أمان

البارت الخامس

..مرت ثلاث ايام طبيعية
الشي المزعج هذا لؤي دبك بالمحل بشكل مو طبيعي وعيونه الوصخة تتبعنا كلنا
ونظراته مبينه مو راحة هسه اوكي ضرغام همين يباوع بس نظراته احسها عادي مو وصخة مثل هذا
بسببه كمت ماللبس بناطير كله تنورات او فساتين
اني جنت بيضة بس ناعمة وقصيرة
ملامحي بسيطة بس الميزة الوحيدة جان عندي خدود
جنت اشبه غادة عادل بالالفينات يعني مو لمن كبرت
بس بذيج الحقبة ..
ماجنت محجبة ذاك الحجاب المضبوط لكن من اجيت هنا وشفت البنات ونظرتهم اليه بدون حجاب والجيران من اطلع شلون يباوعولي فـ حسيتها احترامًا الهم صرت بس اخلي الحجاب على راسي ماللبسه مضبوط ...
جان يوم البضاعة وعادةً من تجي البضاعة اهل الشيفتات يتأخرون بالرجعة يعني هسه اني لازم ارجع بالسته بس بيوم البضاعة لازم اطول شوية مارجع بالسته مرات بالتسعة هيج
جان بهالايام الاطول بيها يبقى ضرغام بالسيارة منتظرني
..
زميلتي رضا ماجانت مداومة
جنا بنهاية الدوام وكاعدة انتظر ضرغام يجيني
طب لؤي فزينا ثنينا مو من عادة يجي هيج وقت
باوع لزين:- جبت البضاعة بالسيارة انزل جيبها ورتبوها هسه يلا
باوعتله:- بس استاذ مو اليوم نحنا متفقين كل ثلاثاء ..ووقت الدوام خلص
ندار علية مبتسم:- نص ساعة ساعة ..ماراح تتأخرون
ماعندج ذيج المشكلة مو؟
اني وزين واحد يباوع للثاني ضايجين
طلع زين وكام ينقل بالغراض
اربطعش كارتون جايب مكياجات وعشر كراتين كريمات وعناية
راح كعد بنفس مكانه ويراقبنا
فتحنا الكراتين وبلشنا بالترتيب وادردم عليه بكلبي
عيوني كل شوية تروح للوقت
كلش تأخر ضرغام مو من عادته يتأخر علية
رحت سحبت تلفوني لا مخابر ولا دازلي اي رسالة
عجيييب وين صار! ..
جان تعب مو طبيعي لان واحد يادوب واصل لنهاية الدوام ويريد يرجع
..صارت بالتسعة بالليل ونحنا مستمرين
وضرغام ماكو
احنا وبنص هوستنا صاح
لؤي:- زيين ..تعال اخذ مفتاح السيارة وروح اغسلها محتاجها بطلعة هسه
زين جان مثل الأيد اليمنة مالته ..كلشي يشتغله
حتى مرات حسب ماسمعت انه جان يودي ويجيب ابن لؤي من الروضى
نباوعله مصدومين هذا شبي؟
باوعلي زين ورجع كال:- هسه استاذ؟
لؤي:- اي ماسمعت داكلك محتاجها بطلعة
حجيت راسا من مكاني مادري شدخلني اني:- استاذ هسه خلصنا ماباقي شوي وراح نطلع
لؤي:- هسه ها اها يروح يغسلها بين ماتخلصين حتى تقفلون المحل بعد ماكو شيفت ليلي اليوم خبرتهم كتلهم لايجون
باوعت لزين مصدومة ...
