أمان

البارت الثامن

وضعه جان ابد مو طبيعي ..لاول مرة اشوفه لهالدرجة مهموم
رحت يما:- شبيك ضرغام
باوعلي وعيونه مليانين قهر
ضرغام:- اطلع هسه احرك الزفة بالي بيها؟
اطلع هسه اسويهم واحد واحد اولهم هو وصلة مالمسح القنادر؟
علك كلب البت بيه ..جي عبالج اني مو مقهور؟
والله شاهد داحترك اني وكلبي على ذيج اللي بالغرفة وعلى كلبها اللي انكسر
رفع راسه علية:- شسوي هالحزه؟
كليلي ساعديني ..ساعديني شسويلها وتهدأ ويرجع كلبها يتشافى
شنو بيدي اني هسه اسويه واخليها ترجع تضحك وتتشاقة مثل كبل؟
وكفت كباله
امان:- راح تنسى ..انطيها وقت وكلبها المكسور راح يتشافه
هيا مسألة وقت بس ..ماراح ينمحي الجرح
بس راح يطيب ماراح تبقى تحبه وهو راح لغيرها كدام عينها
لاتنقهر انت مابيدك شي تسويه
كام يحجي بقهر:- والله والله لو ادري هيجي يصير والله شاهد على كلامي جان من زمان شلت من المنطقة كلها ومابقيت ساعة وحده
امان:- ضرغام لاتحمل نفسك ذنب انت مالك دخل بي
ليش تسوي هيج بروحك ..هو الحقير والجلب
وكتلك عليها وعلى كلبها يتشافى وكلشي يرجع مثل الاول واحسن من الاول
ضرغام:- امان هاي امانة يمي ..هاي قطعة من كليبي شلون تريديني مانقهر واني ادري بيها بهالحزه جاي تموتن الف موته بكاعها
نزل راسه وكام يفرك بعيونه
كعدت يما ماعرف شسوي
بقينا كاعدين تقريبا نص ساعة بمكانه ساكتين نسمع بالزفة وصافنين
انتبهت عليه يمكن خلص باكيت كامل جكاير بكعدته من كد مامقهور
مر باقي اليوم كلنا عبالك عدنا عزا
علياء قفلت الباب عليها وماتريد تشوف احد
ضرغام بقى بالصالة مايحجي ويه قسم بشر حتى اني خفت احاجيه لايعصب علية
كل واحد جان بعالم ..ثاني يوم سمعت الحجية تحجي ويه نبا
ام ضرغام:- لحد هالحزة اخيج بالغرفة ماطالع
نبا:- يعني ماراح للشغل؟
ام ضرغام:- شيروح ..دحكي وجهه بعد حيلي شكد تعبان
نبا:- اووووف يضرغام شايل هم الدنيا كليتها فوكاه
ام ضرغام:- من عمري لعمره بس لا اشوفنه هيجي
نبا:- هم لايبقى شايل على علياء يعني قابل شتسوي
ام ضرغام:- هو مو بس بسبب عملتها ..هو مقهور عليها همين اني ادري بوليدي الليل مانامة من حزتها لان اذاها وضربها
مريت من يم الصالة شوية جان بابها مفتوح
بقيت واكفة لمحته متمدد وداير وجهه للحايط
كلبي اذاني عليه ...اول مرة من صدك هيج يكون مقهور احسه ومابيدي شي اسويه
شايف هالعجز اللي يصيبك وقت اللي تشوف اللي تحبهم متاذيين؟
بس مابيدك شي تسويلهم
وكعت بين حزني على علياء وعليه ...
..بعد الغدة كلمن يروح لمكانه الحجية تنام ونبا تتفرج على مسلسل لو جانت تخيط  هاي اغلب وقتها
طلعت للمخزن اللي صار المرسم مالتي واحسه ملجأي لمن ماعرف شسوي
بديت اشخبط ..ماعرف شرسم!
ايدي ماجاي تلزم ولا تمشي على رسمة معينة جني متوقفة صارلي سنين ..
