالصف الاول

وخوفي ورعبي من سمعت اول صوت قصف بحياتي
١٩٩١
بعد سبع أشهر من أحتلال الكويت تم تحريرها عن طريق قوات التحالف
ثمن قرار خاطئ من الرئيس السابق
سبب حرب ودمار
خلف ورا حصار وتعب
اتذكر كل التفاصيل من ذاك اليوم واحنة نسمع الطيارات
وهي تقصف كل شي بطريقهة