شو هذا يتصرف من كيفه؟
على اي اساس مايجون جماعة الليلي ونحنا هنا داكين شغل من الصبح لليل؟
فوك كل هذا يذلنا ذل بالراتب
حجاها وشمر المفتاح مالسيارة
اخذه وطلع
واني نزل علية خوف مو طبيعي ولساني يدعي بس يجي ضرغام بسرعة عاد طول كلش
كاعد خلفي واني من الوتر ايدي بعد ماتلزم شي
جان باقيلي ثلاث كراتين واكمل
حسيته كام وراح يم الباب ماباوعتله ولا سويت روحي داشوفه اصلا ملتهيه بالغراض
سحبت الكراتين الفارغة ونزلت للمخزن اخليهم لان باقي بيهم غراض زايدة وماتتخلى بعد بالرفوف
المخزن جان صغير ومعتم شوية
حسيت بي اجا خلفي على اساس يتفحص بالغراض اللي رتبتهم
لؤي:- اي ماكتيلي وين ساكنه
كلبي كام يرجف:- ب ببيتي ..وين يعني
لؤي:- وهذا الزلمة اللي يجيج ..شنو يكربلج
انعكد لساني بعد ماعرف شحجي
لا بيه اجذب اكول اخويه ولا اكدر اكول غريب
مادري شون طلعت مني:- ابن صديق بابا
ضحك:- اهاااا ابن صديق البابا
حسيته تقرب اكثر بحيث انفاسه جاي تضرب بركبتي
ردت اندار بسرعة سحبني عليه
صحت:- استااااذ شداتسووووي
لؤي:- اشششش مابزعتي منا
امان:- ش ش شنو شنو جاي دكول
لؤي:- مابزعتي منا لهالثور اكيد هسه يعاملج مثل الخدامة ومايهتم بيج ..انتي بزونه وهو ذيب ماتتوالمون
امان:- استاااذ
كام يسحبني عليه واني اسحب بروحي
يتقرب ولمساته جريئة
ادفع بي ماكو غول وقفل بعد اريد اصرخ اعيط بعد مابيه حيل
لزم ايديه ولازمني باحكام
امان:- استاذ الله يخليييييك عوفني
نظراته وقحة بشكل:- عجبتيني بعد ماتحمل ..شكد تريدين ادفعلج بس كولي
امان:- شتدفع وخرررر
لؤي:- كوولي شكد تريدين بلا هالتمسكن
امان:- الله يخليك استااااذ بداعة جهالك
ادفع برجلية ولا يفيد
الغراض اللي يمنا كلها وكعت وتكسرت ونحنا نتصارع بالمحل
يسحبني هيج وهيج بس يريد يثبتني واني ادفع بي وحيلي رايح ماكدر حتى اصرخ
عيوني غووشت وجسمي صار بي نحول اول مرة اعيش هالموقف
ياناس اريد اصرخ صوتي بعد مايطلع
اريد بس اطلع من المخزن واوصل الباب
حركاته جريئة بالاكثر وهو حاصرني بالحايط
دفعته قوي ردت انهزم سحبني من ايدي وانشكت ردانة الفستان من الزند
هذا تخبل بالاكثر وهجم مثل الثور
امان:- وخر الله ياخذك ووووخررررر
جسمي نهد بس كلت ماستسلم لو اعرف اموت بهاللحظة هاي
جانو اظافيري طوال ماحس الا خرمشت وجهه من الطول للطول
دفعته جيت اطلع رجع سحبني بس بقوة ماشوف الا وكعت على وجهي وتشكشك الفستان صار وصل
كمت بسرعة الملم بروحي
احير اللم بالفستان واستر روحي لو اقاومة
شفته جاي يتقرب كمت لزمت شكو غراض بالكاع واشمرها عليه
وليش يفيد؟ ..مثل المفترس ولا يحس
وجهه احتقن ومستمر يريدني
كمت على حيلي واسحل بروحي وركض وصلت للباب بس اريد افتحه طلع مقفول
لزمت القفل اريد افتحه اجا علية ومن خلف يحضن بيه ويحاول يسحب هدومي
مادري شون وضربته بعكسي على خاصرته
هو رجال جبير ادري من وين جايب هالحيل؟ ..
وكع بالكاع ووكعني وياه
جان يمي ستاند صغيرة مالغراض
سحبتها وبكل قوتي ركعتها بي غمض عيونه وكام يصرخ
عالسريع كمت وفتحت الباب وطلعت اركض مثل المخبلة
هدومي متشككة وجسمي احسه نشل
بقيت اركض مادري وين اروح ادور سيارة ضرغام ماكو حتى البيت ماعرف وين طريقه
امشي واوكع بنص الرصيف ارد اكوم واركض
جسمي يرجف صوتي رايح من العياط رجلية متشخطة من ورا كاع المخزن جانت جمنتو بحيث صايرة نصها دم والحرارة جاي تطلع منها
دموعي وحده تنزل وشفتني ترجف من الخوف
احس نفسي بحلم مامفهوم شديصير
الدنيا ليل ظلمة وعلى حظي بشر ماكو بالشارع
وكعت بالكاع من التعب وبس ارجف
اللملم بروحي ماعرف شسوي
الوقت متأخر
كرفصت بالكاع وجسمي يرجف مادري من الخوف من البرد
ماسمع الا سيارة عبرت بسرعة من كدامي سريع هواي
مانتبهت اذا ضرغام لو لا بس اريد اصيحه حتى لو سيارة غريبة المهم احد يساعدني بس مالحكته ..