سمعت صوت الطكة مالمقدحة ...باوعت من الشباك لكيته طالع بالحديقة وديصفن عالنباتات والاشجار
طلعت راسي وصحت:- رجاءا جاي تزعجني تره
فز وندار علية ...ابتسم ابتسامة خفيفة
اشرتله بيدي بمعنى تعال ...
..اجاني يتمشى ..
جان دائمًا يلبس اسود ماشفته بغير لون ..كل تيشرتاته وبناطيره سود
بس هلمرة جان لابس دشداشة سوده
جنت مطلعة الغراض الجايبلياهم وفارشة بالكاع وكاعدة وهو كاعد كدامي واني داشخبط
بدون ما اباوعلة گلت:- انت تدري ان الرسام الايطالي اميدو موديلياني جان يرسم لوحاته بدون بؤبؤ العين؟
جان ديطلع بجكارته العاشره
..باوعلي وگال:-وليش عود!
امان:- لان يعتبرها مثل النافذة للروح ولهذا عنده مقولة كايلها
عندما اعرف روحك سأرسم عينيك ..
باوعلي بنظرة ورجع نزل عيونه من عني
تقربت شوية وگلتله:- بس شخص واحد رسم عيونه
رفع راسه علية
ضرغام:- ومنو؟
ابتسمت ورجعت لمكاني:- جين هيبوتيرن ...مرته
گلتها واني داحط اخر نقطة واخر لمسة على ملامحه بالرسمة!
تعدل:- شو شوفيني شنو رسمتي
بسرعة شلتها وكلبتها على ضهرها:- لااا
رفع حاجبه:- وليش
كمت اتلعثم:- هيج ..ماحب احد يشوف رسماتي وبعدني مامكملتهن
ضرغام:- شوكت تكمليها عجل ..جتلنا الفضول ابويه
ضحكت:- هناك راسمه جم وحده روح شوفهن
ضرغام:- لا اني اريد اشوف هاي
حجاها واشر عليها ..هزيت بجتفي
امان:- لا هاي ممنوعة من العرض هسه
ضرغام:- يابة ندفعلج شكد ماتريدين
امان:- هسه شلحيت بيها
ضرغام:- مادري اريد اعرف شراسمه بيها ..خاف راسمتني
باوعتله وصحت راسا:- لاااا شعندي ارسمك
ضرغام:- مو اني همين داكول ..اجلح املح شترسمين مني
انوبه لابس دشداشة همين لو مترتب
ضحكت واني اشيلها وحطيتها عالحايط ودرتها على ضهرها
ماجان عاجبني يشوفها ..
حسيتني راح اتفشل لو شافها وشنو يفكر هسه
مايكول ليش رسمتني!!! ...هو اني صدك ماعرف ليش رسمته بس جان بلا وعي مني ....
...
..مرت الايام
طلعت علياء وبدينا نقويها واسند بيها واحاول انسيها الجرح
جنت بكل لحظة وياها ..اني اكثر وحده تقربت منها
بهيج حاله لمن الشخص يفقد الانسان اللي حبه
يكون محتاج لكتف يتنسد عليه ..لكلمة حلوة تقويه
لاهتمام يجبر بخاطره يحسسه ان بعد الدنيا ماتستاهل تشوفها مو حلوة
لضحكه تنسيه الموضوع او على الاقل تخليه يتاقلم ويتناسى ...
لهذا جنت ما اتركها على طول وياها ..العصريات كلها نكضيها بالمخزن ونشخبط ونرسم ونسولف ونضحك
جنت اسولفلها على كل المسلسلات اللي شايفتهم بحياتي بشكل قصص
وهي تتجاوب وياي وتتفاعل
ضرغام بدا يقضي وقته كله هو برا ..بحيث مرات جان يطول باليومين هو ماكو ...
