قدر مراهقة 2

الجزء 101

#قدر_مراهقة2
#ميرال_مجد
#بقلم_فريال
الجزء 101
هو بقا يتجاهلني ويسمط فيا مع انو عارف بلي هاذ الجاست تقلقني وتخليني نخرج من عقلي وهكاك ويديرها باش ينطقني بالسيف ونتلاصقو مرة ثانية ايا انا خليتو وحدو وحدو نفش وركح شوي وفي الوقت هذا كملت الجزء الاول وقولتلها الثاني حطيه كي نولد ولا بعد ولادتي ماتدري وش يزيد يصرا المهم خليه ذوك منيش قاعدة باش نكملك بغيت نوجد روحي شوي، وهذاك الي كان وجدت قشي وقش البيبي بوخفيف تقول كنت حاسة واش راح يصرا. في سبتمبر ولدت وللاسف طفل زاد ميت وهاهو تحقق حلم ماما وماتولي 3 بيبي في كرشي محسيتش بيه وطفلة كبرت قدامي وبدات تمشي وداتها لموت وذوك وليدي خرج من كرشي ميت وياشحال يهبل يشبه للجين بزاف ملامحو كيفها تقول هي بعد، نهار هذاك كي خرجوه من كرشي وقالو بلي ميت كرهت وجهلت وبقيت ندعي على روحي بالموت ياربي اديني عندك وريحني خليني نتهنى اني عيت كل مرة نخسر واحد من حبابي ولا ولادي بزاف عليا ياربي اديني لعندك وهنيني من هاذ لعباد طبيبة تحكم فيا وتحاول تهديني وانا نطير ونندب دم مداير حالة كانو مزال ماخيطوني قولتلهم خلوني نشوفو قبل ماتدوه خلوني نبرد قلبي ونشوف وليدي قبل مايديه لقبر ونتحرم منو، بكيت وبكيتهم معايا وجهلت تاع صح بعد ماشفتو وبستو داوه وخرجوه وانا دارولي برا وكملو خيطوني ماحسيت بوالو كلش فات عليا كأنو كابوس سيء كنت نتمنى يكون كلش كذب وكي نوض نلقى ولدي قدامي بصح للاسف مكانش ربي يرحمو مات. والي كملت عليا كي قالتلي طبيبة متزيديش ترفدي على الاقل بعد عامين جبتيها واحد مور واحد ولمرة هذي نضريتي تكملي هكا ينحولك الرحم تاعك انا تم سبيتها قولتلها ماعندو مادخلك وغير لولاد الي نزيد نولدهم وانت اخدمي خدمتك وبلعي مجد كان يسمع وساكت مابغى يقول والو قدامها كي خرجت قالي متزيديش ترفدي حتى ترتاحي صحتك اهم ومزالك صغيرة وتزيدي تولدي متنسايش بلي عندك زوج ولاد يستناو فيك كي تروحي انت شكون بيهم _ هاك انت _ منقدرش نكون ليهم اب وام لانو بلاصة الام وحدها _ ايه شكون يعرف قيمة الام كثر مني انا الي تيتمت وبقيت وحدي ماكان لا الي وريلي لا الي يرشدني ويعاوني مكانش بقيت وحدي _ ربي يرحمها ادعيلها بالرحمة _ وين دفنت وليدي _ قدام ماماك. كي قالي قدام ماماك بكيت من جيهة توحشت ماما ولجين ومن جيهة وليدي الي زاد ميت تخلطت عليا جرحي جديد وميبراش. خرجت من سبيطار واول حاجة درتها زرت قبر ماما وبنتي ووليدي لقيتهم دافنينو جنب ماما ومن لجيهة لخرا لجين ايييه يادنيا راحت ماما ولحقو ولادي وراها قدمت قعدت في نص ونحكي كأنو ماما راهي قدامي قولتلها شتي ولادي لزوج راهم قدامكم كي روحتي انت وخليتيني حتى هوما لحقوك وجاو قدامك لانو عارفين بلي راح تحني عليهم ومتخليهمش اماما راني تكويت وعيت كل مرة تجيني ضربة تهدلي حيلي.
#فريال