هي ثواني وماشوف الا نفسها للسيارة رجعت شحطت وكفت بنص الشارع
رفعت راسي لكيته ضرغام ....
نزل يركض ووجهه شاحب
اني بس شفته بعد هاهيه ..فقدت
بوعيي وداحس شديصير بس مابيح حيل اتجاوب واحرك ساكن
مثل اللي توه طالع من العمليات والبنج بعده ضارب براسه
داحس بس بجسد وطاقة طافيه
ضرغام:- امان فتحي عيونج اماااان
انتي زينة شسوالج
اماااان جاوبيني ...
شالني رفعني وركض بيه للسيارة
صعدني واجا بسرعة شحط السيارة ومشى
ضرغام:- الو علي ..دحك فرغ بيت الجماعة بساااع
روح انت وهما لغير مكان محتاجه ..اسمع الحجاية وبلا لييييش
بساااع يلااااا ودز حوراء للبيت
بساااااع علي
صاح عليه وشمر المبايل عالكشن اللي يما
كل شوية يندار علية
جان نار يفور بحيث كل شوية ويضرب عالستيرن بقوة
جاي يطير مو يسوق يمكن السرعة قبطت
وصلنا مكان نزل واجا علية شالني ويركض بيه دخلني للبيت
بس مو بيتهم
بيت ثاني جان
سمعت صوت حرمة:- خير ابو زمن شصاير
ضرغام:- تكدرين بس تغسلينها بمي دافي
حوراء:- شون
ضرغام:- وخري من وجهي
دفعها وركض بيه للحمام
طببني وفتح الدوش دخلني جواه جان مي حار يچوي
فزيت وكمت ارجف واني بين ايديه
وبس اسمع همساته:- هسه ابويه هسه اسويه دافي بس لاتروحين خليج وياي ..فتحيلي عيونج
عدل المي وكام ينزل علية
خدر جسمي واحس الدم شوي شوي بدا يرجعلي
كام يغسل برجلية وفتح الحجاب
بس مانزعني هدومي جان كله من فوك فوك يغسل
حسيت روحي طفله وجاي يعاملني بكل هدوء
وخايف علية من المي لا ياذيني ...
يغسلي بهدوء واني بس ارجف رجف هستيري ومغمضة بعيوني بقوة
همسلي
ضرغام:- بسج ابوية انتي بسج ..اني هينا
اني حدج بس استرخي لاتشدين على رويحتج
فتحيلي عيونج ابوية ..
..فتحت عيوني بهدوء
جان وجهه بوجهي
شفت نظرة مستحيل اشوف احن منها بعمري كله
نظرة خوف.. غضب
..قلق وعتب ..
نظرته كافيه تحسسني بالامان اللي ادور عليه طول عمري ..
خلص سد المي ورجع شالني
ضرغام:- حوراء منشفة وبطانية بسااااع
جتني تركض:- اي اي هاك
مسحني بالمنشفة بالاول ولف شعري وبعدها جاب البطانية ولفني بيها وحاوطني
حوراء:- خليني ابدللها هدومها
جنت لازمته قوي من جتافه بدون وعاتي
ادنى راد يعوفني حتى تبدلي
راسا تشبثت بي بقوة ودفنت وجهي بصدره وهمست
امان:- ضرغااام
ضرغام:- هاهيه ماعوفج ..لاتخافين اني هينا
طلعني خلاني على القنفة وكعد يمي
وذيج فوك راسنا:- اطلع خليني ابدللها عاد
ضرغام:- اششش مايحتاج
حوراء:- هدومها مي صافي
زكح بيها:- كتلج مايحتاج مو اعيد
متمددة وشوية شوية حسيت روحي سلمتها ...
..
..
