قدر مراهقة 2

الجزء 105

#قدر_مراهقة2
#ميرال_مجد
#بقلم_فريال
الجزء 105
خاوتي عايشين غاية كل 15 يوم نتلمو في دار بابا مرات نباتو ومرات نسهرو برك ونروحو وهذي العادة الها سنين وحنا مطبقينها، عجوزتي طلبت الطلاق ومقبلش الشايب ناضو كامل ليها معجبهمش لحال سبتهم وحاوزتهم رجعت تلبس سراول ودير المكياج وتظل تحوس ودور تبزع في دراهم الشايب(يستاهل طول عمرها تشفقلو ومتبذرش من بعد بدلها بوحدة صغيرة عليها خلي تفسد وتزيد هذا مايليق لراجل تفرغيلو جيبو، انا ومجد علاقتنا مليحة مرة على مرة ندابزو ورجعت نتبع وحدة فالانستا اسمها زهرة نصائح بزاف مفيدة وليت ندير كيما تقول هي نبدل شوي ونتعرا نديرلو كلش ياك حلالي وكي يكون مقلق منعاندوش كيف قبل هو كلمة وانا كلمة لا بالعكس نخليه حتى يهدا ويرجع لعقلو ويجي يطلب مني سماح وحدو وحدو رجع يشحم كي يعيط عليا لانو مايلقى مني حتى رد بخلاف السكوت (ملي رجعت ندير هكا قللو مشاكلي ونقصو بزاف خير من بكري هو كلمة وانا عشرة وتخلاص علينا كل واحد في شومبرة ومنحكيوش مع بعض بالسمانة). اخر مرة روحت لطبيبة فحصتني ولقات لبيبي هابط بزاف قالتلي متحركيش وماتخدمي والو لانو راكي في الريسك وممكن في اي لحظة يطيح البيبي وتنضري معاه انت تاني لانو الرحم تاعك تضرر بزاف وكان لازم عليك ترتاحي ومترفديش وانت خشنتي راسك وهاهي نتيجة. دخلت لسبيطار ومجد يطير وحدو ويسب فيا قالي نتيجة تخشان الراس ذوك ماربحتي لا صحتك لا طفل وفوقها خليتي ولادك وحدهم يطايشو، سب سب حتى كره وانا غير نبكي غاضني الطفل وتعلقت بيه مش حابة نخسرو نبقى وحدي وماشي غير مجد الي سبني مام خاوتي خالتي بابا كامل سبوني وانا زعما لعبتها زعفت باش يسكتو ويخلوني وحتى هذيك الي تكتب في قصتي وقالتلي علاه ترفدي راسك خشين ومتسمعيش الهدرة دارتلي درس قولتلها الق** ق*** والكرش كرشي وش دخلك الهاي بروحك وبعديني وايا تخلطت هي كلمة وانا كلمة وحدة ماتتنازل وتسكت وتفوت لثانية وكملت كي بلوكاتني انعم هيه خبطتني ببلوك وماشي اول مرة ديرها لا من ديما نقلقها تبلوكيني ومرة عيطتها على 4 تاع صباح باش نحيكلها عفسة رفدت عليا سمعتني وسخ وذني لانو غير كيما رقدت وانا نوضتها ومتقدرش ترجع ترقد ايا وكي كملت بلوكاتني حتى حليت كونت جديد. بالنسبة لعماماتي كل وحدة عايشة حياتها بعيد علينا من غير لم هند دخلت للحبس وسبب لقاوها عند قبر ولدي انعم ايه راحت لقبرو وكانت تدفن في صوالح تم شافوها ناس وشكاو بيها وذوك راهي محبوسة وان شاء الله عمرها تخرج.
هذي هي قصتي بلحوها ومرها نتمنى تكونو استفدتو منها وتعلمتو يالوكان شوي انا عشت بزاف صوالح وتعلمت منهم انو الثقة الزايدة تضر وانو تشراك الفم وتخشان الراس يجيبلك اخرتك وبلاصة الام متتعوضش ومتقدروش تنساوها حتى ويفوتو سنين ماتتنساش هي وولادك متقدريش تنسياهم. انا مزالني في سبيطار واحتمال كبير نقعد فيه حتى نولد مبقاليش بزاف ياربي شهرين ادعولي نسلك على خير ويعيش وليدي لمرة هذي منقدرش نزيد نتحمل خسارتو، انتظروني في الجزء الثالث من قصتي ههههه نتمسخر الى هنا وتنتهي قصتي.
مادمنا احياء قصصنا لن تنتهي ابدا الى حين ينقطع نفسنا ونموت.
                الـــــــنـــــــهـــــايــــــــــــــة❤