قدر مراهقة 2

الجزء 98

#قدر_مراهقة2
#ميرال_مجد
#بقلم_فريال
الجزء 98
ياطفلة شبيك تبدلو حوالك غير قبيل كنتي لباس وش صرالك ذوك _ والو والو روح تدوش وكي تكمل طفي ضو بغيت نرقد _ودوش _ راهو قدامك _ ماشي قولتيلي ليلة نبات عريس _ قولت وبطلت ديجا راني نخمم نهبط لتحت عند وليدي لوكان يجوع نرضعو من صدري خير من البيبرو _ لا خلي يما تقوم بيه وترضعو وانت شبعي وليدها _ لا _ مش بكيفك قال كلامو وجرجرني وراه لدوش.
ليام يجريو ويفوتو ويعاودو يوليو بصح عمرنا اذا فات مايوليش نكبرو ونتبدلو بزاف كاين الي يبقى كيف كان وكاين الي يرجع اسوء ملي كان كل واحد كيفاه مداير، اليوم عندي 22 سنة وطفل وطفلة (رسيم وليليان) وحامل بطفل تاني عندي 3شهر حمل وحمي كيما لعادة ميبانش مع لول وميتعبنيش بزاف غير مع لخر نكلب ويطير عقلي ومع تربية وليت نعيا بزاف رسيم عندو عامين و3شهر وليليان عندها عام وشهر ( بينها وبين رسيم عام وشهرين) مطولتش بزاف ورفدت بعد ماولدتو وتاني نفس الشي بعد ولادة ليليان ب10شهر باش زدت رفدت كنت نشرب دوا غير قيس مانكبرهم شوي ونزيد ومجد جاتو عادي اصلا يحب لولاد وانا تاني حابة نجيب ونعمر دار ونسد الفراغ الي خلاتو لجين في حياتي (منسيتهاش ولا بعمري راح ننساها تبقى بنتي لكبيرة)، خاوتي تاني زادو عندهم لولاد وائل جاب طفل تاني واسراء زادت طفلة ومبغاتش تزيد قالتلي 3 عياوني واسيل عندها زوج ولاد مرت بابا غير كيما ولدت وتصلحت علاقتها ببابا ورجع متقبلها في حياتو معندهاش بزاف ملي ولدت طفل ومزالها نفسها تربي في ريتال وتعيطلها ماما ومام هي مقصرتش من جيهتها. كنت كيما موالفة نطلع ونهبط في الانستا مقدرتش نرقد بقيت زي لبومة نتفرج ايا نطلع ونهبط حتى طحت فواحد المنشور مستفز وعيت نسكت دخلت باش نسب لقيت وحدة تم حاطتلهم جريدة هاه ماجيت نقراها حتى تعماو عينيا ايا كفات ووفات قالت وش كان في قلبي كامل ريبونديت وقولتلها عندك الحق والله قولتي وش كان في قلبي كامل خلاتني مردتش عليا ايا جا واحد يلبز ويطيح ردت عليه تاني ولمرة هذي قالتلو روح ترنك انا هنا قولت شبيها هذي هو كي سب ردت عليه وانا كي شكرتها خلاتني معلقة هاه باين عليها مريضة في عقلها ايا بقات هي وياه كلمة بكلمة وهذاك البغل غلط وريبوندا على تعليقي وطيحلي ونوض ليه والله ماسكتلو الخامج من بكري قلبي معمر من جيهتو غزلني مايفرقش بين الاحد والاثنين وجاي يشرك فمو هنا وداخل في مجمع النسا كي كثر بزاف قالتلو هذيك ربي يهديك ولا يديك وروح لعند الرجال يعلموك الرجلة ويعاودو يربيوك لانو باين عليك مخنث قالت كلامها وراحت خلاتو وحدو زي لكلب، ايا انا بعثتلها بريفي حابة نداصرها ونسقسيها منين هي لانو قالتلو كلمات مفهمتهمش انا ونحب نتعلم كل مايتعلق بالتطياح باش كي يقلقني كاش واحد نسبو وميفهمش.
#فريال