جانت الدنيا ليل
اندك الباب دكه وحده ورا الخ مالواحد مستعجل
الحجية بغرفتها وسهير وعلياء يتفرجون عالتلفزيون
نبا تسبح
سمعنا طلع ضرغام يفتح الباب
كمت وكفت من الشباك المطبخ اشوف منو
جنت انسانه فضولية بشكل مو طبيعي ..مو بس فضولية
احب استكشف وزاد عندي هالشي لمن اجيت يمهم
اباوع ..طبو ثلاث شباب
حسيت ضرغام استغرب لمن شافهم
هو وديطب انتبه علية واكفة واباوع
طب علية للمطبخ وزكح بيه:- شتسوين هينا ..ماشوفج واكفة بوجهج لجوا يلا
امان:- ضرغام منو هذولي
ضرغام:- مايخصج ودخلي للغرفة
امان:- وشدعوة هالعصبية
ضرغام:- سمعي الحجاية
ردت اروح راسا رجعت عليه:- بس منو هذولي
ضرغام:- ويامن جاي احجيييي
شفته تعصب مو مال اعاند
طبيت مثل الحبابه ...
مرت ساعة ونص كلت اكيد راحوا هسه
طلعت للمطبخ انتبهت واحد من الشباب واكف بالطارمة
بالبداية ماهتميتله ..بس سمعته جاي يكح كح مالواحد راح يموت
انقهرت عليه والله ماتحملت اشوفه هيجي بدون ما اساعده
اخذت بطل مي وفتحت الباب شوي
امان:- تفضل
ماباوعلي بس مد ايده
علي:- اي والله ..عاشت ايدج
امان:- لا ولو
ندار علية لمحني بطرف عينه ..استغرب:- امان؟؟؟
طلعت باقي وجهي وكتله:- من وين تعرفني؟
ضحك وكال
علي:- اصلا اني الخاطفج
امان:- شنو؟
علي:- ماجنت اعرف ضرغام جابج لهينا
امان:- اي مو ضروري تعرف
علي:- كال عافج تسافرين
هزيت براسي بمعنى اي ..ردت اسد الباب حط ايده ورجع فتحه
علي:- بس دقيقة عليج الله
استغربت من حركته ..باوعتله:- ها شرايد
علي:- ممكن سؤال..ليش اجيتي هينا
امان:- وانت شعليك
علي:- يعني تريدين ارجعج؟
امان:- احد اشتكالك؟ ..ليش تدخل
علي:- لا يابه بس حبيت اساعدج
امان:- اي شكرًا
ابتسم ابتسامة مالمستهزء وكال:- واني اكول ليش ضرغام لابد بالبيت صارله فتره حتى للشقة صاير مايجي
باوعتله:- شنو تقصد يعني؟
راد يجاوبني ماشوف الا ضرغام طلع ووكعت عيني بعينه
عيونه صارت حمرا دم بس لمحني وعرك كصته طلع
راسا سديت الباب من الخوف ...بقيت واكفه خلف الباب
كلبي يرجف من اشوفه بهالشكل
سمعت صوت باب البرا انسد ..اجاج الموت
اندفس باب المطبخ واني جنت خلفه
ضرغام:- اني شكايلج؟ ..هااا
شحجيت اني؟
حجاها وهو يتقرب علية
امان:- بس انطيني مجال افهمك والله
ضرغام:- شكااااايل اني ليش هالعناد اطلع عليج الكيج برا شني هاي
امان:- بس افهمني
ضرغام:- كتلج دخلي لاتراويني وجهج واطلع الكيج واكفة وتطكين حجي ويه صديقي شيسمونها هااااي
امان:- هسه دنطيني مجال اشرحلك
كام يصيح:- شتشرحيلي خاتون شتشرحيلي ..شلون جاية تتعرفين عالزلمة
امان:- ضرغااااام احترم نفسك ماسمحلك تره
ضرغام:- تسمحين والا ماتسمحين دكي راسج بالف حايط ليش هالعنااااد هذا ليييش
باوعتله صرت نار:- لاتصيح
ضرغام:- لصمي حلكج لا اللطمج بمكانج هسه
امان:- هه وشحلاتك تمد ايدك بعد
ضرغام:- داكول لصمي حلكج
امان:- ما اللصم وشتسوي سوي ديلا
يباوعلي وكام يفور ..تعصب واحتقن وجهه
جان يمنا على ميز الاكل سيت كلاصات مالغده غاسلينهم ومخلييهم عالميز
