An Knows My Heart || မြန်မာဘာသာပြန် ||

「11」

အိပ်ခန်းအတွင်း၌ ပြတင်းပေါက် မဖွင့်ထားချေ။ အခန်းထဲရှိ အငွေ့အသက်များထဲတွင် နေ့ခင်းပိုင်း၏ အပူငွေ့လှိုင်းများ ကြွင်းကျန် သေးသည်။ သို့ရာ "တောင်းပန်ပါတယ်" ဟူသော စာလုံးနှစ်လုံးက သူ့ဖုန်းမျက်နှာပြင်ထက် ထွက်ပေါ်လာချိန်တွင်မူ အခန်းအပူချိန်က အလျင်အမြန်ကျဆင်းကာ အေးစက်သွား သည့်နှယ်။

ချီးရှစ်အန်းသည် မျက်နှာလည်း မပျက်သွား၊ အကြည့်များလည်း မပြောင်းလဲသွားသည့်တိုင် သူ အောက်သို့ ဆက်ဆွဲချ၍ မကြည့်ရဲပေ။

သူ့၏ အလုပ်သည် ရုတ်တရက် ဖြစ်ပွားတတ်သော အခြေအနေပေါင်းများစွာကို ကြုံ ရတတ်သည်။ အစီအစဉ်တကျဟူသော အရာကို ရိုက်ချိုးဖျက်ဆီးတတ်သော ကိစ္စများ မကြာခဏ ဖြစ်ပွားတတ်သည်။ ထို့ကြောင့် တော်ရုံတန်ရုံ အပြောင်းအလဲကြီး အများစုနှင့် ကြုံလျှင်တောင် သူသည် ပေါ့ပေါ့ပါးပါး ရင်ဆိုင်နိုင်သူ ဖြစ်၏။ သို့ရာ ယခုလက်ရှိ အချိန်တွင် ဤတောင်းပန်ပါတယ် ဟူသော စာ လေးတစ်စောင်သည် သူ့လက်ကို အပူလောင် နေသည့်နှယ်၊ မထိရဲ၊ မကိုင်ရဲ ဖြစ်ရ၏။ သူ လက်ခံ၍ မဖတ်ချင်ပါ၊ စာထဲတွင် ပြောလာမည့် အကြောင်းအရာများကို သူ စိုးရိမ်ပါသည်။

ထိုတောင်းပန်ပါတယ်ဟူသော စကား တစ်ခွန်း၏ နောက်တစ်ကြောင်းသည် သူ တစ်လျှောက်လုံး မဖြစ်ပွားစေချင်ခဲ့ သော ရှန်သောယိဘက်မှ ပွင့်ပွင့်လင်းလင်း ပြောလာမည့် စကားများ ဖြစ်နေမှာကို သူ ကြောက်သည်။ ဥပမာဆိုလျှင်၊ အလုပ်ထွက်တော့မည်ဟူသော၊ ထပ်ပြီး ဥပမာဆို၊ ကုမ္ပဏီ ရဲ့ အချက်အလက်တွေကို ပေါက်ကြားစေခဲ့မိ လို့ တောင်းပန်ပါတယ်ဟူသော... အရာများ။

အပူချိန်ကျဆင်းသွားပြီးနောက် ရုတ်ခြည်း မွန်းကြပ်လာသည်။ ချီးရှစ်အန်းသည် ထရပ်ကာ ပြတင်းပေါက် ဖွင့်လိုက်သည်။ ဖွင့်ပြီးနောက် လေတိုက်ခံလိုက်သေးသည်။ ဆော်သွေးနေသော နွေဦးလေပြေ နုနုသည် ထူထဲ လေးပင်လှသော ပြတင်းခန်းစီးအား ရွေ့လျားအောင် မတိုက်ခတ်နိုင်သော်ငြား သူ့၏ စိတ်ပူပန်မှုများကိုတော့ အနည်းငယ် လျော့ချ ပေးနိုင်လေသည်။

နောက်ထပ်တစ်ကြိမ် ဖုန်းကို ပြန်ယူလိုက် သည်။ မျက်နှာပြင်ထက်တွင် မှိန်ဖျော့သွားတော့မည့် အရာလေးကို ညင်သာစွာ ထိခတ် လိုက်၏။ ထို့နောက် လက်ချောင်းထိပ်က ရွေ့လျားပြေးလွှားသွား၏။ ဆက်လက်ပြီး ထွက်ပေါ်လာသော အကြောင်းအရာများကား အခုတော့ သူ့မျက်စိအောက်သို့ ရောက်လာ ချေပြီ။ ချီးရှစ်အန်း၏ နှုတ်ခမ်းများသည် ဖွင့်ဟသွားပြီးနောက် ပြန်ပိတ်သွားသည်။ လုံးဝပင် ပြောစရာစကားများ ပျောက်ဆုံးသွား လောက်အောင် အသက်ရှူရပ်ပြီး ဆို့နင့်နေဟန်။