فتحت عيوني كوة احس بيها شي من الوجع ووجع راسي
لكيت روحي بمكان مو ببيت ضرغام
بيت صغير مادري شقة
تعدلت اباوع لنفسي ملفوفه ببطانية ونايمة على قنفة صغيرة
وخرت البطانية
اباوع هدومي متشككة ..رجعتلي الذاكره
ردت اكوم بسرعة نلوت رجلي ووكعت
طلع صوت وكعتي ...
طلعت علية من الغرفة حرمة متوسطة العمر
حوراء:- ها كعديتي
بعدني ما مجاوبة ماشوف الا ضرغام طب اجا علية ركض كرفص يمي
ضرغام:- شونج هسه ..امان انتي زينة
حط ايده على كصتي
اباوعله بعدني متبنجة وعيوني كوة افتحهم
حوراء:- مادام كعدت لعد هسه اطلع خلي ابدللها
مادري شعدها ويه تبديلي هاي
راسا باوعلي وهمسلي
ضرغام:- تبدلين هدومج
هزيت راسي بمعنى لا
ضرغام:- ابوية انتي احجي شي سوي رد فعل ..طمني كلبي عليج
بلعت ريكي وكوه حجيت:- وديني للحجية
ضرغام:- يجرالج
كام وسندني حتى اكوم
طلع حجابي ولفه على جتافي وزنودي
فتح شعري ورجع لمة كله من جديد
كام يمشيني شوي شوي
طلعنا للسيارة وصعدني بهدوء واجا صعد
رحنا للبيت
الطريق كله ساكته وساندة راسي عالباب
كل لحظة اتذكر اللي صار واتذكر شكله ويكزبر جسمي
جنت اريد شخص احجيله
مستحيل اكدر احجي لضرغام ردت غير شخص
حرمة تفهمني ..
اول ماوصلنا طبيت رحت للحجية ركض
جانت بغرفتها وكعت بحضنها وابجي
الكل مستغرب والبنات واكفين بالباب يصفنون شبيه
ام ضرغام:- شمالج يمة شجاج ..يولي شبيييج تنوحين
ضرغام والبنات واكفين عالباب فوك راسنا
باوعتله وكالت:- يول ضرغام شسويت للفرخة
ضرغام:- شني اني؟ ..علمي علمج تره
ام ضرغام:- عجل اني ..صارلها يوم كامل مابلبيت شمالها عجل وشسويتلها
رفعت راسي وحجيت كوة:- ضرغام ماله دخل
باوعتلي:- عجل شمالج بنيتي ..بطلي نواح وفهميني
تعدلت وكمت امسح بدموعي ومنزله راسي
افتهمتني باوعتلهم وكالت:- وليدي اخذ خواتك وطلعوا لبرا
طلعوا وعافونا لوحدنا
باوعتلي ورفعت شوية راسي الها:- ها يمة اسمعج
حجيتلها ودموعي تصب وحده ورا الثانية
حجيتلها واني استرجع المشهد اللي صار وجسمي كله يرجف من جديد
احجي واشهك كوة ينفهم من كلامي وهي تمسح وجهي بشيلتها
ماحس الا يندفس الباب ويطب ضرغام متعصب
ضرغام:- كتلج عوفي هالشغل وانتي ماسمعتي الحجايه وبقيتي تعاندين
ام ضرغام:- يول ضرغام هاي من شوكت انت تتسمع عالبوب
ضرغام:- يمه هسه مو وكتها خلينا مصيبتها لهاي ام راس اليابس
ام ضرغام:- يمة ضرغام
ضرغام:- يمة الله يشيلني بعد اذا انصح واحجي ..اني زلمة وافهم واعرف البشر من نظرة عيونهم وحجيت وكلت واكلنا خ... ومافاد
نزلت راسي وبس ابجي
ماجان اليه الحيل حتى ادافع على روحي
واصلا شنو ادافع؟ ..حقه وبكل كلمة
هو حذرني منهم وجان ادرى مني بيهم بس اني اللي عاندت
...عافنا وطلع متعصب
جتي نبا وبيدها هدوم ولزمتني من زندي
نبا:- كومي حبيبة بدلي هدومج كومي
طبطبت على رجلية الحجية:- استهدي بالرحمن وتعوذي من الشيطان ..انسي الصار بنيتي
كمت مابيه واهس احجي
طبيت للحمام وغسلت بدلت هدومي ..رجلية متشوهه وزنودي اثار اصابع
طلبت يفرشولي بغرفة الحجية جنت محتاجة تبقى يمي
جنت محتاجه وجودها بكل حياتي وهسه بالاخص
تمددت وراسي احسه طبول اكو بداخله من الوجع
واريد بس انسى اللي صار ...