كول هيج واسحبهم كلهم وكعهم بالكاع سويهم طحين
من الخوفة صرخت
عاط بيه وهو ياشر للداخل:- بوجهج للغرفة يلا
باوعتله:- شنو طفلة كدامك ماطب والله
ضرغام:- امااااان
عفته وطلعت من المطبخ ..يباوعلي يحسبني رايحة للمخزن
لبست نعالي وكول هيج بوجهي لباب البرا
سمعته صاح:- وين وين وين
هي ركضة لزمتها اول ماعتبت باب البرا
مادري وين رايحة ولا شنو ببالي اسوي بس اعانده
اركض بالمنطقة اريد بس اطلع ..باوعت خلفي لكيته طلع للباب ويصيح ماسمع شيكول
انداريت وكملتها اركض اركض بكل عصبيتي اللي يشوفني يكول هاي مخبلة
بحيث حتى من كد الركض جان النعال جبير علية انكطع شلته بيدي وكملت ركض
منطقتهم جانت قديمة وهوسة
طلعت منها وامشي واحجي ادردم عليه
ليش شدعوة كل هالعصبية هاي قابل شسويت
جان يكدر مثل الاوادم يكعد ويفتهم مني مايحتاج يصيح
ماسمع الا صوت هورن قوي وراي عرفته هو
ماهتميتله ولا نداريت
اباوع على روحي بالدشداشة وتك النعال طالعة
بس من كثر الخبال ماعرفت شداسوي
بقى خلفي ويدك هورنات خبص الدنيا
جيت اعبر لصفحة الخ دامشي وعيوني منزلتهم
ما اشوف الا ضوة سيارة وهورن يجيني من اليمين يعميني عمي
شعررة بيني وبين السيارة ...
...وشحط ووكف يمي بااااخر لحظة
فزيت فزة بحيث كمت اتشاهد بكلبي
بسرعة عبرت للرصيف..
اباوع نزل ابو السيارة ومادري يباوعلي وشيحجي ويصيح وياشر بيده علية
اباوع للجهة الخ ضرغام هم وكف واجاه يركض لزم الولد من ياخته ودك رزايل وفشار العالم اللتمت بنص الشارع وهذا اللي يفاكك وهذا اللي يصور
ودك الهورنات والهوسه صارت بفلس
بسرعة وكفت خلف عامود هسه يصوروني شيكولون
بس اريد ضرغام يعوفه عاد ماكدر ادخل ولا بيه ابقى واكفه اصفن بيهم
فاككوهم العالم كوه بحيث واحد دخل بنصهم وطلع ضرغام يصيح ومعصب عالولد
ضحكت بيني وبين نفسي مع العلم نحنا اللي غلطانين
اخر شي عاط عليه ضرغام:- كلمة الخ زايدة اوصلك لهلك متكسر .. جي ارجع احمد ربك واشكره ماصارلها شي جان عيشتك ميت وحق ربك
سكتوه العالم كوة ..
عبر يمي اني مكرفصة يم يم البوري من الخوف
اجت يمي حرمة جبيرة شوية وبيدها بطل مي:- صارلج شي بنتي
هزيت براسي ب لا
انطتنا البطل وراحت
اجا كدامي ضرغام:- تاذيتي يوجعج شي؟
جسمي كله يرجف وهسه يلا نزلت علية الخوفة
اخذ بطل المي وفتحه وانطاني اشرب
رجع اخذه وصب على ايده وتقرب ادنى على مستواية
باوعلي وكول هيج مد ايده ومسح على وجهي
ضرغام:- شمالج بوية ترجفين بسج عاد
اني استغليت الوضع هم حتى لايعصب علية
كومني ومشاني للسيارة قبل لا نصعد جان لابس تراك بي جاكيت
نزعة وراد يحطها علية راسا وخرتها وكلت:- ماااريد وخر
عاط علية:- بلا عناد لا وحق ربج اطكج طكه بنص الشارع وكدام الاوادم
امان:- شكو تبلسني مو باردتلي
ضرغام:- عنج لابردتي دحكي هدومج الوليتي بيها
سحبني علية وحط الجاكيت على جتافي وسدها لحد ركبتي
صعدنا وراسا نداريت للجامة ماريد اباوعله من الخوفة
مشى وهو يحجي علية بصوت ناصي ممفهوم
نزلت راسي كفخني عطرة اللي بالجاكيت ..
