تركه مصدوم وبنفس الوقت موجوع
مايدري الوجع من غدرَة طليقته ولا من ظلمه لبحر طول هالسنتين سنتين ماهي قليله ! !
قرب عنده آسر يربت على كتفه بمحاولة تبسيط الوضع عليه ونطق بـ : سلمان خيره صدقني كل الي صار خيره
خذها من الناحيه الايجابيه أنك عرفت نوعية نوف
لف عليه وبملامحه القهر والحزن ينتظره يكمل : ومن الناحيه السلبيه وش ؟ ، أكمل عنه : ومن الناحيه السلبيه أن خويي تحَمل ذنب ماهو ذنبه
أكمل وهو يمشي لسيارته ويضرب فيها : سنتين سنتين متحمل كل الكلام والكره الي يجيه مني
صرخ بقهر : مافيه أنسان كان بيتحمل كل هذا ياآسر
جلس على الأرض تارك نفسه منهد
و بقهر نطق : صديت عن اخوي وعطيته ظهري وهو طول هالسنين...
سكت وبغصه تحرقه : طول هالسنين ماكان يبيني أعيش شعوره مايدري اني عشت مثل شعوره وألعن من كذا يوم اني معطيه ظهري وهو وحيد ماله الا احنا
آسر بحنيه نزل لمستواه وجَلس مقابله : اسمع باقي عندك فرصه نوف راحت بس بحر باقي موجود تلاحق خويك ياسلمان والله محد يسوي نص فعلته الي سواها
بحزن نطق : تركك وتلَبس تُهمه ماسواها ورضى فيها بس عشانك .. سكت وأكمل : لاتترك خويك وحيد للمره الثالثه تركته انت المره الثانيه لاتتركه الحين بعد ماعرفت كل شي
قام فاز يركب سيارته بأستعجال يحاول يتلاحق بحر
بعد ربع ساعه وصل للمكان الي كان عارفه ونزل من سيارته يشوفه من بعيد جالس على أرض البحر ويديه في شعره
قرب من عنده وبصوت خافت : تسمح لي اجلس ؟
رفع أنظاره بحر لسلمان الواقف ورد عليه : يعني لو قلت لك لا لاتجلس بتروح ؟
رد عليه وهو يجلس بجمبه : لا مانيب رايح
وبمحاولة تلطيف الجو : طول هالسنين وأنت مفارق وجهي الحين ماراح تقدر تتحملني دقيقتين ؟
رد عليه يتجاهل وجوده : أنت الي بغيت هالشي ياسلمان
لف عليه يحط راسه برأسه وبعِتاب : ليش ماجيت وقلت لي كل شي ليش حميتها ؟ أنا طول هالسنين صاد عنك وأنا مابغيت الصد ولاقويته يابحر
رد عليه : ماعطيتني فرصه لو عطيتني فرصه ولو شوي كان قلت لك كل شي لكن انت حتى أبواب بيتك صديتها عني
اخذ نفس يتراجع عن العتاب : بس تصير وأنا اخوك ماعليك مافي خاطري شي عليك
أبتسم ينطق : عيب عليك صح أني صاد عنك طول ذي المُده بس مو معناه أني ما أعرفك ولا أعرف طبوعك
ضحك بحسره : لو أنك تعرف طبوعي كان ماسكرت بيبان بيتك في وجهي بس على العموم حصل خير
لفو للخلف سامعين سياف الي نازل من سيارته والفرحه بوجهه يصفق ويقول : واخيراً ماصدقنا على الله نشوفكم كذا
ضحك بحر : عسى يدك ماهي فاضيه ؟
سياف : افا عليك بس جاي ومعي العزبه بضبط لكم اليوم احلى كشته تشوفها عيونكم
قام سلمان عن الأرض ومد يديه لبحر يرفعه ويشده يحضنه بشوق ، وبأسف : سامحني وأنا اخوك وحقك بيوصلك
نطق يرد عليه وهو يربت على ظهره : مسامح ولا بينا هالحركات ياسلمان الي بينا اكبر من كذا .
انتهى