..مر يومين واني نفسيتي بالنازل
جنت كلش تعبانة جسديًا وكلما اباوع لرجلية اتذكر كلشي من جديد واحسني اريد ادفن روحي
بقيت مكضيتها بالفراش ...
بنص الليل اشتدت علية كمت ركض للحمام استفرغ
من كد ما قلقانين علية الكل كام وياي يشوف شبية
طلعت اشوف البنات كلهم بوجهي ووجهم اصفر
الحجية كاعدة بصفحة ومنزله راسها
وجوهم تحجي ...
ضرغام واكف منتجي على باب الصالة
..افتهمت عليهم
امان:- شبيكم ..ليش تصفنون بيه
بلعت ريك ..رفعت راسها الحجية علية
ام ضرغام:- متاكدة يولي حجيتيلي كلشي؟
كلبي كام يرجف ..
رحت ركض يمها واحجي بهستيرية:- لالا لا وروح امي هذا كل اللي صار حجيتلج هو
رجعت باوعت للبنات يصفنون بيه ومقهورين
امان:- لا واللله لاااا مالزمني والله ماخليته والله العظيم لااا
ضرغام متنك ومحتقن بحيث احس اللي يطخه جان راح ينفجر بي
اباوعله مايحط عينه بعيني وضااااايج
كمت ابجي واصرخ:- والله ماصار شي والله والله ..ماكدرماخليته والله
طلع ضرغام بعصبية لدرجة ضربة الباب البرا سمعناها من كد قوتها
وكعت يم رجلين الحجية وابجي
امان:- انتي على الاقل صدكيني والله ماخليته
اشرت لعلياء ونبا يجون ينهضوني
كوموني ساعدوني ودخلوني للغرفة واني بس ابجي واكللهم ماصار شي من اللي ببالهم
مددوني ونيموني بالفراش واني ارجف
صرت اشك بروحي
خاف فعلا مسويلي وماتذكر؟
اخاف صاير شي وفقدت وقتها وماجاي اتذكر!!!
جوا البطانية وارجف رجف مو من البرد
اجتمع كلشي علية
اكثر من اسبوع على هالحالة لا اكلي اكل ولا نومي نوم
الليل كله اكضيه دك صفنات
ومن الخوف معدتي صارت تقلب وخلتني اشك بروحي اكثر...
اجت علية الحجية وكعدت يم راسي تمسح على شعري
اباوعلها وابجي بصمت:- والله ماصار شي ..اللي صار حجيتلج هو كله والله
هزت براسها وملامحها الغصب مرسومة على وجها
ام ضرغام:- ادري يمة ادري
امان:- لا انتي مامصدكتني
ام ضرغام:- بالعكس اني الوحيدة اللي صدكتج وادري مالازمج
تعدلت كوة واباوعلها واحجي كوة من الرجف:- شوون
طبطبت على ايدي ومسحت وجهي بشيلتها:- ادري جي اني مابنت هسه يايمة وادري حيل زين بهالسوالف ..
عيوني تترقبلها:- يعني مصدكتني
هزت براسها بابتسامة خفيفة:- ارتاحي بنيتي ولاتفكرين زايد ..الله يستر عليج يا يمة
حجتها وكامت
كلامها هداني وطمني
بس بقت اكو غصة بداخلي تخليني ابجي واون الليل كله
اني مو هيج ضعيفة
شديصير وياي!!! ..
..الموقف ماجان سهل ...
طبت علية علياء من الباب بس مدت راسها وايدها
علياء:- هاي جنطتج؟
باوعتلها لكيت بيدها جنطتي اللي نسيتها بالمحل
فزيت راسا وهزيتلها براسي
شمرتها علية
ندارت حتى تطلع وكبل ماتطلع رجعت باوعتلي وكالت
علياء:- فتحي مبايلج
طلعت ..سحبت الجنطة وطلعت المبايل
لكيت جاييني فيديو
فتحته واني ايدي ترجف ..
ششوف؟!!
...
..
..
للحكاية بقيـــة..

بارت صغيروني حتى تتحمسون
لاتنسون التصويت💙

-منة الله الأيوبي.