...ابتسمت ..
قربت وجهي من يم الجتف وغمضت عيوني كمت اشم بيها
احس العطر وصل لريتي
بلحظة نسيت كلشي ودخلت لغير دنيا ...
فتحت عيوني لكيتنا واصلين البيت
ردت افتح الباب راسا قفله من يما
ضرغام:- اكفي
شفته هادي ومو متعصب
امان:- شكو
ضرغام:- راح احجي مثل الاوادم وجاوبيني ..شجنتي تطرنين تحجين معاه؟
نداريت تعدلت كدامه وكتله
امان:- والله ماجنت احجي شي طلعت للمطبخ عبالي رحتو اشو سمعت صوت واحد ديكح خفت عليه اخذت بطل وانطيته من الباب مديت ايدي حتى ماطلعت وجهي ردت اساعده بس وتفاجئة بي يعرفني وعرفت هو اللي خطفني وكام هو يسولف
ضرغام:- انتي منين نزلتلج هالروح والطيبة وقررتي تساعديه ..شعليج بي؟
عساه يموت انتي شعليييج
امان:- خفت والله
قاطعني ضرب ايده عالستيرن بقوة:- ماريد اسمع هالكلمة
سكتت ونزلت راسي
تنهد وكال:- الحركة السويتيها اليوم ماريدها تنعاد
باوعتله:- ياحركة
ضرغام:- مالتطلعين من البيت ..المنطقة هينا مو امينة مليانة مسلبجية مليانة ناس ادبسززية شتريدين شي وصخ بيها
لا عبالج مثل مجمعكم الحراسه تارسته ترس ..تره هينا تطلع برا البيت اذا رجعت سليم مابيك شي ماكو شي مبيوك منك هاي الله يحبك
والا انتي مبينه مو من هينا
امان:- انت عصبتني
ضرغام:- ادري عصبتج تكومين تشردين ..وين نحنا
توم وجيري تركضين وتخليني مثل المسودن بس اريد اللزمج
ضحكت
ضرغام:- ام الفواين وتضحك همين
حسيته رجع على طبيعته ونبرته صارت شقة
امان:- ما اوعدك
ضرغام:- لا اله الا الله
فتحت الباب عالسريع نزلت وطبيت ركض للبيت تلكوني البنات
نبا:- انتي زينة خومو صارلج شي
علياء:- شني الصار بينكم حتى وصلتو هيجي
امان:- شكو شبيكم
نبا:- يولي غير سمعناكم صوت عركتكم بالمطبخ وفجاه اختفى وطلعتوا كلنا اكيد سوالج شينه وكام يحير بيج بالمستشفى
امان:- لا شدعوة
نبا:- لاتجذبين احجي انتي مثل ماهو اخوي انتي اختي
صفنت بيها
راسا سهير حجت من مكانها جانت كاعدة بفراشها
سهير:- يبووووي شكبرتو الموضوع ..مبينه ماكو شي حتى دحكو عالجاكيت اللي لابسته
باوعت تذكرت لبسني جاكيته ونسيت انزعها ..صخاااام هسه شيكولون
بسرعة نزعتها وطلعت برا الغرفة
لكيته بالمطبخ جاي يقفل بالباب
مانتبه علية :- احم هاي جاكيتك
خليتها عالكرسي ورحت
سمعته صاح كال:- عفوا ابوية
نزلت راسي ضحكت وركضت للغرفة
...
......
ضرغام:- يول لاتلح
علي:- ابو زمن اسمع مني هي شغلة ساعة ساعتين نكملها ونرجع
ضرغام:- ابوية انت عوفني مرتاح كاعد ببيتي
علي:- عليش خايف
ضرغام:- خاب ماتنجب شني خايف
علي:- عجل عليش ماتريد تجي معانه
ضرغام:- يول تعرفني من زمان مادخل هيجي شغلات
ضرب على جتفه:- كول يالله ووافق والليلة نتوكل
ضرغام:- دحك روح من وجهي ولاتراويني شكولك يلا
حجاها وسد الباب ..
ركض رجعت لمكاني جنا كاعدين نتغدة
ضحكت الحجية:- يا يمة دحكو عالفضول
علياء:- مسودنة شمالج
امان:- غير سمعت صوت ضرغام عالي ردت اعرف منو جاييه بهالوقت
عقلي تشوش
شنو الموضوع وليش هلكد جان متعصب ضرغام!
وشنو هاي الشغلة اللي ماديرضى عنها وعلي ديلح!
الوجوه كلها بقت تباوعلي واني اصفن ...
نحنا وواكفين ننظف المطبخ بعد الغدة
وكفت يم نبا تغسل مواعين
امان:- نباا اسالج سؤال
نبا:- اي خيه اسالي
امان:- ضرغام شنو شغله
نبا:- ابو حمل ..يشتغل بشركة ينقل ويجيب الحمل للاسواق
هزيت براسي
باوعتلي:- ليش يولي
امان:- علي لعد صديقه ..شنو شغله هم وياه؟
بس سمعت باسمه تغيرت ملامح وجهه ..باوعت للباب خاف اكو احد ورجعت تقربت مني
امان:- شبيج
نبا:- هذا عليوه كلبي مايرتاحلة
امان:- واني من هيج سالتج عنه ..احجيلج شي ويبقى بينا؟
هزت براسي وقربت اذنها
امان:- سمعت ضرغام الظهر ويه هذا علي مادري شنو جان ديلح عليه بشغلة وضرغام مو راضي
بقت ساكته شوية ورجعت كلتلي:- دامج حجيتي اني همين احجيلج
سدت حنفية المي ومسحت ايديها بهدومها
تقربت مني اكثر وهمست:- ضرغام وهذا علي عدهم غير شغلة سوا
امان:- شغل شنو يعني
اشرت بيدها:- مثل عصابة هيجي شي
باوعتلها مصدومة:- يعني شنو يكتلون وهيج
نبا:- لااا مادري بالضبط بس لا ماتوصل لهيجي مثلا خطف ابتزاز كتل مو للموت ..بس حسب اللي اعرفه اني
هذا عليوي وراه مصايب توديه خلف الشمس وضرغام يغطي عليه ويحميه
...بقيت اصفن
هو اني ليش مستغربة غير علي هو اللي خطفني وجابني لهنا؟
فززتني من صفنتي:- ماتحجين لاحد تره بس اني وعلياء ندري بهالموضوع
هزيت براسي:- لالا مخبله حتى احجي لاحد
عفتها ورحت تمشيت اطب لجوا
احسني انسطرت ..توقعت هذا مسجل خطر وراه سالفة
...مريت من يم الصالة
فززني صوت ضرغام وهو ديخابر
راسا ضميت روحي خلف الباب وبقيت اسمعه
وحاولت اركز قدر الامكان
سمعته يحجي:- ديلا ..جي حتى تطير من فوك راسي اعرفك راح تبقى تلح مثل الارملة
ديلا على اتفاقنا عجل ..روح
الله وياك هلا
...تبسمرت بمكاني
يعني وافق على هالشغلة!!!
رجعت لنبا ركض واحجي بهمس
امان:- الحكييييي
فزت:- شني ولج شكو
امان:- ضرغام هسه سمعته وافق على هاي الشغلة اللي ويه علي
ضربت على صدرها:- صخااام بس لا يورط اخويه بشغلاته الوصخه
سكتت شوية
مخمخت فكرة براسي
وباوعتلها:- تجين وياي
داتحجي واسمع صوت ضرغام شل جسمي كله من فوك لجوا
ضرغام:- وين تولون
اباوع لنبا صفرت ..وكف كدامي اشرلي براسه
بلعت ريكي:- ها مو بمكان قابل وين روح يعني
هز براسه وقرب وجهه مني:- طلعة من باب البيت ماكو
حجينا وكلنا هالمنطقة مو مالت تفترن بيها ..مو شارع المتنبي هي
هزيتله براسي:- اي شبيك منو كال طالعين اصلا
تعدل ووخر مني:- عجل شني سالتيها تجين وياي
ردت احجي راسا قاطعتني نبا:- اي تريد نروح للمخزن عبن تخافن لوحدها من تظلم الدنيا
هز براسه وباوعلي نظرته مالواحد ما مرتاحلي
بحيث مشى وهو بعده يباوعلي
طلع ..ردت احجي راسا سكتتني نبا واشرتلي بيدها
نبا:- اششش بعده ماطالع اسكتي
رحت للشباك شفته طلع
امان:- وهسه شون طلع وماراح نعرف وين رايح
نبا:- شني اللي جان بدماغج
امتن:- كلت نلحكه على الاقل نشوف وين راح
ضحكت ضحكة من كل كلبها
نبا:- والله انتي على نياتج ..يا اما ذولي مسلسلاتج التركية عمت عليج
امان:- ليش يعني
باوعتلي:- مسودنة انتي ..تريدين تلحكين ضرغام
يولي بطرف عينه يلكفج ويسوينا عصير والله
ضربت رجلي بالكاع:- ماراح تجيني نومة اذا ما اعرف هذا الحقير شنو راد منا
نبا:- والله ياخيه خليتي الفار يلعب بعبي
مسحت ايديها وعدلت روحها واشرتلي نطلع برا
امان:- وين
نبا:- تعاي للمخزن لا احد يسمعنا
شغلت المبردة وكعدنا
جانت كعداتنا بالكاع لهذا يعجبني ابقى كاعدة بي
باوعتلي:- اكول ..شدعوة كليبج هيجي خايف
حجتها وغمزتلي
امان:- شنو قصدج
ضحكت:- لا هيجي خية سلامتج
باوعتلها:- تره اني وهو مثل الاخوة
هزت براسها ماراضية:- اي اي ادري
امان:- عابتلج ..على كولتكم شوكت تجي قسمتج وافتك منج
اشرت بيدها:- لاتنتظرين
امان:- ليش شحلاتج شابة والف واحد يتمناج
نزلت راسها:- لا اني ماريد
الزواج تعب كلب ماهو ونسه وكيف وفستان ابيض ومكياج
انتي تختارين شخص مستعدة تكملين الباقي من عمرج معاه مرتاحه
امان:- اي ويامكثر الزينين ليش تقفليها على روحج
نبا:- ذولي الزينين الدادكولين عنهم ..موجودين بس بالروايات ومسلسلاتج
امان:- لا مو شرط
نبا:- خية مايفيدج لاتقنعيني ..اني صغيرة انولدت بيه كره الزواج والخلفة
امان:- لازم صار كدامج موقف خلاج هيج دكولين
باوعتلي وهزت براسها مقهورة
تنهدت:- امي وابوي ..من جابوني لهالدنيا وهما مابيوم صارو زينين مع بعض
امان:- احتمال بسبب ابوج ..انو طبعه جان صعب
نبا:- اصعب من ضرغام بعد ..اللي عرفته بعدين
انو جان عينه على بنية وانغصب على امي ..وهي خلصت عمرها تداريه وتهتم بيه وهو كضه عمره ماحبها
ومن بدا ينجذبلها ..جي راح سكن الكبور
امان:- جانو يتعاركون كبالج؟
نبا:- اوو جثير ..اصلا من اتذكرهم اتذكر عركاتهم تجي ببالي بس
امان:- بس باقي الناس طبعهم يختلف عن طبع والدج ..مو يكولون مو كل اصابيعج سوا
سكتت شوية ورجعت كالت:- خليني هيج خيه ..اداري امي وعيني على خواتي وباجر اذا الله قسملهم واجا نصيبهم منو يبقى يم الحجية
جي نعوفها بروحها قابل
امان:- اي تمام بس هذا حقج ..يعني مثلا ماتتحمسين يكون عندج طفل وهيج تلعبين بي وتكزكزين عليه
نبا:- عبن لذاك الوكت جهال ضرغام يجوني
سكتت راسا ..كمت اللعب بالفرش مالالوان سويت روحي ملتهيه
....
..مر يوم ..يومين ..الثالث
وخمس ايام بعيد عن البيت وخطه مغلق
..مارجع ولا اتصل على وحده بينا
وفجاة اجت نبا دكول الحجية جايتها رسالة فتحنا التلفون لكينا جايتها رسالة منا
ضرغام:-
...
..
..
.
للحكاية بقيـــة..

-منة الله الأيوبي.